গুৱাহাটী,২০ জুলাই: সমষ্টি পুনৰ নিৰ্ধাৰণৰ খচৰা সন্দৰ্ভত নিৰ্বাচন আয়োগৰ বৃহস্পতিবাৰে দ্বিতীয় দিনাৰ শুনানিত কংগ্ৰেছ দলৰ কেইবাগৰাকী নেতাই অংশ গ্ৰহণ কৰি নিজ নিজ সমষ্টিৰ বিভিন্ন ওজৰ-আপত্তি দাঙি ধৰে ।
শুনানিত অংশ গ্ৰহণ কৰা মঙলদৈ সমষ্টিৰ কংগ্ৰেছৰ বিধায়ক বসন্ত দাসে সংবাদ মাধ্যমৰ আগত কয় যে সমষ্টিৰ সীমাৰ ক্ষেত্ৰত ব্যাপক সাল-সলনি কৰা হৈছে । ভৌগোলিকভাৱে কোনো ধৰণৰ মিল নথকাকৈ সমষ্টিৰ পুনৰ নিৰ্ধাৰণ কৰা হৈছে । এই বিষয়ত আয়োগক কোৱা হৈছে ।
বিজেপি চৰকাৰৰ নিৰ্দেশ মৰ্মে এই খচৰা প্ৰস্তুত কৰা হৈছে বুলি অভিযোগ কৰি তেওঁ কয় যে ইয়াত এটা বিশেষ জনগোষ্ঠীক এফালে ৰখা হৈছে আৰু আন এটা জনগোষ্ঠীক আন এফালে ৰখা হৈছে । খিলঞ্জীয়া এছ চিৰ (SC) বাবে কেইখন আসন সংৰক্ষণ কৰিছে বুলি তেওঁ প্ৰশ্ন উত্থাপন কৰে ।
বাহিৰৰ পৰা অহা এছ চিৰ বাবে আসন সংৰক্ষণ কৰাৰ ব্যৱস্থা কৰা হৈছে বুলি তেওঁ প্ৰশ্ন উত্থাপন কৰে ৷ আনহাতে পশ্চিম গোৱালপাৰা সমষ্টিৰ কংগ্ৰেছৰ বিধায়ক আব্দুৰ ৰচিদ মণ্ডলে প্ৰতিক্ৰিয়া ব্যক্ত কৰি কয় যে ডিলিমিটেচন এক্টৰ আধাৰত এই প্ৰক্ৰিয়া হোৱা নাই । তেওঁ কয় যে ধৰ্মৰ ভিত্তিত কেতিয়াও সমষ্টি পুনৰ নিৰ্ধাৰণ হ'ব নোৱাৰে ।
ইফালে আছুৰ প্ৰসংগত সৰুক্ষেত্ৰীৰ কংগ্ৰেছৰ বিধায়ক জাকিৰ হুছেইন শিকদাৰে আছুক ৰাজনৈতিক নেতাৰ চাৰ্টিফিকেট নালাগে যদি বসন্ত ডেকা ইমান দিনে তেওঁলোকৰ বাবে ৰাজনৈতিক নেতা নাছিল নেকি বুলি প্ৰশ্ন কৰে । এতিয়া আপত্তি কৰা বাবে আছুৱে বসন্ত ডেকাৰ চাৰ্টিফিকেট নালাগে বুলি কৈছে ।
তেওঁ কয় যে অসমৰ ৰাইজে বসন্ত ডেকা আৰু আছু এটা মুদ্ৰাৰ ইপিঠি-সিপিঠি বুলি ভাৱে । গতিকে সেই বসন্ত ডেকাই আছুক সমালোচনা কৰিবলগীয়া হৈছে যেতিয়া আমাৰ বিশেষ ক'বলগীয়া নাই বুলি তেওঁ কয় । আছুক তেওঁ আত্মসমালোচনা কৰাৰ বাবে আহ্বান জনায় ।
উল্লেখ্য যে আজি নিৰ্বাচন আয়োগে ৯খন জিলা ক্ৰমে গোৱালপাৰা, বঙাইগাঁও, বৰপেটা, নলবাৰী, শোণিতপুৰ, কৰিমগঞ্জ, দৰং, হাইলাকান্দি, কাছাৰ, দক্ষিণ শালমাৰা, নগাঁও, মৰিগাঁও আৰু ধুবুৰী জিলাৰ আবেদন সন্দৰ্ভত শুনানি গ্ৰহণ কৰে ।
