NRC বাতিল কৰক,বিজেপি গ’ বেক ধ্বনিৰে উত্তাল মহানগৰী

এন আৰ চি বাতিলৰ দাবীত ৰাজপথত আন্তঃৰাষ্ট্ৰীয় বিশ্ব হিন্দু পৰিষদ আৰু বজৰং দল । ১৯৭১ নহয় ১৯৫১ চনৰ ভিত্তিত পুনৰ এন আৰ চি গঠনৰ দাবী সংগঠন কেইটাৰ । হিন্দু শৰণাৰ্থী সকলৰ নাম এন আৰ চিত অন্তৰ্ভুক্ত কৰাৰ দাবী ৷

গুৱাহাটী, 3 ছেপ্টেম্বৰঃ ৰাষ্ট্ৰীয় নাগৰিকপঞ্জীৰ চূড়ান্ত তালিকাখনকলৈ অসন্তুষ্টি প্ৰকাশ কৰি মঙলবাৰে আন্তঃৰাষ্ট্ৰীয় বিশ্ব হিন্দু পৰিষদ আৰু বজৰং দলে মহানগৰীত এক প্ৰতিবাদী কাৰ্যসূচী গ্ৰহণ কৰে। মহানগৰীৰ আমবাৰীত এক প্ৰতিবাদী সমদল উলিয়াই আন্তঃৰাষ্ট্ৰীয় বিশ্ব হিন্দু পৰিষদ আৰু বজৰং দলৰ সদস্য সকলে এখন শুদ্ধ এন আৰ চিৰ দাবী জনায় ।

শুদ্ধ এন আৰ চি প্ৰকাশ কৰিব নোৱাৰাৰ অভিযোগ উত্থাপন কৰি শাসকীয় বিজেপি দলক তীব্ৰ সমালোচনা কৰে দল দুটাই ৷ বিজেপি চৰকাৰ মূর্দাবাদ,বিজেপি চৰকাৰ গ’বেক,বিজেপি হিন্দু বিৰোধী দল শ্ল'গানেৰে উত্তাল কৰি তোলে ৰাজপথ। প্ৰতিবাদকাৰী সকলে ১৯৭১ চনৰ বিপৰীতে ১৯৫১ চনৰ ভিত্তিত ৰাজ্যত পুনৰ এন আৰ চি গঠনৰ প্ৰক্ৰিয়া আৰম্ভ কৰিবলৈ চৰকাৰক দাবী জনায়। ৰাজ্যত শৰণাৰ্থী হিচাপে থকা হিন্দু সকলৰ নাম এন আৰ চিত অন্তৰ্ভুক্ত কৰাৰো দাবী জনায় জিলা উপায়ুক্তলৈ এখন স্মাৰকপত্ৰ প্ৰদান কৰে সংগঠনটোৱে। ইয়াৰ লগতে অহা ৪ আৰু ৫ ছেপ্টেম্বৰত ৰাজ্যৰ প্ৰতিখন জিলাতে প্ৰতিবাদী কাৰ্যসূচী গ্ৰহণ কৰাৰ লগতে ৬ ছেপ্টেম্বৰত অসম বন্ধৰ আহ্বান জনাইছে সংগঠনটোৱে ।