গুৱাহাটী, 26 নৱেম্বৰ : মাটি-বাৰী সম্পৰ্কীয় বিভিন্ন বিবাদ নিষ্পত্তিৰ বাবে ৰাজ্য চৰকাৰে মুকলি কৰা অভিলাষী আঁচনি 'মিছন বসুন্ধৰা'ৰ প্রতি জনসাধাৰণে আগবঢ়াইছে ব্যাপক সঁহাৰি । ভূমি সম্পৰ্কীয় বিভিন্ন সমস্যা সমাধানৰ বাবে চৰকাৰে মুকলি কৰা সহজ, দ্রুত আৰু স্বচ্ছ সেৱাৰ প্রতি আকৃষ্ট হৈ ৰাজ্যৰ প্ৰতিটো প্ৰান্তৰ ৰাইজে আবেদন কৰিছে । এই পর্যন্ত মিছন বসুন্ধৰা পৰ্টেলত জমা হৈছে ৩ লাখৰো অধিক আৱেদন । দৈনিক আবেদকাৰীৰ সংখ্যা বৃদ্ধি পাবলৈ ধৰিছে মিছন বসুন্ধৰাৰ পৰ্টেলত (Missiom Barundhara piortal)।
আৱেদনৰ সমান্তৰালকৈ অব্যাহত আছে নিষ্পত্তিকৰণৰ প্ৰক্ৰিয়া(application work in mission basundhara) । ৰাজহ বিভাগে এই পর্যন্ত নিষ্পত্তি কৰিছে 30 হাজাৰৰো অধিক আৱেদন । কামৰ অগ্ৰগতিৰ হাৰ বৰ্তমানলৈকে 15 শতাংশৰো অধিক । চৰকাৰে 30 নৱেম্বৰৰ ভিতৰত মিছন বসুন্ধৰা পৰ্টেলৰ জৰিয়তে আৱেদনৰ সময়সীমা বান্ধি দিছে ।
কিন্তু আগন্তুক ৫ দিনৰ ভিতৰত ভূমি সম্পৰ্কীয় বিভিন্ন সমস্যা সমাধানৰ আশাৰে তৎপৰ হৈ পৰা ৰাজ্যৰ জনসাধাৰণে আৱেদন প্রক্রিয়া সম্পূর্ণ কৰিব পাৰিব নে নাই তাক লৈ সন্দেহৰ অৱকাশ আছে । ৰাজ্য চৰকাৰে আৱেদন দাখিলৰ সময়সীমা বৃদ্ধি নকৰিলে হয়তাে গৰিষ্ঠ সংখ্যক লােক এই সুবিধা গ্রহণৰ পৰা বঞ্চিত হৈ ৰোৱাৰ সম্ভাৱনা আছে ।
উল্লেখ্য যে, মুখ্যমন্ত্ৰী ড৹ হিমন্ত বিশ্ব শৰ্মাই 2 অক্টোবৰত মুকলি কৰিছিল 'মিছন বসুন্ধৰা'(Mission Basundhara launched by himanta biswa sarma) । উত্তৰাধিকাৰী সূত্রে নামজাৰি, দলিলত কৰা ভূমি নামজাৰি, এজমালি পট্টা আপােচ বাটোৱাৰা, একচনীয়া মাটি ম্যাদীকৰণ, আৱণ্টন প্রাপ্ত ম্যাদীকৰণ আদি বিভিন্ন ভূমি সংক্রান্তীয় সমস্যা সমাধানৰ বাবে বসুন্ধৰা আঁচনি গ্ৰহণ কৰিছে চৰকাৰে । ৰাজ্যৰ অধিক সংখ্যক খিলঞ্জীয়া জনসাধাৰণেই এনেবােৰ সমস্যাৰ লগত যুঁজি আছে । সম্পূর্ণ বিনামূলীয়াকৈ উক্ত সমস্যা সমাধানৰ বাবে চৰকাৰে মিছন বসুন্ধৰা আঁচনি গ্ৰহণ কৰিছে ।
নৱেম্বৰত আৱেদন প্রক্রিয়া সম্পন্ন হােৱাৰ পাছত আৱেদনৰ ভিত্তিত ৰাইজৰ প্ৰতিটো সমস্যা ৰাজহ বিভাগে 10 মে’ৰ ভিতৰত নিষ্পত্তিৰ লক্ষ্য বান্ধি লৈছে । কিন্তু অনলাইন আবেদন প্রক্রিয়া 30 নৱেম্বৰৰ ভিতৰত সম্পূর্ণ নহ'লে আৱেদনৰ সময়সীমা চৰকাৰে বৃদ্ধি কৰিব নে নাই বৰ্তমান সেয়া এক ডাঙৰ প্ৰশ্ন ।
ইফালে মিছন বসুন্ধৰাৰ উদ্দেশ্য সফল কৰাত শাসক-বিৰােধী প্রতিজন বিধায়কৰ সহযােগ বিচাৰি ৰাজহ মন্ত্রী যােগেন মহনে পত্র প্ৰেৰণ কৰিছে । বিশেষকৈ আৱেদনসমূহ নিষ্পত্তি কৰিবলৈ ৰাজহ চক্ৰ বিষয়াসকলে গাঁওবােৰত চলােৱা ৰাজহ আদালত সফল কৰাত প্ৰতিজন বিধায়ককে সহযােগিতা আগবঢ়াবলৈ ৰাজহমন্ত্ৰীয়ে অনুৰােধ জনাইছে ।
লগতে পঢ়ক : আৰম্ভ হ'ল 'মিছন বসুন্ধৰা পৰ্টেল'
