গুৱাহাটী,৪ আগষ্ট : অসম প্ৰদেশ কংগ্ৰেছৰ সভাপতি(Assam Pradesh Congress Committee President) পদৰ পৰা বুধবাৰে আনুষ্ঠানিকভাৱে অব্যাহতি ললে ৰিপুন বৰাই (Ripun Bora) ৷ দলৰ সভাপতি পদৰ পৰা অব্যাহতি লোৱাৰ সময়ত নেতাগৰাকীক আবেগিক হৈ পৰা পৰিলক্ষিত হৈছিল ৷ বৰাৰ বিদায়ী ভাষণত প্ৰদেশ কংগ্ৰেছৰ ভিতৰ চ'ৰাত চলি থকা ক্ষমতাকেন্দ্ৰিক সংঘাতৰ স্পষ্ট স্বৰূপ প্ৰতিফলিত হয় ।
প্ৰদেশ কংগ্ৰেছৰ সভাপতি হিচাপে ৰিপুন বৰাই বিগত পাঁচ বছৰ বিজেপিৰ বিৰুদ্ধে যুঁজ দিয়াৰ সমান্তৰলকৈ নিজৰ চকী ৰক্ষাৰ বাবেও দিব লগা হৈছিল যুঁজ । এই কথা আমি কোৱা নাই । এই কথা কৈছে খোদ ৰিপুন বৰাই । প্ৰদেশ কংগ্ৰেছৰ বিদায়ী সভাপতি হিচাপে দিয়া ভাষণত বৰাই কয় যে, মই মোৰ সময়ত সন্মুখীন হোৱা পৰিৱেশৰ যাতে নৱ নিযুক্ত সভাপতি ভূপেন বৰাই সন্মুখীন নহয় তাৰেই কামনা কৰিছো । মোৰ সময়ত হোৱা বুৰঞ্জীৰ যাতে পুনৰাবৃত্তি নহয় ।
তেওঁ লগতে কয় যে, মই এফালে বিজেপিৰ বিৰুদ্ধে যুঁজ দিয়াৰ লগতে আনফালে গাদী তথা চকী ৰক্ষাৰ বাবে যুঁজ দিবলগীয়া হৈছিল । গাদী ৰক্ষাৰ বাবে বাৰে বাৰে যুঁজিব লগা হৈছিল । তেনে পৰিস্থিতিৰ যাতে ভূপেন বৰাই সন্মুখীন নহয় তাৰেই কামনা কৰিছো ।
আনহাতে লবীকেন্দ্ৰীক ৰাজনীতিৰ বাবে প্ৰদেশ কংগ্ৰেছ বিপৰ্যয়ৰ সন্মুখীন হোৱাটোও বিদায়ী সভাপতিগৰাকী বক্তব্যই প্ৰমাণ কৰে । ইফালে প্ৰদেশ কংগ্ৰেছৰ নৱনিযুক্ত সভাপতি ভূপেন কুমাৰ বৰা (Bhupen Kumar Borah)আৰু কাৰ্যকৰী সভাপতি ক্ৰমে ৰাণা গোস্বামী, কমলাক্ষ দে' পুৰকায়স্থ আৰু জাকিৰ হুছেইন শিকদাৰে আজি আনুষ্ঠানিকভাৱে কাৰ্যভাৰ গ্ৰহণ কৰে ।
গুৱাহাটীস্থ কলাক্ষেত্ৰ শ্ৰীমন্ত শংকৰদেৱ আন্তৰ্জাতিক প্ৰেক্ষাগৃহত আয়োজন কৰা বিশাল কাৰ্যভাৰ গ্ৰহণ অনুষ্ঠানত বিদায়ী সভাপতি ৰিপুন বৰাই দিয়া নিজৰ ভাষণত দীৰ্ঘদিনীয়া মনৰ ক্ষোভ ব্যক্ত কৰে । অনুষ্ঠানত ৰিপুন বৰাই নৱনিযুক্ত সভাপতি ভূপেন বৰাক শুভেচ্ছা জ্ঞাপন কৰি আনুষ্ঠানিকভাৱে কাৰ্যভাৰ অৰ্পণ কৰে ।
লগতে পঢ়ক : কৃষি বিভাগৰ কেলেংকাৰী-চুবুৰীয়া ৰাজ্যৰ আগ্ৰাসনক লৈ উত্তাল বিধানসভা
