গুৱাহাটী,১৯ ডিচেম্বৰ : বুদ্ধিজীৱী ড৹ হীৰেন গোহাঁইৰ মন্তব্যক মিছা আখ্যা দিছিল আছুৱে ৷ আছুৰ সেই মন্তব্যৰ পাচতে পুনৰ সৰৱ হৈ উঠিছে বিশিষ্ট বুদ্ধিজীৱীগৰাকী ৷ ‘‘বৰ্তমান সমাজৰ সকলো কথাই ব্যথিত কৰে । ইয়াৰ মাজত ব্যতিক্ৰম দেখিলে ভাল লাগে ৷’’ মঙলবাৰে গুৱাহাটী প্ৰেছ ক্লাবৰ অতিথি অনুষ্ঠানত উপস্থিত থাকি এই মন্তব্য কৰে বিশিষ্ট বুদ্ধিজীৱি ড৹ হীৰেন গোহাঁয়ে ৷
তেওঁ অনুষ্ঠানতে ভাষা আন্দোলন, অসম অন্দোলন বিশেষকৈ শেহতীয়াভাৱে কা আন্দোলনৰ বিষয়েও বক্তব্য আগবঢ়ায় । শাসক পক্ষই সমালোচনা কৰাৰ পাচত ড৹ হীৰেন গোহাঁইৰ বিৰুদ্ধে কৰা মন্তব্যসমূহৰ বিষয়েও তেওঁ উল্লেখ কৰে ৷ তেওঁ কয়, ‘‘মোক এৰাই চলিব বিচাৰে ৷ অৱহেলা কৰে ৷ অপমান কৰে । এইবোৰ সহ্য কৰি এতিয়া ছাল ডাঠ হৈ গৈছে । ই ডি আৰু আয়কৰ বিভাগহে লগাবলৈ বাকী আছে’’ ৷
আনকি নতুন শিক্ষানীতিক লৈয়ো বিশিষ্ট বুদ্ধিজীৱীগৰাকী উৎসাহিত নহয় বুলি মন্তব্য কৰে । কিয়নো নতুন শিক্ষানীতিয়ে কেৱল কৰ্প'ৰেট গোষ্ঠীকহে সহায় কৰিব বুলি বুদ্ধিজীৱী ড৹ গোহাঁয়ে উল্লেখ কৰে ৷ এই অনুষ্ঠানতে বুদ্ধিজীৱী ড৹ হীৰেন গোহাঁয়ে নিজৰ জীৱনৰ তিতা-মিঠা বহু অভিজ্ঞতাৰ বিষয়ে উপস্থিত ৰাইজৰ আগত ব্যক্ত কৰে ।
আনকি তেওঁ কেমব্ৰীজ বিশ্ববিদ্যালয়ৰ পৰা ডক্টৰেট ডিগ্ৰী লাভ কৰাৰ অন্তত অসমলৈ ঘূৰি অহাৰে পৰা সেই সময়ৰ সমাজ জীৱনৰ বিষয়ে বহু কথা কয় উল্লেখ কৰে ।
অনুষ্ঠানত উপস্থিত সাংবাদিকৰ লগতে ৰাইজক উদ্দেশ্যি তেওঁ কয়, ‘‘জীয়াই থাকিবলৈ উপাৰ্জন কৰিব লাগিব আৰু উপাৰ্জন কৰিবলৈ কষ্ট কৰিব লাগিব । ৰাজ্যক বিকাশৰ দিশে আগবঢ়াই নিবলৈ আমাক চৰকাৰ লাগে । উৰণসেতু, চাৰিলেনযুক্ত ৰাষ্ট্ৰীয় ঘাইপথ নিৰ্মাণৰ নামত হাজাৰ হাজাৰ গছ কটাটো উন্নয়ন নহয়’’ ।
তেওঁ আৰু কয়, ‘‘কৃষকসকলে যাতে বছৰত দুবাৰ খেতি কৰিব পাৰে, তাৰ বাবে চৰকাৰে ব্যৱস্থা কৰিব লাগে’’ ৷
লগতে পঢ়ক : ড৹ হীৰেন গোহাঁইৰ মন্তব্যক ভিত্তিহীন আখ্যা আছুৰ সভাপতি উৎপল শৰ্মাৰ
