গুৱাহাটী,১১ অক্টোবৰ : বিগত কেইবাদিনো হোৱা নেৰানেপেৰা বৰষুণৰ ফলত জলমগ্ন হৈ পৰিছিল গুৱাহাটী মহানগৰীৰ বহু অঞ্চল ৷ এক কথাত মহানগৰীৰ স্বাভাৱিক জীৱন যাত্রা ব্যাহত হৈ পৰিছিল ৷ বৰ্তমান পৰিস্থিতি স্বাভাৱিক হৈছে যদিও এতিয়াও বহু আৱাসিক এলেকা কৃত্রিম বানৰ কৱলত আছে ৷ ইফালে বৰষুণৰ বাবে গুৱাহাটী মহানগৰীৰ পাহাৰসমূহত ভূমিস্খলনৰ এক ভয়াৱহ পৰিস্থিতিৰ উদ্ভৱ হৈছিল ৷ অৱশ্যে গুৱাহাটীৰ পাহাৰত বসবাস কৰা লোকসকলে সদায়ে এক বিপদ সংকুল পৰিস্থিতিৰ মাজতে জীৱন নিৰ্বাহ কৰিবলগীয়া হয় ৷
লক্ষণীয় বিষয় যে বিগত কেইদিনৰ নেৰানেপেৰা বৰষুণৰ ফলত গুৱাহাটী মহানগৰীৰ বিভিন্ন ঠাইত পাহাৰসমূহৰ মাটি আৰু শিল খহি পৰাৰ কেইবাটাও ঘটনা সংঘটিত হৈছিল ৷ গুৱাহাটীৰ ভাস্কৰ নগৰকে ধৰি হেঙেৰাবাৰী আদি বিভিন্ন ঠাইত কেইবাটাও ভূমিস্খলনৰ ঘটনা সংঘটিত হৈছিল ৷ উল্লেখ্য যে প্ৰত্যেক বছৰেই বাৰিষা আৰম্ভ হোৱাৰ লগে লগে মহানগৰীৰ বিভিন্ন স্থানত ভূমিস্খলন হৈ বিস্তৰ ক্ষতিসাধন হোৱাটো নতুন কথা নহয় ৷ এক কথাত ক'বলৈ গ'লে বাৰিষাৰ লগে লগে গুৱাহাটী মহানগৰীৰ একাংশ বাসিন্দাৰ নিন্দ্ৰা হৰণ হৈ পৰে ৷ লক্ষণীয় বিষয় যে সৰু-বৰ ১৮ খন পাহাৰেৰে আগুৰি থকা গুৱাহাটী মহানগৰীৰ গৰিষ্ঠ সংখ্যক পাহাৰেই জনবসতিপূৰ্ণ ৷
বছৰৰ পাছত বছৰ ধৰি গুৱাহাটীৰ পাহাৰসমূহত চলা অবৈধ খনন কাৰ্য আৰু অপৰিকল্পিত নিৰ্মাণ কাৰ্যৰ ফলত পাহাৰসমূহৰ ব্যাপক অবক্ষয় হৈছে ৷ যাৰ ফলত এজাক বৰষুণ দিলেই পাহাৰসমূহে পানী বহন কৰিব নোৱাৰে আৰু ফলত বৰষুণৰ পানীৰ সৈতে তললৈ নামি আহে পাহাৰৰ বোকা আৰু শিলাময় মাটি ৷ গুৱাহাটীৰ ভয়াৱহ কৃত্রিম বানৰো অন্যতম এটা কাৰণ পাহাৰৰ ব্যাপক অৱক্ষয় ৷ লক্ষণীয় বিষয় যে এজাক বৰষুণ দিলেই পাহাৰৰ মাটিৰে নলা-নৰ্দমা সমূহ নিমিষতে ভৰি পৰে ৷
উল্লেখ্য যে কামৰূপ মহানগৰ জিলা প্ৰশাসনে গুৱাহাটী মহানগৰীৰ পাহাৰীয়া ৩৯২টা এলেকা ভূমিস্খলন প্ৰৱণ এলেকা হিচাপে চিহ্নিত কৰিছে ৷ কিন্তু প্ৰশাসনে কেৱল মাথো চিহ্নিতহে কৰিছে ৷ এইক্ষেত্রত কোনো ধৰণৰ কাৰ্যব্যৱস্থা গ্ৰহণ কৰা নাই ৷ ভূমিস্খলন হ’ব পৰা বিপদজ্জনক পাহাৰীয়া এলেকাসমূহ হৈছে - ফটাশিল, ভঙাগড়, গোটানগৰ, হেঙেৰাবাৰী, জালুকবাৰী, লংকেশ্বৰ, কাহিলিপাৰা, কালাপাহাৰ, খাৰঘুলি, কইনাধৰা, মালিগাঁও, নৱগ্রহ, নৰকাসুৰ, নাৰেংগী, নুনমাটি আদি ৷ ইয়াৰ ভিতৰত চুনছালিৰ ৭৭টাকৈ স্থান, খাৰঘূলিৰ ৩৭ টা স্থান, শৰণীয়াৰ ৫টা স্থান, শান্তিপুৰৰ ২০টা স্থান বিপদজনক, নাৰেংগীৰ ৩১ টা স্থান, নুনমাটিৰ ৪০ টা স্থান, নৰকাসুৰৰ ১৪ টা স্থান, নৱগ্ৰহৰ ৬ টা স্থান, মালিগাঁৱৰ ৮ টা স্থান, কইনাধৰাৰ ৫ টা স্থান, খানাপাৰাৰ ৩৩ টা স্থান, কামাখ্যাৰ ৫ টা স্থান, কালাপাহাৰৰ ৭ টা স্থান, কাহিলীপাৰাৰ ২৫ টা স্থান, জালুকবাৰীৰ ২টা স্থান, হেঙেৰাবাৰীৰ ৩০ টা স্থান, গোটানগৰৰ ৬ টা স্থান, গড়ভঙাৰ ৯ টা স্থান, ফটাশিলৰ ৫ টা স্থান স্পৰ্শকাতৰ বুলি চিনাক্ত কৰা হৈছে ৷
চৰকাৰী তথ্য মতে বিগত বৰ্ষত গুৱাহাটীত ৮৭টা ভূমিস্খলন হৈছিল আৰু ভূমিস্খলনৰ বাবে ৪টা আশ্ৰয় শিবিৰ স্থাপন কৰা হৈছিল ৷ আনহাতে চৰকাৰী তথ্য মতে গুৱাহাটীৰ অতি বিপদ সংকুল এলেকাসমূহত বসবাস কৰা লোকসকল দৰিদ্ৰ আৰু যাৰ বাবে তেওঁলোকে সেই ঠাই এৰি যাব নিবিচাৰে ৷ তাৎপৰ্যপূৰ্ণ বিষয় যে পাহাৰৰ স্পৰ্শকাতৰ অঞ্চলৰ বিষয়টো কোনটো বিভাগৰ অধীনত পৰে সেয়াও বিভাগীয়ভাৱে নিশ্চিত নহয় ৷ যাৰ বাবে এই বিষয়টো আজিৰ তাৰিখতো জটিল হৈ আছে ৷ এক কথাত ক'বলৈ গ'লে বিপদজনক পৰিস্থিতিত বসবাস কৰা এই লোকসকলৰ ভৱিষ্যত কি হ'ব তাক লৈ কোনো এটা চৰকাৰী বিভাগেই সচেষ্ট নহয় ৷ যাৰ বাবে বছৰৰ পাছত বছৰ ধৰি এই সমস্যাৰ কোনো সমাধান হোৱা নাই ৷
আনহাতে জিলা প্ৰশাসনে ভূমিস্খলন প্ৰৱণ এলেকা চিনাক্ত কৰিয়ে নিজৰ দায়িত্ব সামৰিছে ৷ এই অঞ্চলসমূহক সুৰক্ষিত কৰাৰ বাবে কোনো ধৰণৰ পদক্ষেপ গ্ৰহণ কৰা নাই ৷ প্ৰতি বছৰে বাৰিষাৰ সময়ছোৱাত এই ভূমিস্খলন প্ৰৱণ অঞ্চলত তথা ইয়াৰ নামনিত বসবাস কৰা লোকসকলে শংকাৰে জীৱন যাপন কৰি আহিছে ৷ উল্লেখ্য যে গুৱাহাটী বিশ্ববিদ্যালয়ৰ ভূ-তত্ত্ব বিভাগে ২০১২ চনতে গুৱাহাটীৰ ভূমিস্খলনৰ ভয়াবহ সমস্যা সমাধান কৰাৰ বাবে মহানগৰীৰ পাহাৰসমূহ সংৰক্ষণ কৰা, গছ-গছনি ৰোপণ কৰা, পাহাৰ খনন বন্ধ কৰাকে ধৰি কেতবোৰ পৰামৰ্শ চৰকাৰলৈ আগবঢ়াইছিল ৷ কিন্তু এই পৰামৰ্শসমূহ বছৰ বছৰ ধৰি ফাইলতে আবদ্ধ হৈ আছে ৷ যাৰ বাবে বৰ্ত্তমান সময়ত এই সমস্যা অধিক গভীৰ হৈ পৰিছে ৷
