গুৱাহাটী, ২৭ জুলাই: দ্ৰৌপদী মুৰ্মুৱে ৰাষ্ট্ৰপতি হিচাবে কাৰ্যভাৰ গ্ৰহণ কৰিলে যদিও অসমত ৰাষ্ট্ৰপতি নিৰ্বাচনকেন্দ্ৰিক বিতৰ্কৰ অন্ত পৰা নাই । অব্যাহত আছে বিৰোধীৰ বোকা ছটিওৱাৰ ৰাজনীতি । বিশেষকৈ কংগ্ৰেছ আৰু এ আই ইউ ডি এফৰ মাজত অব্যাহত আছে আক্ৰমণ-প্ৰত্যাক্ৰমণ । এ আই ইউ ডি এফৰ অভিযোগ সন্দৰ্ভত পুনৰ প্ৰতিক্ৰিয়া প্ৰকাশ কৰিছে বিৰোধী দলপতি দেবব্ৰত শইকীয়াই (Opposition leader Debabrata Saikia)।
তেওঁ কয়, ‘‘ৰাষ্ট্ৰপতি নিৰ্বাচনত বিৰোধীৰ সমৰ্থিত প্ৰাৰ্থী যশোৱন্ত সিনহাই ২০ টা ভোট লাভ কৰিলে । কংগ্ৰেছ দলৰ নিজাকৈ ২৪ টা ভোট আছিল । এটা কথা নিশ্চিত যে অতি কমেও চাৰিজন বিধায়কে এন ডি এৰ সমৰ্থিত প্ৰাৰ্থী দ্ৰৌপদী মুৰ্মুক ভোট দিছে । এই সংখ্যা বেছি হ'বও পাৰে ।’’ আনহাতে, ৰাষ্ট্ৰপতি নিৰ্বাচনত যশোৱান্ত সিনহা বিৰুদ্ধে দেৱব্ৰত শইকীয়াই স্থিতি লৈ 20 জন বিৰোধীৰ বিধাকক দ্ৰৌপদী মুৰ্মুৰ পক্ষত ভোট দিওৱা বুলি ইফালে এ আই ইউ ডি এফৰ বিধায়ক কৰিমুদ্দিন বৰভূঞাই অনা অভিযোগৰ সন্দৰ্ভতো প্ৰতিক্ৰিয়া প্ৰকাশ কৰে বিৰোধীৰ দলপতিগৰাকীয়ে ৷
শইকীয়াই কয়, ‘‘কৰিমুদ্দিন বৰভূঞাই মিছা কথা কয়, তাৰ প্ৰমাণ আছে । তেওঁৰ বিৰুদ্ধে আদালতত গোচৰ দিয়া হ'ব ’’।
উল্লেখ্য যে, ৰাষ্ট্ৰপতি নিৰ্বাচনত ক্ৰছ ভোটিং(Cross voting in president election) কৰাৰ প্ৰসংগত ফলাফল ঘোষণাৰ পাছৰে পৰা তোলপাৰ লাগি আছে দেশৰ ৰাজনীতিত ৷ অসমৰো কেইবাজনো বিধায়কে ক্ৰছ ভোটিং কৰাৰ অভিযোগ উত্থাপিত হৈছে ৷ এই কথা খোদ প্ৰদেশ কংগ্ৰেছৰ সভাপতিয়েও স্বীকাৰ কৰিছে (Bhupen Bora on cross voting)৷
এই সন্দৰ্ভত ক্ৰছ ভোটিং কৰা অসম কংগ্ৰেছৰ ছজনীয়া বিধায়কৰ তালিকা লৈ মঙলবাৰে দিল্লীলৈ উৰা মাৰিছিল ভূপেন বৰা ৷ প্ৰদেশ কংগ্ৰেছৰ সভাপতিগৰাকীয়ে ‘গাড্ডাৰ’ আখ্যা দিয়া এই ছয় বিধায়কৰ তালিকা কেন্দ্ৰীয় নেতৃত্বৰ হাতত অৰ্পন কৰা কথা আছিল ৷ ইয়াৰ পাছতে বিষয়টোৰ সন্দৰ্ভত কংগ্ৰেছৰ ৰাষ্ট্ৰীয় সাধাৰণ সম্পাদক জীতেন্দ্ৰ সিঙে বুধবাৰে সংবাদমেল সম্বোধন কৰে ৷
ভূপেন বৰাক লগতে লৈ দিল্লীত সংবাদমেল সম্বোধন কৰি কংগ্ৰেছৰ ৰাষ্ট্ৰীয় সম্পাদকগৰাকীয়ে বিশ্বাসঘাটকতা কৰা কংগ্ৰেছৰ বিধায়কসকলৰ বিৰুদ্ধে কঠোৰ ব্যৱস্থা গ্ৰহণ কৰা হ’ব বুলি মন্তব্য কৰে ৷
লগতে পঢ়ক: Cross Voting in President Election: ক্ৰছ ভোটিং কৰাসকলক কঠোৰ সকিয়নী জীতেন্দ্ৰ সিঙৰ
