গুৱাহাটী, 14 জুন: সোমবাৰ অৰ্থাৎ কাইলৈৰ পৰা দুয়ো পালি প্ৰতিষেধক লোৱা চৰকাৰী কৰ্মচাৰীহে আহিব পাৰিব কাৰ্যালয়লৈ । ক'ভিড পৰিস্থিতিৰ বাবে ৫০ শতাংশ কৰ্মচাৰীৰ দ্বাৰাহে চৰকাৰী কাৰ্যালয়ৰ কাম-কাজ চলি আহিছিল যদিও দেওবাৰে সাধাৰণ প্ৰশাসন বিভাগৰ আয়ুক্ত সচিব এম এছ মণিভন্ননে জাৰি কৰে এক নতুন নিৰ্দেশনা ।
সেই অনুসৰি যিসকল কৰ্মচাৰীয়ে ইতিমধ্যে দুয়ো পালি প্ৰতিষেধক গ্ৰহণ কৰিছে, তেওঁলোকক কাইলৈৰ পৰা নিয়মীয়াকৈ কাৰ্যালয়লৈ আহিবলৈ নিৰ্দেশ দিয়া হৈছে ৷ ইপিনে, ১৫ জুনত ৰাজ্য চৰকাৰে জাৰি কৰিব কেতবোৰ নতুন নীতি নিৰ্দেশনা ।
মঙলবাৰে ঘোষণা হ’বলগীয়া এই নতুন (SOP) এছঅ'পি অনুসৰি পাঁচখন জিলাক বাদ দি বাকী সকলোতে সান্ধ্য আইনৰ ক্ষেত্ৰত কেতবোৰ শিথিলতা অনা হ’ব । ৰাজধানী চহৰ গুৱাহাটীত বৰ্তমানে দিনৰ ১ বজাৰ পৰা সান্ধ্য আইন চলি আছে যদিও এই সময়সীমাৰ সাল-সলনি ঘটাই বিয়লি ৪ বজাৰ পৰা সান্ধ্য আইনৰ ব্যৱস্থা কৰাৰ সম্ভাৱনা আছে ।
আনহাতে আন্তঃজিলা যাতায়াত ব্যৱস্থা সন্দৰ্ভত ১৫ জুনত জাৰি কৰিবলগীয়া এছঅ'পি অনুসৰি পুনৰ মুকলি কৰাৰ সম্ভাৱনা খুবে কম আছে ।
