গুৱাহাটী, ১৯ জুন: ৰাজ্যত ক'ভিড আক্ৰান্তৰ সংখ্যা ক্ৰমাৎ কিছু হ্ৰাস পাইছে যদিও এতিয়াও নিয়ন্ত্ৰণ হোৱা নাই ৰাজ্যৰ ক’ভিড পৰিস্থিতি । দৈনিক হাজাৰ হাজাৰ লোক কৰ'ণাৰ কৱলত পৰিছে ৷ ৰাজ্যৰ ক'ভিড পৰিস্থিতি এতিয়াও শংকামুক্ত নোহোৱাৰ বাবেই শিক্ষাৰ্থীৰ জীৱনৰ বাবে অত্যন্ত গুৰুত্বপূৰ্ণ হাইস্কুল শিক্ষান্ত পৰীক্ষা(HSLC) আৰু উচ্চতৰ মাধ্যমিক চূড়ান্ত পৰীক্ষা(HSSLC) বাতিল কৰিছে ৰাজ্য চৰকাৰে । ৰাজ্যৰ ক'ভিড পৰিস্থিতি এতিয়াও পৰীক্ষা অনুষ্ঠিত কৰিব পৰাকৈ অনুকূল হোৱা নাই ।
উল্লেখ্য যে, বিগত ২৪ ঘণ্টাত ৰাজ্যৰ ১,৭১,৯২০ গৰাকী লোকৰ ক'ভিড টেষ্ট কৰা হৈছিল আৰু ইয়াৰে ৩,৭০৬ গৰাকীৰ দেহত ক'ভিডৰ উপস্থিতি ধৰা পৰে। এই হিচাপত আক্ৰান্তৰ হাৰ হৈছে ২.১৬ শতাংশ । লক্ষণীয় বিষয় যে, বিগত কেইবাদিন ধৰি আক্ৰান্তৰ হাৰ ২ ৰ পৰা ৩ শতাংশৰ ভিতৰত উঠা-নমা কৰি আছে ৷
অসমত নতুনকৈ ধৰা পৰা ৩,৭০৬ গৰাকী ক'ভিড ৰোগীৰ ভিতৰত ২৬২ গৰাকী শোণিতপুৰৰ, ২৪০ গৰাকী গোলাঘাটৰ, ২৩৪ গৰাকী ডিব্ৰুগড়ৰ আৰু ২১০ গৰাকী তিনিচুকীয়াৰ । ৰাজ্যত এতিয়ালৈকে কৰ'ণাত আক্ৰান্ত হোৱা লোকৰ সংখ্যা হৈছে ৪,৭৭,১৫৯ গৰাকী । আনহাতে বিগত ২৪ ঘণ্টাত কৰ'ণাৰ পৰা আৰোগ্য লাভ কৰিছে ৰাজ্যৰ ৪,৮৩৫ গৰাকী লোকে ।
এই সময়ছোৱাত সুস্থতাৰ হাৰ হৈছে ৯১.৩৮ শতাংশ । ইফালে বিগত ২৪ ঘণ্টাত অসমত কৰ'ণাত মৃত্যু হৈছে ৩৩ গৰাকী লোকৰ । এতিয়ালৈকে কৰ'ণাত মৃত্যু হৈছে ৪,১৩৮ গৰাকী লোকৰ । মৃত্যুৰ হাৰ হৈছে ০.৮৭ শতাংশ । বৰ্ত্তমান ৰাজ্যত সক্ৰিয় হৈ থকা ক'ভিড ৰোগীৰ সংখ্যা হৈছে ৩৫,৬৩১ গৰাকী ।
সম্পূৰ্ণ লকডাউন (Complete lockdown) নিদিয়াকৈ সময়সীমা বান্ধি দিয়া সান্ধ্য আইন(curfew)ৰ যোগেদি ৰাজ্য চৰকাৰে ক'ভিড পৰিস্থিতি নিয়ন্ত্ৰণৰ চেষ্টা কৰি আহিছে । আনহাতে পৰিস্থিতিৰ প্ৰতি লক্ষ্য ৰাখি সান্ধ্য আইন ক্ৰমাৎ শিথিল কৰি অনা হৈছে । ৰাজ্যখনত শেহতীয়াকৈ ক’ভিড পৰিস্থিতিৰ ভালেখিনি উন্নতি হৈছে যদিও বহু কেইখন জিলাত এতিয়াও পৰিস্থিতিৰ উন্নত হোৱা নাই । যাৰ বাবে সেই জিলাসমূহত এতিয়াও অন্য জিলাৰ তুলনাত নীতি-নিৰ্দেশনা শিথিল কৰা হোৱা নাই ।
ইফালে, ৰাজ্যজুৰি অব্যাহত আছে ভেকচিন প্ৰদানৰ (vaccination) কাৰ্যসূচী । বিগত ২৪ ঘণ্টাত ৰাজ্যৰ ১,১৬,২৩৭ গৰাকী লোকক ভেকচিন প্ৰদান কৰা হয় । আনহাতে এতিয়ালৈকে ৰাজ্যৰ ৫২,০৮,৮৫১ গৰাকী লোকক ভেকচিন প্ৰদান কৰা হৈছে । ইয়াৰে ৪১,৭৮,২১৩ গৰাকী লোকক প্ৰথম পালি আৰু ১০,৩০,৬৩৮ গৰাকী লোকক দ্বিতীয় পালি প্ৰদান কৰা হৈছে ।
ইফালে, চৰকাৰী তথ্য মতে বৰ্ত্তমান ৰাজ্যত মজুত আছে ৫,১৯,৮৬০ পালি ভেকচিন । ইয়াৰে ২,১৩,৮৮০ পালি ৪৫ বছৰ ঊৰ্দ্ধৰ লোকৰ বাবে আৰু ৩,০৫,৯৮০ পালি ১৮ বছৰৰ পৰা ৪৪ বছৰ বয়সৰ লোকৰ বাবে । উল্লেখ্য যে, ২১ জুনৰ পৰা ৰাজ্যজুৰি দৈনিক তিনি লাখ লোকক ভেকচিন প্ৰদানৰ লক্ষ্য নিৰ্ধাৰণ কৰিছে ৰাজ্য চৰকাৰে ।
লগতে পঢ়ক : ‘উড়ন্ত শিখ’ মিলখা সিঙৰ জীৱনৰ দৌৰ
