গুৱাহাটী, ৯ মার্চ: সোমবাৰে আন্তর্জাতিক নাৰী দিৱস উপলক্ষে অসম লেখিকা সংস্থাই গুৱাহাটীৰ আমবাৰীস্থিত প্ৰেছ ক্লাবত এক গাম্ভীর্যপূর্ণ অনুষ্ঠানৰ আয়োজন কৰে । এই অনুষ্ঠানতে মাজুলীৰ কমাৰগাঁও নিবাসী বিশিষ্ট কণ্ঠশিল্পী, সত্ৰীয়া সংগীত বিশাৰদ, শিক্ষয়িত্ৰী দেৱযানী দত্ত কলিতাক অসম লেখিকা সংস্থাই ‘আই পদ্মপ্রিয়া’ বঁটাৰে সন্মানিত কৰে ।
মুখ্য অতিথিৰূপে উপস্থিত থাকি দেৱযানী দত্ত কলিতাক এই বঁটা প্ৰদান কৰে বিশিষ্ট সাহিত্যিক তথা সত্ৰীয়া সংস্কৃতিৰ গৱেষিকা ড° নিৰুপমা মহন্তই । এই সভাতে সংস্থাৰ আজীৱন সদস্যা, সু-শিক্ষয়িত্রী সবিতা দেৱীৰ ‘নিলিখা গল্প’ নামৰ গল্পপুথি উন্মোচন কৰা হয় ।
অনুষ্ঠানত উপস্থিত থাকে অসম লেখিকা সংস্থাৰ প্রাক্তন সভানেত্রী, শিশু সাহিত্য অকাডেমী বঁটাপ্রাপ্ত, বিশিষ্ট সাহিত্যিক প্রিয়া বাৰুকিয়াল বৰগোহাঁঞি আৰু প্ৰাগজ্যোতিষ মহাবিদ্যালয়ৰ শিক্ষা বিভাগৰ অৱসৰপ্ৰাপ্ত অধ্যাপিকা তথা বিশিষ্ট সাহিত্যিক ড° সুচিত্রা কাকতিৰ লগতে কেইবাগৰাকীও বিশিষ্ট ব্যক্তি । আন্তর্জাতিক নাৰী দিৱসৰ এই অনুষ্ঠানত ‘আই পদ্মপ্রিয়া বঁটা’ৰ দাতা অৰুণা বৰাই বিশিষ্ট অতিথিৰ আসন অলংকৃত কৰে ।
লগতে পঢ়ক:কংগ্ৰেছৰ পৰা টিকট বঞ্চিত হৈ ৰাইজৰ দলত যোগদান নৰেন্দ্ৰ পাৱাৰৰ
