গুৱাহাটী,১৭ এপ্ৰিল: ৰাজ্যত বিশেষকৈ গুৱাহাটী মহানগৰীত ক'ভিড-১৯ ত আক্ৰান্তৰ সংখ্যা দিনকদিনে বৃদ্ধি পোৱাত উদ্বিগ্ন হৈ পৰিছে জিলা প্ৰশাসন । ইফালে বিহুৰ উলহ-মালহ পৰিৱেশৰ মাজত যাতে ক'ভিড পৰিস্থিতিৰ অধিক অৱনতি নঘটে, তাৰ প্ৰতি লক্ষ্য ৰাখি কামৰূপ জিলা প্ৰশাসনে বিশেষ সতৰ্কতামূলক ব্যৱস্থা গ্ৰহণ কৰিছে ।
শনিবাৰে বিহু কমিটিৰ বিষয়ববীয়াৰ সৈতে কামৰূপ মহানগৰ জিলা প্ৰশাসনৰ বিষয়াসকলে এক জৰুৰী বৈঠকত মিলিত হয় । জিলা উপায়ুক্ত বিশ্বজিত পেগুৰ অধ্যক্ষতাত অনুষ্ঠিত বৈঠকত কেতবোৰ নীতি-নিৰ্দেশনাৰ ওপৰত আলোচনা কৰা হয় । বৈঠকত আৰক্ষীৰ শীৰ্ষ বিষয়াও উপস্থিত থাকে ।
মহামাৰীৰ সংক্ৰমণৰ প্ৰতি লক্ষ্য ৰাখি বিহু উদযাপনস্থলীত গৈ পৰিৱেশ-পৰিস্থিতি নিৰীক্ষণ কৰিব আৰক্ষীয়ে । বিহু উপভোগ কৰিবলৈ অহা দৰ্শকে মাস্ক নিপিন্ধিলে ভৰিব লাগিব ১০০০ টকাৰ জৰিমনা ।
আনহাতে, বিহুৰ অনুষ্ঠান আয়োজন কৰা স্থানৰ প্ৰৱেশদ্বাৰত দৰ্শকক থাৰ্মেল স্কেনিং কৰিবলৈ আয়োজক সমিতিক নিৰ্দেশ দিয়া হৈছে । উল্লেখ্য যে, গুৱাহাটী মহানগৰীত দৈনিক শ শ লোক নতুনকৈ কৰ’ণাত আক্ৰান্ত হৈছে ।
লগতে পঢ়ক: পৰম্পৰাগত ৰীতি-নীতিৰে অনুষ্ঠিত হৈছে তিৱা বিহু মেলা
