৩১ জানুৱাৰীত ন্যায়াধীশ বিপ্লৱ কুমাৰ শৰ্মা নেতৃত্বাধীন সমিতিয়ে দাখিল কৰিব প্ৰতিবেদন

৩১ জানুৱাৰীত কেন্দ্ৰীয় চৰকাৰৰ হাতত প্ৰতিবেদন দাখিল কৰিব অসম চুক্তিৰ ৬ নং দফা কাৰ্যকৰীকৰণৰ বাবে কেন্দ্ৰীয় চৰকাৰে গঠন কৰি দিয়া ন্যায়াধীশ বিপ্লৱ কুমাৰ শৰ্মা নেতৃত্বাধীন উচ্চ ক্ষমতা সম্পন্ন সমিতিখনে ৷

গুৱাহাটী, ২০ জানুৱাৰী: অসম চুক্তিৰ ৬ নং দফা কাৰ্যকৰীকৰণৰ বাবে কেন্দ্ৰীয় চৰকাৰে গঠন কৰি দিয়া ন্যায়াধীশ বিপ্লৱ কুমাৰ শৰ্মা নেতৃত্বাধীন উচ্চ ক্ষমতা সম্পন্ন সমিতিখনে, অহা ৩১ জানুৱাৰীত কেন্দ্ৰীয় চৰকাৰৰ হাতত প্ৰতিবেদন দাখিল কৰিব । কিন্তু খিলঞ্জীয়াক সাংবিধানিক ৰক্ষাকৱচ প্ৰদানৰ ক্ষেত্ৰত সমিতিৰ পৰামৰ্শ কেনেধৰণৰ হ'ব তাকে লৈ এতিয়া বিভিন্ন মহলত জল্পনা কল্পনা চলিছে । প্ৰাপ্ত তথ্য অনুসৰি সমিতিখনে আন কেইবাটাও পৰামৰ্শ আগবঢ়োৱাৰ লগতে, এটা গুৰুত্বপূৰ্ণ পৰামৰ্শ কেন্দ্ৰৰ ওচৰত দাখিল কৰাৰ পূৰ্ণ সম্ভাৱনা আছে ।

সেই অনুসৰি অসমত আন্তঃ ৰাজ্যিক পাৰপত্ৰ অৰ্থাৎ ইনাৰ লাইন পাৰ্মিট ( আই এল পি ) প্ৰৱৰ্তনৰ বাবে এইখন সমিতিয়ে, কেন্দ্ৰক পৰামৰ্শ আগবঢ়োৱাৰ পূৰ্ণ সম্ভাৱনা আছে । ইতিমধ্যে ১৩ জানুৱাৰীত দিল্লীত কেন্দ্ৰীয় গৃহ মন্ত্ৰী অমিত শ্বাহৰ সৈতে হোৱা সমিতিৰ বৈঠকখনতো এই বিষয়টোৱে বিশেষ ভাবে স্থান লাভ কৰিছিল । মন কৰিবলগীয়া যে অসম জাতীয়তাবাদী যুৱ ছাত্ৰ পৰিষদকে ধৰি আন বহুকেইটা সংগঠনে, অসমত খিলঞ্জীয়াৰ স্বাৰ্থ সুৰক্ষিত কৰি ৰাখিবলৈ আইএলপি প্ৰৱৰ্তনৰ দাবী উত্থাপন কৰি আহিছে ।

লগতে পঢ়কঃ মাজুলীৰ স্বাস্থ্য বিভাগত বাংলা ভাষাত আহিল প্ৰ-পত্ৰ