গুৱাহাটী, ২৮ অক্টোবৰ: অসমসহ উত্তৰ-পূৰ্বাঞ্চলত কয়লাৰ খননত নিষেধাজ্ঞা আছে যদিও অব্যাহত আছে কয়লাৰ বৃহৎ ছিণ্ডিকেট । বিশেষকৈ বৰাক উপত্যকা এতিয়া সােণৰ কণী পৰা হাঁহত পৰিণত হৈছে । ক’লা হীৰাৰ অবৈধ ব্যৱসায়ৰ মূল ঘাটিত পৰিণত বৰাকত পুনৰ গা কৰি উঠিছে ছিণ্ডিকেট চক্র । মেঘালয়ৰ কয়লা বৰাকৰ মাজেদি বাংলাদেশলৈ অবৈধভাৱে সৰবৰাহৰ নামত পূর্বৰ দৰে গঢ়ি উঠিছে ছিণ্ডিকেট ।
চি আই ডি, চি বি আইৰ তদন্ত ধোঁৱা চাঙত তুলি চৰকাৰী বিভাগ, ৰাজনৈতিক নেতাৰ প্রত্যক্ষ-পৰােক্ষ পৃষ্ঠপােষকতাত বৰাকত চলিছে কয়লা ছিণ্ডিকেট । শেহতীয়াকৈ দুজন পৰিবহণ বিষয়াক গ্রেপ্তাৰ, দুজন আৰক্ষী বিষয়াক বদলি কৰা ঘটনাই স্পষ্টভাৱে উদঙাই দিছে কয়লা ছিণ্ডিকেটৰ সৈতে কোন কোন জড়িত । জানিব পৰা মতে, দুর্গা পূজাৰ আগৰ পৰা পূর্ণ গতিত মেঘালয়ৰ পৰা কয়লাৰ অবৈধ সৰবৰাহ হৈছে । ছিণ্ডিকেট চক্ৰৰ মূল কাম হ’ল দীগৰখাল গেট পাৰ কৰি নির্বিঘ্নে নির্দিষ্ট স্থানলৈ কয়লা ভর্তি ট্রাকসমূহ লৈ যােৱা ।
উত্থাপিত অভিযােগ অনুসৰি, ইতিমধ্যে ৰঙাঘৰৰ আলহী হােৱা কয়লা মাফিয়া আব্দুল আহাদৰ সাংগােপাংগৰ উপৰিও তাহেৰ আহমেদ আৰু তেওঁৰ অনুগত বাহিনীয়ে শেহতীয়াকৈ কয়লা ছিণ্ডিকেটৰ নেতৃত্ব দিছে । সুতাৰকান্দিৰ আন্তঃর্জাতিক সীমান্ত পর্যন্ত কাছাৰ আৰু কৰিমগঞ্জ জিলাৰ মাজেদি কয়লা ভর্তি ট্রাকসমূহ পাৰ কৰি নিয়াৰ বাবে ছিণ্ডিকেট চক্রই গঠন কৰে 'পাছিং গ্রুপ' ।
'পাছিং গ্রুপ'ৰ সদস্য জুৱেৰ আহমেদ, গুলজাৰ আৰু জনৈক সুজামউদ্দিনে কয়লাৰ ট্রাকবােৰ পাৰ কৰায় । এই ক্ষেত্ৰত আৰক্ষী, পৰিবহণ বিষয়াৰ উপৰিও কৰ বিষয়ালৈকে সকলােকে মেনেজ কৰে ছিণ্ডিকেট চক্রই । শাসকীয় দলৰ বিধায়কৰ উপৰিও বিৰােধী দুজন বিধায়কৰ সৈতেও ছিণ্ডিকেট চক্ৰৰ সু-সম্পর্ক আছে বুলি অভিযােগ উত্থাপিত হৈছে । জি এছ টি অবিহনে বিভাগীয় নিদের্শনাক অংগুষ্ঠ দেখুৱাই অভাৰলােড ট্রাক আৰু ডাম্পাৰেৰে সৰবৰাহ কৰা হয় কয়লা ।
ধনৰ বিনিময়ত মৌনতা অৱলম্বন কৰে সংশ্লিষ্ট বিভাগৰ দায়িত্বশীল বিষয়াই । আনকি অবৈধভাৱে বাংলাদেশলৈ কয়লাৰ চোৰাং বেহা দেখিও নেদেখাৰ ভাও ধৰে কাষ্টম, সীমান্তৰ নিৰাপত্তাত থকা বাহিনীয়ে । ক'বলৈ গ'লে ছিণ্ডিকেট চক্রই সকলােকে হাতৰ মুঠিত ৰাখিবলৈ সক্ষম হৈছে । উত্থাপিত অভিযােগ অনুসৰি, বিগত বিধানসভা নির্বাচনত বৰাকৰ ছিণ্ডিকেট চক্ৰৰ পৰা বৃহৎ অংকৰ ধন সংগ্রহ কৰিছিল শাসকীয় দল বিজেপিয়ে ।
এই ক্ষেত্ৰত মধ্যস্থতাকাৰী আছিল বৰাকৰ পৰা এইবাৰ নতুনকৈ বিধানসভালৈ নির্বাচিত হােৱা দুজন বিজেপি বিধায়ক । চর্ত আছিল কয়লাৰ অবৈধ সৰবৰাহৰ সহযােগিতা । সেই অনুসৰিয়েই শেহতীয়াকৈ বৰাকত পূর্ণ গতিত চলিছে কয়লা ছিণ্ডিকেট । সকলো ধৰণৰ ছিণ্ডিকেটৰ বিৰুদ্ধে সততে সৰৱ হৈ থকা মুখ্যমন্ত্রীয়ে কয়লা ছিণ্ডিকেটৰ ক্ষেত্রত কি ব্যৱস্থা গ্ৰহণ কৰে সেয়া লক্ষণীয় হ'ব ।
লগতে পঢ়ক:থাওৰাৰ হিংসাত্মক ঘটনাৰ বাবে ৰাইজৰ দলকে জগৰীয়া কৰিলে মন্ত্ৰী পীযুষ হাজৰিকাই
