গুৱাহাটী,12 মে’ : বিশিষ্ট সাহিত্যিক তথা যশস্বী সাংবাদিক হোমেন বৰগোহাঞিৰ মৃত্যুত শোকস্তব্ধ হৈ পৰিছে সমগ্ৰ ৰাজ্য । বুধবাৰে পুৱা 6.58 বজাত গুৱাহাটীৰ জিএনআৰচি হাস্পতালত শেষ নিশ্বাস ত্যাগ কৰা সাহিত্যিকগৰাকীৰ প্ৰতি শেষ শ্ৰদ্ধা নিবেদন কৰিবলৈ হাস্পতাল চৌহদত সমাগম হয় অগনণ গুণমুগ্ধৰ ।
জিএনআৰচিৰ পৰা তেওঁৰ নশ্বৰ দেহ প্ৰথমে হেঙেৰাবাৰীস্থিত বাসগৃহলৈ নিয়া হয় । তাৰ পাচত কলাক্ষেত্ৰকে ধৰি নিয়মীয়া বাৰ্তা, আমাৰ অসম, অসমীয়া প্ৰতিদিন আৰু অসম সাহিত্য সভাৰ কাৰ্যালয়লৈ নিয়াৰ ব্যৱস্থা কৰা হয় ।
পৰিয়ালৰ লোকে জনোৱা মতে, নৱগ্ৰহ শ্মশানত তেওঁৰ শেষকৃত সম্পন্ন কৰা হ’ব । সংবাদ মাধ্যমৰ আগত পুত্ৰ অনিন্দ্ৰ বৰগোহাঁই, বিশিষ্ট শিক্ষাবিদ অমৰজ্যোতি চৌধুৰী আৰু বিশিষ্ট শিল্পী-চিকিৎসক ডাঃ অঞ্জনজ্যোতি চৌধুৰীয়ে নিজৰ প্ৰতিক্ৰিয়া ব্যক্ত কৰে ।
হোমেন বৰগোহাঞিৰ মৃত্যু অসমৰ সাহিত্য জগতৰ লগতে সাংবাদিকতাৰ ক্ষেত্ৰখনৰ বাবে একঅপূৰণীয় ক্ষতি । ৰাজ্যিক মৰ্য্যাদাৰে শেষকৃত সম্পন্ন কৰা হ’ব বিশিষ্ট সাহিত্যিকগৰাকীৰ ৷
লগতে পঢ়ক : ৰাষ্ট্ৰীয় মৰ্যাদাৰে হ’ব হোমেন বৰগোহাঞিৰ অন্ত্যেষ্টিক্ৰিয়া
