গুৱাহাটী, 20 আগষ্ট: নিখিল ভাৰত কংগ্ৰেছ কমিটিৰ নৱ গঠিত ৱৰ্কিং কমিটীত অন্তৰ্ভুক্ত কৰা হৈছে অসমৰ সাংসদ গৌৰৱ গগৈক ৷ ভাৰতীয় জাতীয় কংগ্ৰেছ দলৰ প্ৰধান নীতি-নিৰ্ধাৰণ কমিটি হিচাবে পৰিগণিত হোৱা কংগ্ৰেছ ৱৰ্কিং কমিটি চমুকৈ চি ডব্লিউ চিখন দেওবাৰে দলৰ সভাপতি মল্লিকাজুৰ্ন খাৰ্গেই গঠন কৰি ঘোষণা কৰে ৷ অসমৰ পৰা একমাত্ৰ গৌৰৱ গগৈক কংগ্ৰেছ ৱৰ্কিং কমিটিৰ সদস্য ৰূপে অন্তৰ্ভুক্ত কৰা হৈছে ৷
নিখিল ভাৰত কংগ্ৰেছ কমিটিৰ সাধাৰণ সম্পাদক কে চি বেনুগোপাল স্বাক্ষৰিত বিবৃত্তি যোগে এই কথা জনোৱা হয় ৷ কংগ্ৰেছ ৱৰ্কিং কমিটিত মুঠ 39 গৰাকী সদস্য আছে ৷ কংগ্ৰেছ দলৰ সৰ্বোচ্চ কমিটিখনত অসমৰ সাংসদগৰাকীয়ে স্থান পোৱাক লৈ স্বাভাৱিকতেই অসমৰ কংগ্ৰেছ কৰ্মীসকল উৎফুল্লিত হৈ পৰিছে ৷
উল্লেখ্য যে কংগ্ৰেছ সভাপতি মল্লিকাৰ্জুন খাৰ্গেই দেওবাৰে কংগ্ৰেছ ৱৰ্কিং কমিটি পুনৰ গঠন কৰিছে ৷ এই কমিটিখনত নতুন সদস্য হিচাবে কংগ্ৰেছ নেতা শচীন পাইলট, শশী থাৰুৰ, পঞ্জাৱৰ প্ৰাক্তন মুখ্যমন্ত্ৰী চৰণজিৎ সিং চান্নী, আনন্দ শৰ্মা আৰু অসমৰ গৌৰৱ গগৈক অন্তৰ্ভুক্ত কৰা হৈছে ৷
তদুপৰি নাছিৰ হুছেইন, অলকা লাম্বা, সুপ্ৰিয়া শ্ৰীনেট, প্ৰাণিতি শিন্দে, পৱন খেৰা, গণেশ গোদিয়াল, যশোমতী ঠাকুৰকে ধৰি আন নেতাসকলকো কংগ্ৰেছ ৱৰ্কিং কমিটিৰ তালিকাত অন্তৰ্ভুক্ত কৰা হৈছে ৷
লক্ষণীয় বিষয় যে প্ৰাক্তন প্ৰধানমন্ত্ৰী ৰাজীৱ গান্ধীৰ জন্ম জয়ন্তীত কংগ্ৰেছে ইয়াৰ ৱৰ্কিং কমিটিৰ নতুন সদস্যসকলৰ নাম ঘোষণা কৰিছে ৷ উল্লেখ্য যে বিগত বছৰ কংগ্ৰেছৰ সভাপতি নিৰ্বাচনত মল্লিকাৰ্জুন খাৰ্গেৰ বিৰুদ্ধে যুঁজ দিয়া শশী থাৰুৰকো কমিটিখনত অন্তৰ্ভুক্ত কৰা হৈছে ৷
জানিব পৰা মতে কংগ্ৰেছ ৱৰ্কিং কমিটিত অন্তৰ্ভুক্ত কৰা মুঠ 39 গৰাকী সদস্যৰ ভিতৰত মাত্ৰ তিনিজন সদস্যৰ বয়স 50 বছৰৰ তলৰ ৷
আনহাতে কমিটিখনত পাৰমানেণ্ট ইনভাইটি আৰু ইনচাৰ্জ হিচাবে আছে 32 গৰাকী আৰু বিশেষ আমন্ত্ৰিত হিচাবে আছে 9 গৰাকী ৷ উল্লেখ্য যে সংসদত সদায়ে বিশেষভাৱে সৰব ভূমিকা পালন কৰি অহা অসমৰ সাংসদ গৌৰৱ গগৈয়ে শেহতীয়াকৈ মণিপুৰৰ প্ৰসংগক লৈ সদনত প্ৰধানমন্ত্ৰী আৰু বিজেপি চৰকাৰক সমালোচনাৰে থকা-সৰকা কৰিছিল ৷
তেওঁৰ সেই সমালোচনাই দেশবাসীৰ দৃষ্টি আকৰ্ষণ কৰাৰ লগতে ৰাজনৈতিক মহলত ব্যাপক চৰ্চা লাভ কৰিছিল ৷ অৱশেষত তেওঁ কংগ্ৰেছৰ সৰ্বোচ্চ কমিটিত স্থান লাভ কৰিবলৈ সক্ষম হ'ল ৷
