গুৱাহাটী,30 ডিচেম্বৰঃ গুৱাহাটী বিশ্ববিদ্যালয়ৰ বিজ্ঞান আৰু প্ৰযুক্তিবিদ্যা শাখাৰ প্ৰাক্তন শিক্ষাৰ্থীৰ বিশেষ উদ্ভাৱন । ছেনিটাইজেশ্বনৰ কৰা তিনিটাকৈ সজুলি প্ৰস্তুত কৰি উলিয়াইছে বিভাগটোৰ শিক্ষাৰ্থীসকলে। কৰ'ণাসৃষ্ট পৰিস্থিতিৰ সৈতে মোকাবিলা কৰিব পৰাকৈ এই বিশেষ সজুলিৰ উদ্ভাৱন কৰিছে প্ৰাক্তন শিক্ষাৰ্থীসকলে ।
বুধবাৰে গুৱাহাটী বিশ্ববিদ্যালয়ৰ বিজ্ঞান আৰু প্ৰযুক্তিবিদ্যা শাখাৰ সভাকক্ষত আনুষ্ঠানিকভাৱে এই সজুলি তিনিবিধ মুকলি কৰা হয় । নীলকণ্ঠ, জেপমিনি আৰু টেংক-254 উদ্বোধন কৰা হয় । প্ৰাক্তন ছাত্ৰ অৰ্ণৱ বৰ্মন আৰু তেওঁৰ সহযোগীৰ নেতৃত্বাধীন 'ডি. এছ. আৰ. এল' নামৰ ষ্টাৰ্ট আপ প্ৰতিস্থানৰ উদ্যোগত নিৰ্মাণ কৰা হৈছে এই বিশেষ প্ৰযুক্তিৰ ৰবট আৰু সঁজুলিবিধ । ইয়াৰে নীলকণ্ঠ নামৰ ৰবটটোৰে চিনেমাগৃহ, শ্বপিং মল, বাণিজ্যিক ক্ষেত্ৰ, কাৰ্যালয়, শিক্ষানুষ্ঠান, চিকিৎসালয়, বিমান, ৰে'ল আদি বৃহৎ অনুষ্ঠান ছেনিটাইজ কৰিব পাৰিব। অতি কম সময়ৰ ভিতৰতে ই-বিজাণুমুক্ত কৰিব পাৰিব । একেদৰে জেপমিনি আৰু টেংক-254য়ে ক্ষুদ্ৰ ক্ষুদ্ৰ সামগ্ৰী ছেনিটাইজ কৰিব । 9 মাহৰ ভিতৰত শিক্ষাৰ্থী, প্ৰাক্তন শিক্ষাৰ্থী, শিক্ষক আৰু গুৱাহাটী বিশ্ববিদ্যালয়ৰ এটা গৱেষণা গোটে অত্যাধুনিক প্ৰযুক্তিৰে নিৰ্মাণ কৰিছে এই ৰবট আৰু সঁজুলি ।
ইফালে অতি কম মূল্যত অসমৰ বজাৰত উপলব্ধ হ'ব এই ৰবট আৰু সঁজুলি । উল্লেখযোগ্য যে এই উদ্বোধনী অনুষ্ঠানত উপস্থিত থাকে গুৱাহাটী বিশ্ববিদ্যালয়ৰ উপাচাৰ্য ডঃ প্ৰতাপ জ্যোতি সন্দিকৈ, পঞ্জীয়ক হেমন্ত কুমাৰ নাথ, AICTE ৰ সঞ্চালক প্ৰঃ অনিল সহস্ৰবুদ্ধকে প্ৰমুখ্য কৰি ভালে সংখ্যক গণ্য মান্য ব্যক্তি ৷
