গুৱাহাটী, ২৫ অক্টোবৰ : গুৱাহাটীবাসীয়ে হয়তো আগন্তুক কেইটামান দিনলৈ লাভ নকৰিব উবেৰ, অ’লা বা ৰেপিড'ৰ সেৱা । ইতিমধ্যে এই কোম্পানীকেইটাৰ অধীনত বাহন চলাচল কৰি অহা চালকসকলে গ্ৰহণ কৰিছে এক আন্দোলনৰ কাৰ্যসূচী । যাৰ ফলত গুৱাহাটীত সাময়িকভাৱে হ'লেও এই সেৱাসমূহ বন্ধ হোৱাটো প্ৰায় নিশ্চিত হৈ পৰিছে । সোমবাৰে অ’লা, উবেৰ আৰু ৰেপিড'ৰ চালকসকলে গণেশগুৰি উৰণীয়া সেঁতুৰ তলত এক প্ৰতিবাদী কাৰ্যসূচী ৰূপায়ণ কৰে ।
তেওঁলোকৰ দাবী পেট্ৰ'ল-ডিজেলৰ মূল্য আকাশচুম্বী হোৱা স্বত্বেও কোম্পানীয়ে বৃদ্ধি কৰা নাই অ’লা, উবেৰ বা ৰেপিড'ৰ ভাড়া । সেয়ে, যাত্ৰীৰ সৈতেও বহু সময়ত চালকসকলে বাক-বিতণ্ডাত লিপ্ত হ'বলগীয়া হয় । গতিকে ভাড়া বৃদ্ধি নকৰালৈকে অ’লা, উবেৰ, ৰেপিড' চালকসকলে সেৱা বন্ধ ৰাখিবলৈকো সিদ্ধান্ত গ্ৰহণ কৰে ।
আনহাতে, উক্ত কোম্পানীসমূহ একাংশ সন্দেহজনক নাগৰিকেৰেও ভৰি পৰিছে বুলি গুৰুতৰ অভিযোগ তোলে প্ৰতিবাদকাৰীসকলে । চালকসকলৰ এই প্ৰতিবাদী কাৰ্যসূচীৰ ফলত মহানগৰীবাসীয়ে অসুবিধাৰ সন্মুখীন হ'ব । কিয়নো, বহু লোকে সাধাৰণতে মহানগৰীত উবেৰ, অ’লা অথবা ৰেপিড'ৰ অধীনত চলা বাহনেৰে যাতায়াত কৰে ।
লগতে পঢ়ক : ভ্ৰাম্যমান থিয়েটাৰৰ বিৰুদ্ধাচৰণ একাংশ প্ৰযোজকৰ !
