গুৱাহাটী,11 অক্টোবৰ : ৰাজ্যত ইতিমধ্যে আৰম্ভ হৈ গৈছে নিৰ্বাচনী চৰ্চা । বিটিআৰত বিজেপিয়ে বিপিএফৰ সৈতে মিত্ৰতা ভংগ কৰাৰ পিছতো বিজেপিৰ সংগ এৰিব পৰা নাই সাংসদ বিশ্বজিৎ দৈমাৰীয়ে । নিৰ্বাচনী বতাহ লাহে লাহে গৰম হোৱাৰ লেখীয়াকৈ এই বিষয়টোৱে সম্প্ৰতি চৰ্চা লাভ কৰা পৰিলক্ষিত হৈছে ৷ তদুপৰি বিটিআৰ চুক্তিকে ধৰি কেইবাটাও বিষয়ত দলৰ সৈতে মতৰ অমিল পৰিলক্ষিত হৈছিল বিপিএফৰ সাংসদ বিশ্বজিৎ দৈমাৰীৰ বিৰুদ্ধে । যাৰ বাবে সংবাদ শীৰ্ষ দখল কৰিছে সাংসদগৰাকীৰ বিজেপি গমনৰ বিষয়টোৱে ।
এনে সৰৱ চৰ্চা অব্যাহত থকাৰ মাজতে প্ৰথমবাৰলৈ বিষয়টো সন্দৰ্ভত মুখ খুলিছে সাংসদগৰাকীয়ে । দৈমাৰীয়ে দলৰ বহু সিদ্ধান্তৰ প্ৰতি মুকলিকৈ অসন্তুষ্টি প্ৰকাশ কৰে যদিও বিজেপিত যোগদানৰ বিষয়টো কৌশলপূৰ্ণভাৱে এৰাই চলে ৷ নিৰ্বাচনৰ প্ৰাকক্ষণত বিশ্বজিৎ দৈমাৰীৰ এনে কৌশলপূৰ্ণ স্থিতিয়ে হয়টো বিপিএফক ক্ষতিগ্ৰস্ত কৰিব পাৰে । কিন্তু অনাগত দিনত লক্ষণীয় হ'ব সাংসদ দৈমাৰীৰ এনে কৌশলপূৰ্ণ স্থিতিৰ আঁৰৰ ৰহস্য কি ?
