গুৱাহাটী, 8 ডিচেম্বৰ : পৰেশ বৰুৱাৰ নেতৃত্বাধীন নিষিদ্ধ ঘোষিত আলফা স্বাধীনৰ ম্যানমাৰস্থিত শিবিৰত বোমাৰে আক্ৰমণ ভাৰতীয় সেনাৰ ৷ ভাৰতৰ দিশৰ পৰা আকাশমাৰ্গেৰে তিনিটাকৈ বোমাৰে আক্ৰমণ কৰা হয় ম্যানমাৰত অৱস্থিত আলফা স্বাধানৰ ভ্ৰাম্যমান শিবিৰত ৷ এই আক্ৰমণত দুজনকৈ আলফা স্বাধীনৰ কেডাৰ আহত হৈছে ৷ এক বিবৃতিযোগে এই কথা জনাইছে আলফা স্বাধীনৰ প্ৰচাৰ বিভাগৰ দায়িত্বত থকা ৰুমেল অসমে ৷
আলফা স্বাধীনে এই প্ৰসংগত জনোৱা মতে, যোৱা 7 জানুৱাৰী দেওবাৰে ভাৰতীয় সেনা বাহিনীয়ে ভাৰতৰ পৰা ড্ৰোণেৰে আলফাৰ শিবিৰলৈ লক্ষ্য কৰি তিনিটাকৈ বোমা নিক্ষেপ কৰে । ভাৰতীয় সেনাই আলফা স্বাধীনৰ অস্থায়ী শিবিৰত ড্ৰোণৰ যোগে প্রথমটো আক্ৰমণ কৰিছিল আবেলি 4.10 বজাত ৷ আনহাতে দ্বিতীয়টো আবেলি 4.12 বজাত আৰু তৃতীয়টো 4.20 বজাত আক্রমণ কৰিছিল বুলি আলফা স্বাধীনে দাবী কৰে ৷ ৰুমেল অসমে বিবৃতিটোত জনাইছে যে, তৃতীয়টো বোমা বিস্ফোৰিত নহ’ল । বিপৰীতে প্ৰথম দুটা বোমা বিস্ফোৰণত সংগঠনটোৰ দুজন সদস্য আহত হয় ।
