গুৱাহাটী,4 চেপ্তেম্বৰ: নিৰ্বাচনৰ দিন যিমানেই ওচৰ চাপিছে সিমানেই ইখনৰ পিছত সিখন আঁচনি ঘোষণাৰ ঢৌ উঠিছে ৰাজ্য চৰকাৰৰ ৷ শুকুৰবাৰে এক সংবাদমেলযোগে তিনিখন নতুন আঁচনি ঘোষণা কৰে ৰাজ্য চৰকাৰৰ কেবিনেট মন্ত্ৰী ডঃ হিমন্ত বিশ্ব শৰ্মাই । ইয়াৰ আটাইতকৈ গুৰুত্বপূৰ্ণ আঁচনিখন হৈছে ইতিপূৰ্বে চৰকাৰে বাজেটত ঘোষণা কৰি থোৱা স্বয়ম আঁচনিৰ অধীনত ৰাজ্যৰ দুই লাখ যুৱক-যুৱতীক আত্মসংস্থাপনৰ বাবে চৰকাৰে আগবঢ়াব 50 হাজাৰকৈ টকা ৷ এই ধনৰাশি চৰকাৰক পৰিশোধ কৰিব নালাগে ৷ ৰাজ্যৰ বিভিন্ন আত্মসহায়ক গোট, কৃষি গোট আদিৰ জৰিয়তে আগবঢ়োৱা হ’ব এই পুঁজি ৷ তদুপৰি 16 চেপ্তেম্বৰত চৰকাৰে এই সম্পৰ্কত এটা প’ৰ্টেল মুকলি কৰিব আৰু সেই প’ৰ্টেলত এই গোটসমূহে আবেদন জনাব পাৰিব ৷ এই আঁচনিৰ বাবে পৰৱৰ্তী তিনি মাহত চৰকাৰে 1000 কোটি টকা ব্যয় কৰিব বুলিও মন্ত্ৰী ডঃ শৰ্মাই প্ৰকাশ কৰে ৷
ইতিমধ্যে শিক্ষা ঋণ গ্ৰহণ কৰাসকলক চৰকাৰৰ তৰফৰ পৰা 50 হাজাৰ টকাৰ ৰাজসাহায্য আগবঢ়োৱা হৈছে । 1,547 গৰাকী লোকে এতিয়ালৈ এই সাহায্য লাভ কৰিছে ৷ তদুপৰি যিসকলে এতিয়ালৈ এই সাহায্য লাভ কৰা নাই,তেওঁলোকে www.assamfinanceloan.in নামৰ ৱেবছাইটৰ জৰিয়তে এই সাহায্য লাভৰ বাবে আবেদন জনাব পাৰিব । 7 চেপ্তেম্বৰৰ পৰা 10 চেপ্তেম্বৰৰ ভিতৰত 5,547 গৰাকী লোকৰ বাবে ৰাজসাহায্য মোকোলাই দিয়া হ’ব । যাৰ বাবে বাজেটত ধাৰ্য কৰা হৈছে 25 কোটি টকা ৷ একেদৰে চাহ শ্ৰমিকৰ 7,15,979 টা বেংক একাউণ্টত ইতিমধ্যে 2,500 টকাকৈ আদায় দিয়া হৈছে বুলি মন্তব্য কৰি ডঃ শৰ্মাই লগতে কয়,2020-21 বৰ্ষত চাহ শ্ৰমিকৰ এই একাউণ্টসমূহত 3,000 টকাকৈ চৰকাৰে আগবঢ়াব । 2 অক্টোবৰৰ পৰা ৰাজ্যৰ চাহ বাগিচাসমূহত 120 খন হাইস্কুল নিৰ্মাণৰ কামো আৰম্ভ হ’ব ৷
আনহাতে,ৰাজ্যৰ শেহতীয়া কৰ’ণাৰ পৰিস্থিতি সন্দৰ্ভত মন্তব্য কৰি মন্ত্ৰীগৰাকীয়ে কয়,যিহেতু এতিয়া কোনো ৰাজ্য চৰকাৰে নিজাকৈ লক ডাউন ঘোষণা কৰিব নোৱাৰে,সেয়ে চৰকাৰে কেতবোৰ কঠোৰ নীতি নিয়ম বলৱৎ কৰাৰ সিদ্ধান্ত লৈছে । কিয়নো কোভিড 19 য়ে শেহতীয়াকৈ অধিক ভয়াৱহ ৰূপ ধাৰণ কৰিছে । দেওবাৰৰ পৰা এই নতুন নীতি নিয়ম বলৱৎ হোৱাৰ সম্ভাৱনা আছে বুলি মন্তব্য কৰে মন্ত্ৰীগৰাকীয়ে ৷ তদুপৰি কোভিড 19 ৰ চিকিৎসা এতিয়াও বিনামূলীয়াকৈ চৰকাৰে আগবঢ়াই আছে ৷ কেৱল পেয়িং কেবিনৰ বাবে মাচুল আদায় লোৱাৰ ব্যৱস্থা কৰা হৈছে । আনহাতে, ৰাজ্য চৰকাৰে 714 কোটি টকা ঋণ ল’বলৈ সিদ্ধান্ত গ্ৰহণ কৰিছে বুলি মন্ত্ৰী হিমন্ত বিশ্ব শৰ্মাই সংবাদমেলখনত প্ৰকাশ কৰে ৷
