লুৰীণ জ্যোতি গগৈৰ প্ৰতিক্ৰিয়া: আদানীক এই সাহস কোনে দিলে ?

শেহতীয়াকৈ আদানী গ্ৰুপে লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমান বন্দৰটোত নিজৰ আধিপত্য বিস্তাৰৰ বাবে পদক্ষেপ গ্ৰহণ কৰাৰ সময়তে এটা বিজ্ঞাপনক লৈ ব্যাপক প্ৰতিক্ৰিয়াৰ সৃষ্টি হৈছে । বিজ্ঞাপনটোত গোপীনাথ বৰদলৈৰ সলনি তাৰ ঠাইত 'আদানি গুৱাহাটী ইণ্টাৰনেচনেল এয়াৰপ’ৰ্ট' লিখা হৈছে । যাক লৈ সৰৱ হৈ পৰিছে বিভিন্ন দল-সংগঠন । এই সন্দৰ্ভত প্ৰতিক্ৰিয়া প্ৰকাশ কৰিলে এজেপিৰ সভাপতি লুৰিণজ্যোতি গগৈয়ে ।

গুৱাহাটী,১৮ আগষ্ট: অসমবাসীৰ আবেগ জড়িত হৈ থকা গুৱাহাটীৰ লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমান বন্দৰটো নৰেন্দ্ৰ মোডী চৰকাৰে ৰাজ্যবাসীৰ ব্যাপক প্ৰতিবাদৰ পাছতো আদানী গ্ৰুপক ৫০ বছৰৰ বাবে লীজত দিলে । শেহতীয়াকৈ আদানী গ্ৰুপে বিমান বন্দৰটোত নিজৰ আধিপত্য বিস্তাৰৰ বাবে পদক্ষেপ গ্ৰহণ কৰাৰ সময়তে এটা বিজ্ঞাপনকলৈ ব্যাপক প্ৰতিক্ৰিয়াৰ সৃষ্টি হৈছে ।

বিজ্ঞাপনটোত গোপীনাথ বৰদলৈৰ সলনি তাৰ ঠাইত 'আদানি গুৱাহাটী ইণ্টাৰনেচনেল এয়াৰপ’ৰ্ট' লিখা হৈছে । এই বিজ্ঞাপন দি আদানি গ্ৰুপে বুজাই দিছে যে বিমান বন্দৰটো তেওঁলোকৰ ব্যক্তিগত সম্পত্তি স্বৰূপ হৈ পৰিছে । আদানি গ্ৰুপে দিয়া বিজ্ঞাপনটোত অতি কৌশলেৰে ন'ন এৰ’নটিকেল সেৱাৰ বাবে নিবিদা আহ্বান কৰি প্ৰথমতেই ডাঙৰকৈ লিখা হৈছে 'আদানি গুৱাহাটী ইণ্টাৰনেচনেল এয়াৰপ’ৰ্ট লিমিটেড'।

ইয়াৰ দ্বাৰা আদানি গ্ৰুপে এই কথাৰ ইংগিত দিলে নেকি যে গোপীনাথ বৰদলৈৰ নাম মোহাৰি প্ৰয়োজনত তেওঁলোকে তাত আদানি বিমান বন্দৰ বুলি হৰ্ডিং, বেনাৰো আঁৰিব । এটা সৰু বিজ্ঞাপনৰ জৰিয়তে বহু ডাঙৰ কথাৰেই ইংগিত দিলে ।

লগতে পঢ়ক: AJP ৰ গণস্বাক্ষৰ অভিযানত আৰক্ষীৰ বাধা

এই বিজ্ঞাপনটোকলৈয়ে সমগ্ৰ ৰাজ্যজুৰি ব্যাপক প্ৰতিক্ৰিয়াৰ সৃষ্টি হৈছে । সামাজিক মাধ্যমতো বিষয়টো বিশেষভাৱে চৰ্চিত হৈছে। বিজ্ঞাপনটোক লৈ প্ৰতিক্ৰিয়া প্ৰকাশ কৰিছে অসম জাতীয় পৰিষদৰ সভাপতি লুৰীণ জ্যোতি গগৈয়ে ।

উল্লেখ যে বৰঝাৰৰ গোপীনাথ বৰদলৈ আন্তৰ্জাতিক বিমান বন্দৰ আদানী গ্ৰুপক গতোৱাৰ সিদ্ধান্ত প্ৰত্যাহাৰ কৰাৰ দাবীত অসম জাতীয় পৰিষদে ৯ আগষ্টৰ পৰা সপ্তাহজোৰা গণ-স্বাক্ষৰ অভিযান অনুষ্ঠিত কৰিছিল । বৰঝাৰৰ বিমান বন্দৰ আদানী গ্ৰুপক হস্তান্তৰ কৰিবলৈ দিয়া নহ'ব বুলি হুংকাৰ দিছিল সভাপতি লুৰীণ জ্যোতি গগৈয়ে ।

বিজ্ঞাপনটো সন্দৰ্ভত প্ৰতিক্ৰিয়া প্ৰকাশ কৰি লুৰীণ জ্যোতি গগৈয়ে কয়, বিজ্ঞাপনত আদানিৰ নাম আহি গৈছে । ভাৰতৰত্ন লোকপ্ৰিয় গোপীনাথ বৰদলৈ এতিয়া অসম চৰকাৰৰ দৃষ্টিত অস্পৃশ্য হৈ পৰিল । তেওঁলোকৰ বাবে বুকুৰ আপোন হৈ পৰিছে আদানি আৰু আম্বানী ।

"সেইবাবে এই বিমান বন্দৰ আদানিক দি দিছে আৰু আদানি গ্ৰুপে নাম সলনি কৰি এনেদৰে বিজ্ঞাপন দিবলৈ সাহস কৰিছে । ইয়াৰ দ্বাৰা আমাৰ স্বাভিমানত আঘাত লাগিছে আৰু ইয়াৰ বিৰুদ্ধে প্ৰতিবাদ কৰি আহিছো আৰু আগলৈয়ো কৰি যাম ।" এইদৰে কয় লুৰীণ জ্যোতি গগৈয়ে ৷

অসমৰ ৰাইজৰ ইয়াৰ বিৰুদ্ধে ওলাই আহিবলৈ তথা সংগ্ৰাম অব্যাহত ৰাখিবলৈ আহ্বান জনাই লুৰীণ জ্যোতি গগৈয়ে লগতে কয়, অসমৰ মাটিত আদানিৰ নামত বিমান বন্দৰ হ'বলৈ দিয়া নহ'ব । ইয়াৰ বিৰুদ্ধে প্ৰতিবাদ চলিছিল আৰু চলিব ।

লগতে পঢ়ক: এজেপিৰ গণ স্বাক্ষৰ : আদানী গ্ৰুপে লুণ্ঠন চলাব বৰঝাৰত