ধিং, ২৯ ছেপ্টেম্বৰ : কংগ্ৰেছ দলৰ জ্যেষ্ঠ নেতা মল্লিকাজ্জুন খাৰ্গেৰ পুত্ৰ তথা কৰ্ণাটকৰ মন্ত্ৰী প্ৰিয়াংক খাৰ্গেই জাগীৰোডত স্থাপন হোৱা ছেমি কণ্ডাক্টৰ প্ৰকল্পৰ বিৰোধিতা কৰা সন্দৰ্ভত প্ৰতিক্ৰিয়া প্ৰকাশ কৰিছে সাংসদ গৌৰৱ গগৈৰ লগতে প্ৰদ্যুৎ বৰদলৈয়ে । সাংসদ গৌৰৱ গগৈয়ে জাগীৰোডৰ ছেমি কণ্ডাক্টৰ প্ৰকল্পৰ ক্ষেত্ৰত বিজেপি চৰকাৰে অপ প্ৰচাৰ চলাইছে বুলি মন্তব্য প্ৰকাশ কৰে ৷
সাংসদ গগৈয়ে কয়, ‘‘গুজৰাটত চাৰিটা, অসমত যদি এটা হ’ব পাৰে ৷ তেন্তে কৰ্ণাটকত কিয় হ’ব নোৱাৰে ? বিজেপিৰ শাসনত থকা ৰাজ্যবোৰত এই সুবিধাসমূহ লাভ কৰা বিপৰীতে কংগ্ৰেছৰ শাসনত থকা ৰাজ্যসমূহ সুবিধাৰ পৰা বঞ্চিত হৈছে ৷’’
আনহাতে প্ৰিয়াংক খাৰ্গেৰ মন্তব্যৰ সন্দৰ্ভত প্ৰদ্যুৎ বৰদলৈয়ে কয়, ‘‘তেওঁ(প্ৰিয়াংক খাৰ্গে) স্পষ্ট কৰি দিছে যে, অসম ছেমি কণ্ডাক্টৰ হোৱাত তেওঁৰ মুঠেই আপত্তি নাই বুলি কৈছে ৷ অসমত ছেমি কণ্ডাক্টৰ ইণ্ডাষ্ট্ৰী এটা হোৱাত সকলোৱে ভাল পোৱা বুলি কৈছে ৷ কিন্তু তেওঁ আক্ষেপ কৰিছে ৷’’
কিয় আক্ষেপ কৰিছে প্ৰিয়াংক খাৰ্গেই ?
প্ৰদ্যুৎ বৰদলৈয়ে কয়, ‘‘বেংগালুৰু হ’ল ভাৰতৰ চিলিকন ভেলী ৷ য’ত তথ্য-প্ৰযুক্তি, আন্তঃগাঁথনি আছে ৷ তেওঁ আক্ষেপ কৰি কৈছে যে গুজৰাটত এটাৰ পিচত এটা ছেমি কণ্ডাক্টৰ ইণ্ডাষ্ট্ৰী কৰিছে ৷ অথচ গুজৰাটত সেই আন্তঃগাঁথনি নাই ৷ অসমতো আন্তঃগাঁথনি নথকা স্বত্বেও মোৰ সমষ্টিত ছেমি কণ্ডাক্টৰ ইণ্ডাষ্ট্ৰী হ’ব ৷ সেইটো তেওঁ ভাল পাইছে ৷ কিন্তু তেওঁ এটাই আক্ষেপ কৰিছে যে বিজেপিৰ দিনত পৃথিৱীৰ অন্যতম প্ৰযুক্তি-কৌশল থকা কৰ্ণাটকত বিজেপি চৰকাৰে বৈষম্য কৰিছে ৷ সেই কথাহে কৈছে তেওঁ (প্ৰিয়াংক খাৰ্গে) ৷’’
কি কৈছিল প্ৰিয়াংক খাৰ্গেই ?
উল্লেখ্য যে মল্লিকাৰ্জুন খাৰ্গেৰ পুত্ৰ তথা কৰ্ণাটকৰ মন্ত্ৰী প্ৰিয়াংক খাৰ্গেই 25 ছেপ্টেম্বৰত কৰিছিল এক বিতৰ্কিত এক্স পোষ্ট ৷ য’ত তেওঁ লিখিছিল- ‘‘পাঁচটা ছেমিকন মেনুফেকচাৰিং ইউনিটৰ চাৰিটা গুজৰাটত আৰু এটা অসমত ৷ কিন্তু তাত তেওঁলোকৰ দক্ষতাৰ ইক’চিষ্টেম নাই । তাত তেওঁলোকৰ গৱেষণাৰ পৰিৱেশ নাই । অনুকুল পৰিৱেশ নাই ৷ তাত উদ্ভাৱনৰ পৰিৱেশ ব্যৱস্থা নাই ৷ ৭০ শতাংশ চিপ ডিজাইনিঙৰ দক্ষতা কৰ্ণাটকত আছে ৷ তেন্তে চৰকাৰে ৰাজনৈতিক প্ৰভাৱ ব্যৱহাৰ কৰি কিয় আন এখন ৰাজ্যলৈ লৈ যাব বিচাৰে সেয়া মই বুজি নাপাওঁ । এয়া অন্যায় ।’’
লগতে পঢ়ক : মল্লিকাৰ্জুন খাৰ্গে আৰু তেওঁৰ পুত্ৰ দুয়োগৰাকী অসমবিৰোধী : পীযুষ হাজৰীকা
ছেমি কণ্ডাক্টৰ প্ৰকল্প সন্দৰ্ভত অপপ্ৰচাৰ চলাইছে বিজেপিয়ে; গৌৰৱ গগৈ
