গুৱাহাটী, ১৮ ছেপ্টেম্বৰ: গুৱাহাটীৰ এখন ব্যক্তিগত শিক্ষা প্ৰতিষ্ঠানৰ বিৰুদ্ধে ক্ষোভ উজাৰিছে স্থানীয় ৰাইজে । শিক্ষা প্ৰতিষ্ঠানখনে অকৰ্তৃত্বশীলভাৱে এটি ৰাজহুৱা পথ ব্যক্তিগত কামত ব্যৱহাৰ কৰাকলৈ ক্ষোভ উজাৰিছে স্থানীয় ৰাইজে । মহানগৰীৰ আমগাঁওস্থিত PEWS গ্ৰুপ অৱ ইনষ্টিটিউচনৰ অন্তৰ্গত PEWS গ্ৰুপ অৱ পেৰামেডিকেল চায়েন্স নামৰ এখন ব্যক্তিগত প্ৰতিষ্ঠানৰ বিৰুদ্ধে উত্থাপিত হৈছে এই অভিযোগ ।
স্থানীয় ৰাইজৰ অভিযোগ অনুসৰি প্ৰতিষ্ঠানখনে আমগাঁৱৰ তলৰ পৰা গোপাল দাসৰ ঘৰলৈ যোৱা প্ৰায় ১৩৯ মিটাৰ সৰু পথটো শিক্ষা প্ৰতিষ্ঠানখনৰ হোষ্টেল নিৰ্মাণৰ বাবে শিল-বালি আদি কঢ়িওয়াৰ উপৰি অহৰহ এক্সাভেটৰ, ডাম্পাৰ আদি অহা-যোৱা কৰাৰ বাবে দীৰ্ঘদিন ধৰি ব্যৱহাৰ কৰি আহিছে । ইয়াৰ ফলত এই পথটোৰ কাৰ্পেটিং সমূহ উঠি যোৱাৰ লগতে বিভিন্ন স্থানত পথটো ভাঙি গৈছে ।
স্থানীয় ৰাইজে ভগ্ন পথটো নিৰ্মাণ কৰাৰ বাবে কেইবাবাৰো PEWS কৰ্তৃপক্ষক অবগত কৰিছে যদিও কৰ্তৃপক্ষই পথটো মেৰামতি কৰাৰ ক্ষেত্ৰত ব্যৱস্থা গ্ৰহণ নকৰাত এতিয়া ক্ষুব্ধ হৈ পৰিছে আমগাঁওবাসী ৰাইজ । তদুপৰি PEWS কৰ্তৃপক্ষই হোষ্টেল নিৰ্মাণৰ নামত অবৈধভাৱে পাহাৰ খনন কৰাৰ ফলত বৰষুণৰ সময়ত ওপৰৰ শিল খহি পৰাৰ ফলত পথ দুৰ্ঘটনা সংঘটিত হোৱাৰ অভিযোগো উত্থাপন কৰে ৰাইজে ।
PWES কৰ্তৃপক্ষই ব্যক্তিগত কামৰ বাবে পথটো অহৰহ ব্যৱহাৰ কৰাৰ ফলত এতিয়া পথটো যাতায়াতৰ অনুপযোগী হৈ পৰা বুলি স্থানীয় ৰাইজে অভিযোগ তুলি পথটো অতি শীঘ্ৰে মেৰামতি কৰি দিয়াৰ বাবে দাবী জনাইছে । উল্লেখ্য যে, ২০২০ চনত পানীখাইতি গাঁও পঞ্চায়তৰ অন্তৰ্গত এই পথটো লোক নিৰ্মাণ বিভাগে ২০১৯-২০ বিত্তীয় আয়োগৰ ৮ লাখ টকা ব্যয়ৰে ১৩৯ মিটাৰ দীঘল আৰু ৩.৬ মিটাৰ ব্যাসৰ সৰু পথটো নিৰ্মাণ কৰিছিল ।
