গুৱাহাটী,20 চেপ্তেম্বৰ: কেন্দ্ৰীয় চৰকাৰে শেহতীয়াকৈ লোকসভাত গৃহীত কৰা কৃষি আইনক কেন্দ্ৰ কৰি দেওবাৰে সৰৱ হৈ পৰে কৃষক মুক্তি সংগ্ৰাম সমিতি । কৃষক মুক্তিৰ মন্তব্য- কেন্দ্ৰীয় চৰকাৰৰ এই আইনখনে ভাৰতৰ যুক্তৰাষ্ট্ৰীয় ব্যৱস্থাত কুঠাৰাঘাত কৰিছে । ৰাজ্যিক তালিকাৰ 14 আৰু 18 নং সূচীত কৃষি সামগ্ৰীৰ বিপণন অন্তৰ্ভুক্ত হৈ আছে । কিন্তু এতিয়া কেন্দ্ৰই ৰাজ্যৰ ক্ষমতা কাঢ়ি নিজৰ হাতলৈ নিছে । যিয়ে উলংঘা কৰিছে ৰাজ্যিক এপিএমচি আইন । এইদৰে সংবাদমেলত সৰৱ হৈ পৰে কৃষক মুক্তি সংগ্ৰাম সমিতিৰ নেতৃবৰ্গ ৷
কৃষক মুক্তি সংগ্ৰাম সমিতিয়ে সংবাদমেলখনতে কেন্দ্ৰীয় চৰকাৰে প্ৰৱৰ্তন কৰা এই কৃষি আইনখনক কৃষক বিৰোধী আখ্যা দিয়াৰ লগতে প্ৰৱৰ্তন কৰা উক্ত অধ্যাদেশ তিনিখন বাতিল কৰাৰ দাবী জনায় । সংগঠনটোৱে অধ্যাদেশ কেইখন সম্পৰ্কে ইতিমধ্যে সমগ্র দেশত গঢ়ি উঠা কৃষক বিদ্ৰোহৰ সমৰ্থন জনোৱাৰ লগতে কেন্দ্ৰীয় চৰকাৰক কৃষি বিৰোধী নীতি পৰিহাৰ কৰিবলৈ তীব্ৰ সকীয়নি প্ৰদান কৰে ৷
আনহাতে, কৃষক মুক্তিৰ ৰাজনৈতিক দল গঠন সন্দৰ্ভতো মন্তব্য প্ৰকাশ কৰে সভাপতি ভাস্কো ডি শইকীয়াই । শইকীয়াৰ মতে, সংগঠনটোৱে এক ঐক্যবদ্ধ আঞ্চলিক দল গঠন কৰাৰ কামত আগবাঢ়িছে । বিভিন্ন জাতীয় সংগঠন, জনগোষ্ঠীয় সংগঠন আৰু আঞ্চলিক দল সমূহৰ লগত আলোচনাত মিলিত হৈছে । সকলোৰে নেতৃত্বত সকলোকে সন্মান সহকাৰে প্ৰতিনিধিত্ব প্ৰদান কৰি সংগঠনটোৱে নতুন ৰাজনৈতিক দল গঠনৰ পোষকতা চলাইছে ৷
লগতে চাওকঃ অসম আৰক্ষীৰ উপ পৰিদৰ্শকৰ পৰীক্ষা বাতিল: অসম জাতীয় পৰিষদৰ প্ৰতিক্ৰিয়া
