কামৰূপ, 17 আগষ্টঃ আমিনগাঁৱৰ শক্তি বিভাগৰ কাৰ্যালয় লণ্ডভণ্ড কৰা অপৰাধীক বিচাৰি আৰক্ষীয়ে নিৰপৰাধীক নিৰ্যাতন চলোৱাৰ গুৰুতৰ অভিযোগ উঠিছে ৷ দোষীক কৰায়ত্ত কৰিবলৈ গৈ মহিলাৰ কোঠাত প্ৰৱেশ কৰি আৰক্ষীয়ে ভিডিঅ' কৰাৰো গুৰুতৰ অভিযোগ উঠিছে আমিনগাওঁ আৰক্ষীৰ বিৰুদ্ধে ।
যোৱা 7 জুলাইত অনিয়মীয়া বিদ্যুৎ যোগানত অতিষ্ঠ হৈ একাংশ লোকে আমিনগাঁৱৰ শক্তি বিভাগৰ কাৰ্যালয় লণ্ড ভণ্ড কৰছিল ৷ তাৰ পাছতেই এই ঘটনাৰ লগত জড়িত দোষীক গ্ৰেপ্তাৰ কৰিবলৈ তৎপৰ হৈছিল আমিনগাঁও আৰক্ষী ৷ কিন্তু ঘটনাৰ তদন্ত কৰিবলৈ যোৱাৰ নামত আমিনগাঁও আৰক্ষীয়ে মহিলা আৰু কিশোৰীৰ কাপোৰ ফালি শালিনতা হানি কৰাৰ গুৰুতৰ অভিযোগ উঠিছে ৷
এই অভিযোগৰ পাছতেই শনিবাৰে ন্যায় বিচাৰি আমিনগাওঁ আৰক্ষী চকীত প্ৰতিবাদ সাব্যস্ত কৰে আমিনগাঁওবাসীয়ে ৷ কিন্তু গুৰুত্বপূৰ্ণ যে প্ৰতিবাদ সাব্যস্ত কৰিবলৈ যোৱা এগৰাকী বৃদ্ধাক গুৰুলা গুৰুলকৈ প্ৰহাৰ কৰে আমিনগাঁও আৰক্ষীয়ে ৷ ক্ষোভিত ৰাইজক নিয়ন্ত্ৰণৰ বাবে অৱশেষত আমিনগাঁও আৰক্ষী চকীত কামৰূপ জিলা আৰক্ষীৰ শীৰ্ষ বিষয়া আৰু দণ্ডাধীশ উপস্থিত হৈ সমগ্ৰ ঘটনাৰ উচিত তদন্তৰ আশ্বাস কৰাৰ পাছতহে পৰিস্থিতি নিয়ন্ত্ৰণলৈ আহে ৷
