গুৱাহাটী, 13 মে': হাড়গিলাৰ দৰে দুষ্প্ৰাপ্য প্ৰজাতিৰ বিলুপ্তপ্ৰায় পক্ষীৰ উদ্ধাৰৰ হকে কাম কৰা এগৰাকী মহিলা ডঃ পূৰ্ণিমা দেৱী বৰ্মন । ইতিমধ্যে হাড়গিলা সংৰক্ষণেৰে ৰাষ্ট্ৰীয় পৰ্যায়ত সমাদৰ লাভ কৰা পূৰ্ণিমা দেৱীৰ আন এক আন্তঃৰাষ্ট্ৰীয় পৰ্যায়ৰ কৃতকাৰ্যতাই গৌৰৱ কঢ়িয়াই আনিছে অসমলৈ । বিশ্বৰ অন্যতম বিখ্যাত গ্ৰন্থ প্ৰকাশন গোষ্ঠী হাৰ্পাৰ কলিন্সে প্ৰকাশ কৰা শৈক্ষিক পাঠ্যপুথিত তেখেতৰ কামৰ আলোকপাত লিপিবদ্ধ কৰা হৈছে । তেওঁৰ কৰ্মৰাজিৰ লগতে হাড়গিলাৰ দৰে বিলুপ্তপ্ৰায় পক্ষী উদ্ধাৰৰ বিভিন্ন পদক্ষেপ সম্পৰ্কেও, বিশদভাৱে প্ৰকাশ পাইছে বিশ্বৰ বিভিন্ন দেশৰ ইংৰাজী মাধ্যমৰ সপ্তম শ্ৰেণীৰ পাঠ্যপুথি হিচাপে গ্ৰহণ কৰা ইংলিছ এলাইভত ।
আন্তঃৰাষ্ট্ৰীয় পৰ্যায়ত এনেদৰে কৃতিত্ব পাবলৈ সক্ষম হোৱা পূৰ্ণিমা দেৱীয়ে, হাৰ্পাৰ কলিন্স প্ৰকাশনলৈ ধন্যবাদ জ্ঞাপন কৰাৰ লগতে হাড়গিলা সংৰক্ষণ হকে কৰি থকা যুদ্ধত সহযোগিতা আগবঢ়াই অহা, সকলো লোকলৈ কৃতজ্ঞতা জ্ঞাপন কৰিছে ।
পূৰ্ণিমা দেৱীয়ে স্পষ্টভাৱে প্ৰকাশ কৰে যে, হাড়গিলাৰ হকে এই যুঁজৰ বাবে তেওঁ সদা প্ৰস্তুত । বৰ্তমান সময়ত পৰিৱেশ সম্পৰ্কে মানৱ জাতিৰ দায়িত্ববোধ তাকৰ যদিও, এনে ব্যক্তিও আছে যি পৰিবেশ আৰু জীৱ-জন্তু, চৰাই-চিৰিকতিৰ হকে কাম কৰি গৈছে । পৃথিৱীত প্ৰতিদিনে অৰণ্য বা হাবি জংঘল ধ্বংস হৈ অহাৰ ফলত পৰিৱেশৰ ভাৰসাম্য ধৰি ৰখাটো কঠিন হৈ পৰিছে । যাৰ বাবে পৰিৱেশ সম্পৰ্কে ভৱিষ্যতৎ প্ৰজন্মক সজাগ কৰিবলৈ ঘৰৰ পৰা প্ৰথম প্ৰচেষ্টা কৰিব লাগিব বুলিও উল্লেখ কৰে পূৰ্ণিমা দেৱীয়ে ।
আনহাতে অসমৰ শিক্ষা ব্যৱস্থাত বৰ্তমান পৰিৱেশ সম্পৰ্কীয় শিক্ষা কেৱল পাঠ্যক্ৰমতে নাৰাখি, ক্ষেত্ৰ অধ্যয়নৰ প্ৰয়োজনীয়তা আছে বুলি জানিবলৈ দিয়ে হাড়গিলা বাইদেউখ্যাত প্ৰকৃতিপ্ৰেমী গৰাকীয়ে ।
লগতে পঢ়কঃ প্ৰকৃতিপ্ৰেমৰ চানেকি দেখুওৱা যুৱকজন...
