গুৱাহাটী, 17 অক্টোবৰঃ মহানগৰ আৰক্ষীৰ বৃহৎ সফলতা ৷ বুধবাৰে নিশাৰ পৰা বৃহস্পতিবাৰৰ পুৱালৈকে চলা এক বিশেষ অভিযানত সোণাপুৰত জব্দ হয় 11 খন ট্ৰাকসহ এখন পিক আপ ভান ৷ বাহন কেইখনৰ পৰা উদ্ধাৰ হয় প্ৰায় 176 টা গৰু ৷ আনহাতে যোৰাবাটত এখন ট্ৰাকৰ পৰা 28 টা চোৰাং গৰুসহ আটক কৰে সৰবৰাহকাৰীক ৷
এই ঘটনা সন্দৰ্ভত মহানগৰ আৰক্ষী আয়ুক্ত দীপক কুমাৰে কয় যে, এক গোপন সূত্ৰৰ ভিত্তিতে আৰক্ষীয়ে অভিযান চলাই সোণাপুৰ আৰু যোৰাবাটত 12 খন বাহনৰ পৰা মুঠ 204 টা গৰু উদ্ধাৰ কৰিবলৈ সক্ষম হৈছে ৷ উল্লেখ্য যে,এই উদ্ধাৰ হোৱা গৰুকেইটা অবৈধভাৱে উজনি অসমৰ পৰা মেঘালয়লৈ লৈ অনা হৈছিল। এই ঘটনাৰ সৈতে জড়িত মুঠ 15 জনক চালকক ইতিমধ্যে আৰক্ষীয়ে গ্ৰেপ্তাৰ কৰিবলৈ সক্ষম হৈছে ।
ইপিনে ৰাজ্যত অব্যাহত হৈ থকা কয়লা ছিণ্ডিকেট,শিল-বালি ছিণ্ডিকেট,চুপাৰী ছিণ্ডিকেট আদিক লৈ অতিষ্ঠ হৈ পৰিছে সৰ্বসাধাৰণ ৰাইজ । আনহাতে বিজেপিৰ আত্মীয় কুটুম্বৰ ছত্ৰ-ছায়াতে এই অবৈধ বেহা চলি থকা বুলিও বিস্ফোৰক অভিযোগ উত্থাপন হৈছে ৷ লগতে গৰুৰ চোৰাং বেহা সন্দৰ্ভত সোণাপুৰৰ ভাৰপ্ৰাপ্ত বিষয়া অৱগত বুলি বিস্ফোৰক মন্তব্য প্ৰকাশ কৰিছে স্থানীয় ৰাইজে। প্ৰশ্ন হৈছে, দেশত দুৰ্নীতি নিৰ্মূল হোৱা বুলি দম্ভালি মাৰি থকাৰ পিছতো কিয় এতিয়াও অবৈধ বেহা, ছিণ্ডিকেটে গা কৰি উঠিছে ৰাজ্য়খনত ? ৰাইজৰ প্ৰশ্ন মুখ্যমন্ত্ৰীলৈ ৷
