গুৱাহাটী, ১৮ অক্টোবৰ : অসম কো-অপাৰেটিভ এপেক্স বেংকৰ কোটি কোটি টকাৰ বিত্তীয় কেলেংকাৰীৰ কথা শেহতীয়াকৈ পোহৰলৈ আহিছে ৷ ৰাজেশ বাজাজ নামৰ এজন বিতৰ্কিত ব্যৱসায়ীয়ে ২০.৩০ কোটি টকা অসৎ উপায়েৰে বেংকটোৰ পৰা আদায় কৰি নিয়ে । এই সমগ্ৰ কেলেংকাৰীক লৈ চি এম ভিজিলেন্স নাইবা অৰ্থনৈতিক অপৰাধ অনুসন্ধান শাখাৰ যোগেদি উচ্চ পৰ্যায়ৰ তদন্ত বিচাৰিছে বিৰোধীৰ দলগতি দেৱব্ৰত শইকীয়াই । ইয়াৰোপৰি অভিযোগৰ আঙুলি তুলি বেংকটোৰ পৰিচালন মণ্ডলীৰ বিৰুদ্ধে গোচৰ ৰুজুৰ আহ্বান জনাইছে দেৱব্ৰত শইকীয়াই ৷
বিৰোধী দলপতি শইকীয়াই কয়- “যিহেতু বেংকটোত অসমৰ জনগণৰ কষ্টোপাৰ্জিত ধন জমা থাকে ৷ সেয়ে অসম চৰকাৰে নিজাববীয়াকৈ গোচৰ ৰুজু কৰিব লাগে ৷ বেংকটোৰ পৰিচালন মণ্ডলীৰ বিৰুদ্ধে এটা গোচৰ ৰুজু কৰিব লাগে ৷ যাতে সোধপোচ কৰি দোষীক কৰায়ত্ত কৰিব পৰা যায় ৷ ”
উল্লেখ্য যে বেংকটোৰ অধ্যক্ষৰ দায়িত্বত আছে বিজেপি বিধায়ক বিশ্বজিৎ ফুকন ৷ জালিয়াতিত জড়িত ৰাজেশ বাজাজৰ সৈতে বেংকটোৰ অধ্যক্ষ বিশ্বজিৎ ফুকনৰ ঘনিষ্ঠতাৰ বাবেই ২০ কোটিৰো অধিক ধন উলিয়াই নিবলৈ সক্ষম হ’ল নেকি বুলিও চৰ্চা হোৱাৰ লগতে বাতৰিও পৰিৱেশিত হৈছে ৷ লগতে ইমান বিশাল কেলেংকাৰী পোহৰলৈ অহাৰ পাছতো বেংকটোৰ জালিয়াতিক লৈ কেৱল এজন ব্ৰাঞ্চ মেনেজাৰক নিলম্বন কৰাৰ বাহিৰে কোন পদক্ষেপ নোলোৱাক লৈ উদ্বিগ্নতা প্ৰকাশ কৰিছে দেৱব্ৰত শইকীয়াই ৷
