গুৱাহাটী, 1 নৱেম্বৰঃ গুৱাহাটীৰ পল্টনবজাৰত মুকলি কৰা হয় অত্যাধুনিক এ এছ জি চকু পৰীক্ষণ কেন্দ্ৰ । সাধাৰণ লোকৰ বাবে অতি কম খৰচতে চকু পৰীক্ষণ কৰা হ'ব এই কেন্দ্ৰটোত । কেন্দ্ৰীয় চৰকাৰ কৰ্মচাৰী, ৰে'ল বিভাগৰ কৰ্মচাৰী, চৰকাৰৰ বিভিন্ন আঁচনিৰ হিতাধিকাৰীসকলে বিনামূলীয়াকৈ চকু পৰীক্ষা কৰাৰ লগতে চিকিৎসা গ্ৰহণ কৰিব পাৰিব । এই কেন্দ্ৰটো আনুষ্ঠানিকভাৱে মুকলি কৰে শিক্ষামন্ত্ৰী সিদ্ধাৰ্থ ভট্টাচাৰ্যই । কেন্দ্ৰটোৰ জৰিয়তে অসমৰ ৰাইজ যথেষ্ট উপকৃত হ'ব বুলি কয় মন্ত্ৰী সিদ্ধাৰ্থ ভট্টাচাৰ্যই ।
আনহাতে, শেহতীয়াকৈ মধ্যাহ্ন ভোজন ৰান্ধনী সন্থাই সাব্যস্ত কৰা প্ৰতিবাদ সন্দৰ্ভতো সংবাদ মাধ্যমৰ আগত প্ৰতিক্ৰিয়া প্ৰকাশ কৰে মন্ত্ৰীগৰাকীয়ে । এই সন্দৰ্ভথ মন্ত্ৰী ভট্টাচাৰ্যই কয়, "ৰান্ধনীসকলৰ এই আন্দোলন ভিত্তিহীন । উৰা বাতৰিক ভিত্তি কৰি ৰান্ধনী সন্থাই আন্দোলনৰ পথ বাচি লৈছে । একাংশ সংগঠনে নিজৰ ন্যস্ত স্বাৰ্থৰ বাবেই ব্যৱহাৰ কৰিছে ৰান্ধনীসকলক । CITU দৰে সংগঠনে কেৱল নিজৰ মুনাফাৰ বাবে ৰান্ধনীসকলক বিপথে পৰিচালিত কৰিছে । তেনে সংগঠনক ধিক্কাৰ দিছো । পূৰ্বতে ৰান্ধনীয়ে খাদ্য প্ৰস্তুত কৰাৰ লগতে বিলাবলগীয়াও হৈছিল । কিন্তু এতিয়া কেৱল খাদ্য বিতৰণহে কৰিব লাগিব । তেওঁলোকৰ কাম হ্ৰাসহে হৈছে । তেওঁলোকৰ চাকৰি যোৱাৰ কোনো প্ৰশ্নয়ে নুঠে । কাৰণ তেওঁলোক কোনো চাকৰিয়াল নহয়, স্বেচ্ছাসেৱীহে ।
লগতে ছাত্ৰ-ছাত্ৰীয়ে বৰ্তমানো ইউনিফৰ্ম নোপোৱা সন্দৰ্ভত একাংশ সংগঠনক জগৰীয়া কৰে শিক্ষামন্ত্ৰী সিদ্ধাৰ্থ ভট্টাচাৰ্যই । একাংশ লোকে গোচৰ তৰা বাবেই ছাত্ৰ-ছাত্ৰীসকলে ইউনিফৰ্ম পোৱা নাই বুলি উল্লেখ কৰে মন্ত্ৰীগৰাকীয়ে । বৰ্তমানো এই সন্দৰ্ভত ৪ টাকৈ গোচৰ চলি থকাৰ কথাও জানিবলৈ দিয়ে মন্ত্ৰী ভট্টাচাৰ্যই । তাৰোপৰি ছাত্ৰ-ছাত্ৰীসকলক ব্ৰেণ্ডেট কাপোৰ পিন্ধাইহে এৰিম বুলিও মন্তব্য কৰে মন্ত্ৰী সিদ্ধাৰ্থ ভট্টাচাৰ্যই ।
