গুৱাহাটী, 11 অক্টোবৰ: মঙলবাৰে মহানগৰীৰ মাৰোৱাৰী হাস্পতালত অনুষ্ঠিত হয় বৃক্ক সংৰোপণ সন্দৰ্ভত সংবাদমেল । উক্ত সংবাদমেলত উপস্থিত থাকে মাৰোৱাৰী হাস্পতালৰ অধীক্ষক ৰোহিত উপাধ্যায়, ভেলোৰৰ পৰা আমন্ত্ৰিত অতিথি ড০ চি কে জেকবকে ধৰি বহু কেইজন অভিজ্ঞ চিকিৎসক । জনসাধাৰণক বৃক্ক বিকল হোৱাৰ কাৰণ, বৃক্ক বিকল হোৱাৰ ফলত সৃষ্টি হোৱা সমস্যা সন্দৰ্ভত অৱগত কৰাৰ উদ্দেশ্যে অনুষ্ঠিত কৰা হয় উক্ত সংবাদমেলখন ।
সংবাদমেলযোগে বৃক্ক বিকলৰ সন্দৰ্ভত মন্তব্য কৰি চিকিৎসক ড০ চি কে জেকবে কয়, " ডায়েবেটিচ আৰু উচ্চ ৰক্তচাপৰ বাবে মানৱ দেহত বৃক্ক বিকল হৈ পৰে । এই ৰোগৰ পৰা নিৰাময়ৰ উপায় সমূহ হৈছে বৃক্ক সংৰোপণ আৰু ডায়েলাইচিছ । বৰ্তমান দেশৰ 250 টা কেন্দ্ৰত প্ৰায় 25 পৰা 30 হাজাৰ পৰ্যন্ত বৃক্ক বিকল ৰোগীৰ দেহত বৃক্ক সংৰোপণ সফলভাৱে সম্পন্ন হৈছে । ইয়াৰোপৰি ধুম্ৰপান অধিক সেৱনৰ ফলতো কম সময়তে বৃক্ক বিকল হোৱাৰ সম্ভাৱনা থাকে ।"
উল্লেখযোগ্য যে, মগজু, হৃদপিণ্ড আদিৰ দৰে বৃক্কও মানৱ দেহৰ বাবে অতি গুৰুত্বপূৰ্ণ অংগ । প্ৰতিজন ব্যক্তিৰে দুটাকৈ বৃক্ক থাকে । বৃক্কই আমাৰ শৰীৰৰ তেজ শোধন কৰি তেজত থকা লৱণৰ গাঢ়তা নিয়ন্ত্ৰণ কৰি ৰখাৰ উপৰিও শৰীৰৰ পৰা বৰ্জিত পদাৰ্থ আৰু অতিৰিক্ত লৱণ প্ৰেচাৱৰ লগত বাহিৰ কৰে । বৃক্ক বিকল হৈ মানুহৰ মৃত্যুও ঘটে ।
উক্ত সংবাদমেল যোগে আয়ুষ্মান ভাৰত কাৰ্ড থকাসকলৰ বাবে বৃক্ক সংৰোপণ তথা ডায়লাইচিছৰ বিনামূলীয়াকৈ চিকিৎসাৰ সুবিধা প্ৰদানৰ কথাও ঘোষণা কৰে মাৰোৱাৰী হাস্পতাল কৰ্তৃপক্ষই ।
