গুৱাহাটী,১৩ এপ্ৰিল: কংগ্ৰেছ নেতৃত্বৰ মহাজোঁটৰ দহটাকৈ দলৰ প্ৰতিনিধিয়ে মঙলবাৰে দিছপুৰৰ জনতা ভৱনত অতিৰিক্ত মুখ্য নিৰ্বাচনী বিষয়াক সাক্ষাৎ কৰি দুখন স্মাৰক পত্র প্ৰদান কৰে । এখন স্মাৰক পত্র বিষয়া গৰাকীৰ জৰিয়তে দেশৰ মুখ্য নিৰ্বাচন আয়ুক্তলৈ প্ৰেৰণ কৰে ।
স্মাৰক পত্রত মহাজোঁটে নিকা আৰু স্বচ্ছতাৰে ভোট গণনা প্ৰক্ৰিয়া অনুষ্ঠিত কৰাৰ বাবে ছয়টা পইণ্ট উল্লেখ কৰে । স্মাৰক পত্র প্ৰদান কৰাৰ পাছত সংবাদ মাধ্যমৰ আগত প্ৰদেশ কংগ্ৰেছৰ সভাপতি ৰিপুণ বৰাই কয় যে ভোট গণনা প্ৰক্ৰিয়াত নিয়োজিত হোৱা চৰকাৰী বিষয়াসকলৰ তালিকা তেওঁলোকক দিব লাগে । সেইদৰে ষ্ট্ৰং ৰুমৰ পৰা ভোট গণনা কেন্দ্ৰলৈ ইভিএমসমূহ অনাৰ সমস্ত প্ৰক্ৰিয়াৰ ভিডিঅ' ৰেকৰ্ডিং কৰিব লাগে ।
লগতে ভোট গণনাৰ সমস্ত প্ৰক্ৰিয়াৰো ভিডিঅ' ৰেকৰ্ডিঙৰ ব্যৱস্থা কৰিব লাগে । আনহাতে ষ্ট্ৰং ৰুম খোলাৰ সময়ৰ পৰা ভোট গণনা কেন্দ্ৰলৈ নিয়ালৈ প্ৰতিগৰাকী প্ৰাৰ্থীৰ এজেণ্টক থকাৰ সুবিধা কৰি দিব লাগে । সেইদৰে ইভিএম গণনাৰ পূৰ্বে পোষ্টেল বেলেটৰ গণনা কৰাৰ বাবেও কংগ্ৰেছে দাবী জনাইছে । লগতে পোষ্টেল বেলেটৰ সমস্ত তথ্য দিয়াৰ বাবে দাবী জনাইছে কংগ্ৰেছ দলে ।
মহাজোঁটৰ প্ৰতিনিধি দলটোত সাংসদ প্ৰদ্যুৎ বৰদলৈ, বিপিএফৰ খাম্ফা বৰগয়াৰী, আঞ্চলিক গণ মৰ্চাৰ মনজিৎ মহন্তকে ধৰি আন অংশীদাৰ দলৰ নেতাসকল আছিল ।
লগতে পঢ়ক: কাইলৈ গৰু বিহু