চৰকাৰী তথ্য মতে গুৱাহাটী মহানগৰীৰ পাহাৰ অঞ্চলৰ ২৬ শতাংশ এলেকাত কোনো গছ-গছনি নাই ৷ আনহাতে ৩৮ শতাংশ পাহাৰ এলেকাত নাই ঘাঁহনি ৷ তেনেস্থলত পাহাৰ সমূহৰ ব্যাপক অবক্ষয় হৈছে আৰু ফলত ভূমিস্খনৰ আশংকা বৃদ্ধি পাইছে ৷ উল্লেখ্য যে চলিত বাৰিষাৰ আৰম্ভণিতে বিগত জুন মাহত ধীৰেনপাৰাত সংঘটিত হোৱা ভূমিস্খলনত এজনৰ থিতাতে মৃত্যু হৈছিল ৷ এনে ঘটনাই বৰষুণ আহিলেই পাহাৰীয়া অঞ্চলৰ আৰু ইয়াৰ নামনিৰ বাসিন্দাক অধিক আতংকিত কৰি তোলে ৷ চৰকাৰী তথ্য অনুসৰি বিগত বৰ্ষটোত মহানগৰীৰ পাহাৰ সমূহত সংঘটিত শতাধিক ভূমিস্খলনৰ ঘটনাত কমেও পাঁচজন লোকে প্ৰাণ হেৰুৱাইছিল ৷
বিগত বৰ্ষৰ ১৪ জুনত মহানগৰীত একেদিনাই সর্বাধিক ২৩টা, ১৫ জুনত ১৯টা, ১৬ জুনত ১১টা, ১৭ জুনত ৯টা ভূমিস্খলনৰ ঘটনা সংঘটিত হৈছিল ৷ দুর্যোগ প্রশমন বিভাগৰ তথ্য অনুসৰি বিগত বৰ্ষৰ ১৭ মে'ৰ পৰা ২৯ জুনলৈ মুঠ ১২টা দিনত মহানগৰীত ৮০টা ভূমিস্খলনৰ ঘটনা সংঘটিত হৈছিল ৷ ইফালে গৃহ বিভাগৰ তথ্য অনুসৰি গুৱাহাটী মহানগৰীত ১৯৯৩ চনৰপৰা ২০১৮লৈ সংঘটিত হোৱা ভূমিস্খলনৰ ঘটনাত ১৬৫ জন লোকে প্রাণ হেৰুৱাইছে ৷ তাৰ পাছতো কিন্তু চৰকাৰখনে এইক্ষেত্রত কোনো ধৰণৰ বাস্তৱসন্মত পদক্ষেপ গ্ৰহণ কৰা নাই ৷
গুৱাহাটীৰ এই জটিল সমস্যা সন্দৰ্ভত ইটিভি ভাৰতৰে হোৱা এক আছুতীয়া সাক্ষাতকাৰত ভূমি অধিকাৰ সংগ্ৰাম সমিতি, অসমৰ সভাপতি প্ৰবীনজ্যোতি কলিতাই আজিৰ এই পৰিস্থিতিৰ বাবে চৰকাৰক দোষাৰোপ কৰি কঠোৰ ভাষাৰে সমালোচনা কৰে ৷ তেওঁ কয় যে বাৰিষা আহিলে চৰকাৰ তথা প্ৰশাসনৰ পাহাৰত বসবাস কৰা লোকসকলৰ কথা মনত পৰে ৷ পাছত পাহৰি যায় ৷ চৰকাৰে পাহাৰত বসবাস কৰা লোকসকলক কেৱল ভেঙূচালি কৰি আহিছে ৷ চৰকাৰৰ অবহেলাৰ বাবেই পাহাৰত এই পৰিস্থিতিৰ উদ্ভৱ হৈছে ৷ নিয়মমাফিক প্ৰশাসনে পাহাৰৰ মাটি কটাত নিষেধাজ্ঞা আৰোপ কৰে যদিও কাৰ্যতঃ এয়া ৰোধ হোৱা নাই ৷ বৰং চৰকাৰেই পাহাৰৰ মাটি কাটি আছে বুলি অভিযোগ কৰি তেওঁ কয় যে গুৱাহাটীৰ পাহাৰত ৮৫ হাজাৰৰো অধিক পৰিয়ালে বাস কৰে ৷ নিৰ্বাচনৰ সময়ত এই লোকসকলৰ কথা মনত পৰে আৰু নিৰ্বাচনৰ পাছত পাহৰি যায় ৷
লগতে পঢ়ক : Anganwadi worker protest: মাননি বৃদ্ধিৰ দাবীত নৱম দিনাও আন্দোলন অব্যাহত ৰাখিব অংগনৱাড়ী কৰ্মী-সহায়িকাই
