গুৱাহাটী, 30 মে': ৰাজ্যিক কেবিনেটত শেহতীয়াভাবে সংখ্যালঘু সকলক আছুতীয়া প্ৰমাণ-পত্ৰ দিয়াৰ বাবে সিদ্ধান্ত গ্ৰহণ (State cabinet decided to issue certificates to minorities)কৰাৰ পিছত ইয়াক কেন্দ্ৰ কৰি ৰাজ্যৰ বিভিন্ন মহলত মিশ্ৰিত প্ৰতিক্ৰিয়াৰ সৃষ্টি হৈছে । ৰাজ্যিক কেবিনেটত শেহতীয়াকৈ সংখ্যালঘু সকলক আছুতীয়া প্ৰমাণ-পত্ৰ দিয়াৰ বাবে গ্ৰহণ কৰাৰ সিদ্ধান্তৰ তীব্ৰ বিৰোধীতা কৰিছে বিৰোধী দলপতি দেৱব্ৰত শইকীয়াই ।
উল্লেখ্য যে ৰাজ্যত অনুসূচিত জাতি, অনুসূচিত জনজাতি, অন্যান্য পিচপৰা শ্ৰেণী আদি লোকৰ জাতিগত প্ৰমাণপত্ৰ আছে । কিন্তু ৰাজ্যখনৰ সংখ্যালঘু লোকসকলৰ কোনো তেনেধৰণৰ প্ৰমাণপত্ৰৰ ব্যৱস্থা নাই । সেয়ে ৰাজ্যৰ ছটা ভিন ভিন ধৰ্মীয় সম্প্ৰদায়ক এনে প্ৰমাণপত্ৰ প্ৰদানৰ বাবে কেবিনেটত সিদ্ধান্ত গ্ৰহণ কৰিছে ৰাজ্য চৰকাৰে । এই ছটা সম্প্ৰদায়ৰ ভিতৰত আছে মুছলমান, খ্ৰীষ্টান, শিখ, বৌদ্ধ, জৈন আৰু পাৰ্চী ।
ফলত সকলো ধৰণৰ চৰকাৰী আঁচনিৰ সুবিধা পাব প্ৰমাণপত্ৰ থকা সংখ্যালঘু লোকসকলে । এই সন্দৰ্ভত সোমবাৰে বিৰোধী দলৰ দলপতি দেৱব্ৰত শইকীয়াই কয় - 'ৰাজ্য চৰকাৰে শেহতীয়াভাবে সংখ্যালঘু সকলক আছুতীয়া প্ৰমাণ-পত্ৰ দিয়াৰ বাবে গ্ৰহণ কৰাৰ সিদ্ধান্তৰ কোনো গ্ৰহণযোগ্যতা নাই । এই ব্যৱস্থাৰ মাজেৰে ৰাজ্য চৰকাৰে মানুহৰ মাজত বিভাজন সৃষ্টি কৰিব বিচাৰিছে ।
বৰ্তমান পৰিস্থিতিত সংখ্যালঘু সকলক আছুতীয়া প্ৰমাণ-পত্ৰ দিয়াৰ প্ৰয়োজন নাই । কাৰণ সংবিধানে সংখ্যালঘু সকলক স্বীকৃতি দিছে । সংখ্যালঘু সকলক সংবিধানে কিছুমান সা-সুবিধা দিছে । আচলতে ৰাজ্য চৰকাৰে সংখ্যালঘুসকলক ৰাজনৈতিকভাৱে ব্যৱহাৰ কৰাৰ বাবে এই ব্যৱস্থা আৰম্ভ কৰিব বিচাৰিছে ।'
লগতে পঢ়ক: ক'ভিডত অনাথ হোৱা শিশুৰ বাবে বিশেষ আঁচনি ঘোষণা প্ৰধানমন্ত্ৰীৰ
