গুৱাহাটী, ২৪ফেব্ৰুৱাৰী : প্ৰতিবাদস্থলীতে হঠাৎ কান্দি কান্দি ঢলি পৰিল এগৰাকী মহিলা ৷ ৰাইজৰ বুজনিও যেন অসাৰ আজি তেওঁৰ বাবে ৷ কিয়নো বিগত 8টা বছৰে বুকুত লৈ ফুৰা তেওঁৰ দোষ-কষ্টৰ ভাৰ ৰাইজৰ বুজনিয়ে কৰিব নোৱাৰে শান্ত ৷
প্ৰতিবাদস্থলীত ক্ৰন্দনত ঢলি পৰা মহিলাগৰাকী হৈছে জাতীয় বীৰ শ্বহীদ প্ৰণৱ বড়োৰ পত্নী ৷ ভূমি পত্তাৰ দাবীত নিজৰ জীৱনক তুচ্ছ কৰি ৰাইজৰ হকে 8 বছৰৰ পূৰ্বে মৃত্যুক আঁকোৱালি লৈছিল শ্বহীদ প্ৰণৱ বড়োয়ে ৷ কিন্তু আজিও নিথৰুৱা হৈ আছে শ্বহীদৰ সেই পৰিয়ালটো ৷
উল্লেখ্য যে, বৃহস্পতিবাৰে আছিল জাতীয় বীৰ শ্বহীদ প্ৰণৱ বড়োৰ অষ্টম মৃত্যু বাৰ্ষিকী (Death anniversary of martyr Pranab Boro) ৷
মহানগৰী চচলৰ ধৰ্ণা স্থলীত বৃহস্পতিবাৰে জাতীয় বীৰ শ্বহীদ প্ৰণৱ বড়োৰ অষ্টম মৃত্যু বাৰ্ষিকীৰ লগত সংগতি ৰাখি এখনি আয়োজন কৰা হয় এক প্ৰতিবাদী সভাৰ (KMSS protest meeting in Sachal) । কৃষক মুক্তি সংগ্ৰাম সমিতিৰ উদ্যোগত আয়োজন কৰা এই প্ৰতিবাদী সভাত পতাকা উত্তোলন কৰে কৃষক মুক্তি সংগ্ৰাম সমিতিৰ সভাপতি দেবেন শৰ্মাই । ইয়াৰ পিছত শ্বহীদ প্ৰণৱ বড়োৰ প্ৰতিচ্ছবিৰ সন্মুখত বন্তি প্ৰজ্বলন আৰু মাল্যাৰ্পণ কৰে শ্বহীদ গৰাকীৰ পত্নী পূৰ্ণিমা বড়োৱে ।
পুষ্পঞ্জলি প্ৰদান কৰি পূৰ্ণিমা বড়োৱে স্বামীৰ স্মৃতিত উচুপি উঠে । শ্বহীদ পত্নীগৰাকীয়ে দীৰ্ঘদিন ধৰি পাহাৰ ভৈয়ামত বসবাস কৰা গুৱাহাটীৰ লোকক মাটিৰ পত্তা দিবলৈ চৰকাৰৰ ওচৰত দাবী জনায় । কিয়নো আঠ বছৰৰ পূৰ্বে মাটিৰ পত্তা দিয়াৰ দাবীত কৃষক নেতা প্ৰণৱ বড়োৱে জনতা ভৱনৰ সন্মুখত আত্মজাহ দিছিল ।
প্ৰণৱ বড়োৰ মৃত্যুৰ পিচতো ৰাজ্য চৰকাৰে ভূমিহীনক মাটি পত্তা প্ৰদান নকৰাত কৃষক মুক্তি সংগ্ৰাম সমিতিয়ে ক্ষোভ প্ৰকাশ কৰে । অতিশীঘ্ৰে গুৱাহাটীবাসীক ভূমি পত্তা প্ৰদানৰ দাবী জনাই কৃষক মুক্তি সংগ্ৰাম সমিতিৰ সভাপতি দেবেন শৰ্মাই । ইপিনে গুৱাহাটী ৰে’ল ষ্টেচনৰ নামত আৱন্টিত ৫৮ বিঘা মাটি পুঁজিপতিক প্ৰদান কৰা কাৰ্যক কৃষক মুক্তি সংগ্ৰাম সমিতিয়ে তীব্ৰ বিৰোধীতা কৰে ।
হস্তান্তৰ কৰা ভূমিখিনি পুনৰ উভতাই অনাৰ বাবেও ৰাজ্য চৰকাৰৰ ওচৰত দাবী জনায় । অন্যথা কৃষক মুক্তি সংগ্ৰাম সমিতিৰ নেতৃত্বত চৰকাৰৰ বিৰুদ্ধে বৃহৎ গণ আন্দোলন গঢ়ি তোলা হ’ব বুলি হুংকাৰ প্ৰদান কৰে ।
লগতে পঢ়ক : Majuli By Election 2022: মাজুলীৰ ৰাজীৱ ভৱনত অপূৰ্ব ভট্টাচাৰ্যৰ সংবাদ মেল
