গুৱাহাটী,10 ডিচেম্বৰ: কৰ’ণা-পক্ষীজ্বৰৰ মাজতেই ৰাজ্যত চলিছে ভোগালীক আদৰাৰ প্ৰস্তুতি ৷ সাতামপুৰুষীয়া পৰম্পৰা ৰক্ষা কৰিবলৈ সকলো প্ৰকাৰে প্ৰস্তুত হৈছে ৰাজ্যৰ অন্যান্য প্ৰান্তৰ লোকসকলৰ লগতে মহানাগৰিকসকলো । যান্ত্ৰিকতাৰ ধামখুমীয়াত মহানগৰীত ক্ৰমাৎ বিলুপ্ত হ'বলৈ ধৰা ভোগালীৰ পৰম্পৰা, ৰীতি-নীতি জীয়াই ৰখাৰ প্ৰয়াস কৰিছে আশীৰ দশকৰ মিষ্টাৰ অসম খ্যাত বাবুল চেতিয়াই । ভোগালীৰ পৰম্পৰা ৰক্ষাৰ প্ৰতি লক্ষ্য ৰাখি মহানগৰবাসীৰ সুবিধা হোৱাকৈ বিক্ৰীৰ বাবে চেতিয়াই প্ৰস্তুত কৰিছে মেজি ।
মহানগৰীৰ উলুবাৰী নাৰ্চাৰী তিনিআলিৰ 'সতেজ অসম' নামৰ স্বেচ্ছাসেৱী সংস্থাৰ বিপনীখনত উপলব্ধ হৈছে মহানাগৰিকৰ বাবে একপ্ৰকাৰ দুৰ্লভ সামগ্ৰী হিচাপে পৰিচিত এই মেজিসমূহ । প্ৰতিটো মেজি 900-2000 টকাৰ দৰত বিক্ৰী কৰা হৈছে ৷ উক্ত মেজিসমূহ প্ৰয়োজনত গ্ৰাহকৰ পৰা অৰ্ডাৰ লৈ হোম ডেলিভাৰী কৰাৰ সুবিধাও উপলব্ধ কৰিছে চেতিয়াই । চেতিয়াৰ এই প্ৰচেষ্টাই এইবাৰ মহানাগৰিকসকলক সহজে দিব পাৰিব ভোগালীৰ সুকীয়া অনুভূতি ৷
লগতে চাওকঃ দুদিনীয়া ভ্ৰমণসূচীৰে অসমলৈ আহিব নিৰ্বাচনী আয়োগৰ প্ৰতিনিধিৰ দল
