গুৱাহাটী, ৭ এপ্ৰিল : অসমীয়া বাপতি-সাহোন ৰঙালী বিহুলৈ মাজত মাথোঁ কেইদিনমানহে বাকী (Rangali Bihu 2023)। ঢোল-পেঁপা-গগণাৰ মাতত ৰজনজনাইছে ৰাজ্য ৷ ৰঙালী বিহুক কেন্দ্ৰ কৰি ৰাজ্যজুৰি এতিয়া উৎসৱমুখৰ পৰিৱেশে বিৰাজ কৰা পৰিলক্ষিত হৈছে । ইয়াৰে ব্যতিক্ৰম নহয় গুৱাহাটী মহানগৰীও ।
মহানগৰীৰ বজাৰ এতিয়া ভৰি পৰিছে গামোচা, লাড়ু-পিঠা, বিহুৰ লোকবাদ্য আদিৰে । মহানগৰীৰ দীঘলী পুখুৰীৰ পাৰৰ লক্ষীধৰ বৰা ক্ষেত্ৰত আৰু সিদ্ধিনাথ শৰ্মা ভৱনত ৪ এপ্ৰিলৰ পৰা ১৩ এপ্ৰিললৈ ৰঙালী মেলা আয়োজন কৰা হৈছে । এই ৰঙালী মেলালৈ আহিছে ৰাজ্যৰ বিভিন্ন স্থানৰ ব্যৱসায়ীসকল ।
ইফালে গামোচা, ঢোল, পেঁপা, বাঁহী, গগণা, সুতুলিক বিচাৰি মেলাবোৰত গ্ৰহকেও ভিৰ কৰা পৰিলক্ষিত হৈছে । এইবাৰ ৰাজ্য চৰকাৰৰ নিৰ্দেশ অনুসৰি, বৰ্তমান অসম বন্ধ কৰি দিয়া হৈছে পাৱাৰলুম তথা বহিঃৰাজ্যৰ পৰা অহা গামোচা ৷ ফলত পূৰ্বৰ তুলনাত বৃদ্ধি পাইছে থলুৱা গামোচাৰ মূল্য (Price hike in traditional Assamese Gamocha)৷
থলুৱা গামোচাৰ মূল্যবৃদ্ধিয়ে বাৰুকৈ প্ৰভাৱ পেলাইছে গামোচাৰ ব্যৱসায়ীসকলৰ ওপৰতো । ব্যসায়ীসকলে জনোৱা মতে, পাৱাৰলুমৰ গামোচা বন্ধ হোৱাৰ ফলত পূৰ্বৰ তুলনাত এইবাৰ গামোচাৰ মূল্য ৭০-৮০% বৃদ্ধি পাইছে । যাৰ ফলত কোনো কোনো সময়ত গ্ৰাহক আৰু বিক্ৰেতাৰ মাজতো বাক-বিতণ্ডা হোৱা পৰিলক্ষিত হৈছে ৷
যিহেতু চৰকাৰৰ তৰফৰ পৰা ৰাজ্যত পাৱাৰলুমৰ গামোচা সম্পূৰ্ণৰূপে বন্ধ কৰি দিয়া হৈছে (Bans power loom products), সেয়ে পূৰ্বৰ তুলনাত ব্যৱসায়ীসকলে এইবাৰ থলুৱা গামোচা দুগুণে মজুত ৰাখিছে । কিন্তু দাম বৃদ্ধিৰ বাবে বহু লোকে অসন্তুষ্টিও প্ৰকাশ কৰা বুলিও ব্যৱসায়ীসকলে উল্লেখ কৰে ।
বৰ্তমানলৈ বজাৰ সেৰেঙা যদিও বিহুৰ আগমূহুৰ্তত অৰ্থাৎ ১১ এপ্ৰিলৰ পৰা ১৪ এপ্ৰিলৰ ভিতৰত বিহুৰ বজাৰ ভাল হ’ব বুলি আশা কৰিছে ব্যৱসায়ীসকলে । কিয়নো ১৪ এপ্ৰিলত গুৱাহাটী মহানগৰীত আয়োজিত হ’ব বিশাল বিহু ৷ সেয়ে এই বিহুৰ আগমূহুৰ্তত বিহুৰ বজাৰ ভাল হ’ব বুলি যথেষ্ট আশাবাদী বিক্ৰেতাসকল ৷
আনহাতে, এই ৰঙালী মেলাত উপলব্ধ হৈছে ঢোল, পেঁপা, বাঁহী, কাকৈ ফনি, সুতুলি, গগণাকে ধৰি বিহুত ব্যৱহৃত লোকবাদ্যৰ লগতে বিহুৰ পোচাক । বিভিন্ন লোকবাদ্য নিজ হাতে তৈয়াৰ কৰি বজাৰলৈ লৈ আনিছে যোৰহাট তিতাবৰৰ প্ৰফুল্ল শৰ্মায়ো ।
তেওঁ জনোৱা মতে, প্ৰতি বছৰৰ দৰে এইবাৰো ৰঙালী মেলালৈ আনিছে প্ৰায় ৫ লাখ টকাতকৈ অধিক টকাৰ সামগ্ৰী । তেওঁৰ বিপনীত ৮০০ পৰা ৯০০০ টকাৰ পৰ্যন্ত ঢোল, ম’হৰ শিঙৰ পেঁপা ২,০০০-৫৫০০ টকা, বাঁহৰ পেঁপা ২০০০-২৫০০ টকা, বাঁহী ৩০০-৫০০ টকা, গগণা ১২০ টকা, সুতুলি ১২০ টকা পৰ্যন্ত বিক্ৰী হৈছে ।
লগতে পঢ়ক : Rangali Bihu 2023 : ৰঙৰ উৎসৱ ৰঙালীক আদৰিবলৈ ব্যস্ততা বাঢ়িছে ঢোল নিৰ্মাতাসকলৰ
