গুৱাহাটী ,২১ ছেপ্তেম্বৰ : ৰাজ্যসভাৰ উপ নিৰ্বাচনৰ বাবে আজি অৰ্থাৎ মঙলবাৰে মনোনয়ন পত্ৰ দাখিল কৰিলে কেন্দ্ৰীয় কেবিনেট মন্ত্ৰী সৰ্বানন্দ সোণোৱালে । সোণোৱালে দিছপুৰৰ অসম বিধানসভা চৌহদত থকা ৰিটাৰ্নিং বিষয়াৰ কাৰ্যালয়ত পুৱাৰ ভাগত সদলবলে উপস্থিত হৈ দাখিল কৰে মনোনয়ন । ৪ অক্টোবৰত অনুষ্ঠিত হ'ব ৰাজ্যসভাৰ নিৰ্বাচন ।
ৰাজ্যসভাত অসমৰ খালী হৈ আছে এখন আসন । ৰাজ্যসভাৰ এই আসনৰ নিৰ্বাচনৰ বাবে আজি সোণোৱালে মনোনয়ন দাখিল কৰে । মনোনয়ন দাখিলৰ সময়ত প্ৰাক্তন মুখ্যমন্ত্ৰীগৰাকীক সংগ দিয়ে মুখ্যমন্ত্ৰী ড৹ হিমন্ত বিশ্ব শৰ্মা আৰু প্ৰদেশ বিজেপিৰ সভাপতি ভৱেশ কলিতাই ।
তদুপৰি মিত্ৰদল অগপৰ সভাপতি তথা মন্ত্ৰী অতুল বৰা আৰু ইউ পি পি এলৰ সভাপতি প্ৰমোদ বড়ো মনোনয়ন দাখিলৰ সময়ত সোণোৱালৰ লগত উপস্থিত আছিল ।
আনহাতে, হিমন্ত বিশ্ব শৰ্মা মন্ত্ৰীসভাৰ কেইবাগৰাকী মন্ত্ৰীৰ লগতে কেইবাগৰাকী বিধায়কো মনোনয়ন দাখিলৰ সময়ত উপস্থিত আছিল । মনোনয়ন দাখিল পৰ্বৰ পাচত সংবাদ মাধ্যমৰ আগত মুখ্যমন্ত্ৰী ড৹ হিমন্ত বিশ্ব শৰ্মাই কয় -'অসমৰ খালী হৈ থকা ৰাজ্যসভাৰ আসনখনৰ নিৰ্বাচনৰ বাবে আজি কেন্দ্ৰীয় মন্ত্ৰী সৰ্বানন্দ সোণোৱালে মনোনয়ন দাখিল কৰিলে । মিত্ৰদল অগপ আৰু ইউ পি পি এল দলে তেখেতৰ প্ৰাৰ্থীত্বক সমৰ্থন জনাইছে ।’
জানিব পৰা মতে, বিৰোধী দলে এই আসনখনৰ বাবে প্ৰাৰ্থী দিব বিচৰা নাই । মই বিৰোধী দলক এই সহযোগীতাৰ বাবে ধন্যবাদ জনাইছো । কেন্দ্ৰীয় মন্ত্ৰী সোণোৱালকো অভিনন্দন জনাইছো । তেখেতে সংসদৰ পৰা আৰু কেন্দ্ৰীয় মন্ত্ৰীসভাৰ এগৰাকী সদস্য হিচাপে অসম তথা উত্তৰ-পূৰ্বাঞ্চলৰ বিকাশৰ বাবে অৱদান আগবঢ়াই যাব পাৰে বুলি আমি আশা প্ৰকাশ কৰো’।
উল্লেখ যে, বৰ্তমানৰ অসম বিধানসভাৰ অধ্যক্ষ বিশ্বজিৎ দৈমাৰীয়ে পদত্যাগ কৰাৰ পাচতে ৰাজ্যসভাৰ এখন আসন খালী হৈ আছিল ।
লগতে পঢ়ক: আলফা(স্বা)ৰে প্ৰাথমিক আলোচনা কৰিবলৈ মুখ্যমন্ত্রীক কৰ্তৃত্ব প্ৰদান
