বাইহাটা, 10 জুলাই: ড্ৰাগছে চানি ধৰিছে তীৰ্থ নগৰী হাজো । ড্ৰাগছৰ বিৰুদ্ধে হাজোত আৰক্ষীয়ে ধাৰাবাহিক অভিযান অব্যাহত ৰখাৰ সমান্তৰালভাবে ড্ৰাগছ সৰবৰাহকাৰীয়ে অৱলম্বন কৰিছে ন ন কৌশল ৷ এনে সময়তে হাজো চহৰৰ মাজমজিয়াত দেখা গ’ল ড্ৰাগছৰ ভয়াবহতাৰ ভয়ংকৰ ছবি ৷
হাজোৰ পাখামেলা চ’কৰ ট্ৰেফিক পইণ্টত শুকুৰবাৰে এজন ড্ৰাগছ আসক্ত যুৱকক নিচাসক্ত অৱস্থাত পৰি থকা দেখা যায় ৷ হাজোৰ পাখামেলা চ’কৰ স্থানীয় ৰাইজে ড্ৰাগছ সবৰাহকাৰী যুৱকজনক কৰায়ত্ব কৰি ড্ৰাগছ ভৰ্তি কন্টেইনাৰসহ চিৰিঞ্জ উদ্ধাৰ কৰে ৷ পেলনীয়া লোহা, টিন, প্লাষ্টিকৰ সামগ্ৰী ক্ৰয় কৰা যুৱকজনে দীৰ্ঘদিন ধৰি ড্ৰাগছৰ ব্যৱসায় কৰাৰ অভিযোগ কৰিছে হাজোৰ স্থানীয় ৰাইজে ।
উল্লেখ্য যে ৰাজ্যৰ বিভিন্ন স্থানত ডেলিভাৰী বয় ড্ৰাগছ সৰবৰাহত জড়িত হোৱাৰ পাচত এইবাৰ পেলনীয়া সামগ্ৰী ক্ৰয় কৰা যুৱক ড্ৰাগছসহ আটক হোৱাত চাঞ্চল্যৰ সৃষ্টি হৈছে হাজোত । হাজো আৰক্ষী ঘটনাস্থলীত উপস্থিত হৈ ড্ৰাগছ আসক্ত তথা ড্ৰাগছ সৰবৰাহ কৰা যুৱকজনক আটক কৰাৰ লগতে পেলনীয়া সামগ্ৰী ক্ৰয় কৰা বাহনখন জব্দ কৰে ।
হাজোৰ শনিয়াদিৰ কুখ্যাত ড্ৰাগছ মাফিয়া লম্বু ওৰফে জিয়াওৰ ৰহমানৰ ছাত্ৰছায়াত হাজোত ড্ৰাগছৰ বৃহৎ বজাৰ চলি থকাৰ অভিযোগ উত্থাপিত হৈছে । অভিযোগ অনুসৰি, লম্বুৱে পঞ্চাশ জনতকৈ অধিক ড্ৰাগছ ব্যৱসায়ীৰূপী এজেন্টক নিয়োগ কৰি হাজো আৰক্ষীৰ চকুৰ সন্মুখতে চলাই গৈছে অবাধ ব্যৱসায় ।
লগতে পঢ়ক : পাঠাক লৈ আৰক্ষীৰ চৰজমিন তদন্ত
