গুৱাহাটী, 22 জানুৱাৰীঃ "কলেজ শিক্ষক অথবা চৰকাৰী কৰ্মচাৰীয়ে আন্দোলন কৰিলে কটা হ'ব দৰমহা ৷" বুধবাৰে শিক্ষামন্ত্ৰী হিমন্ত বিশ্ব শৰ্মাই শংকৰদেৱ কলাক্ষেত্ৰত হোৱা শিক্ষা বিভাগৰ এক অনুষ্ঠানৰ অন্তত সংবাদ মাধ্যমক সম্বোধন কৰি সদৰী কৰে এই কথা । লগতে কয়, 'যদি কোনো কলেজ শিক্ষক অথবা চৰকাৰী কৰ্মচাৰীয়ে পাঠদান নকৰি অথবা নিজৰ কার্য নকৰি আন্দোলনত অংশগ্ৰহণ কৰে তেওঁলোকৰ দৰমহা কৰ্তন কৰা হ'ব । লগতে কোনো কলেজ শিক্ষক অথবা চৰকাৰী কৰ্মচাৰীয়ে পাঠদান নকৰি অথবা ডিউটি নকৰি মন্ত্ৰীক লগ কৰিব আহিব নোৱাৰিব বুলিও মন্তব্য কৰে পুনৰ শিক্ষামন্ত্ৰীৰ দায়িত্ব লাভ কৰা মন্ত্ৰী হিমন্তই ।
আনহাতে, সংবাদমেলত নাগৰিকত্ব সংশোধনী আইনকলৈ বিতৰ্ক প্ৰতিযোগিতা আৰু আকস্মিক বক্তৃতা হ'ব লাগে বুলি উল্লেখ কৰে । মন্ত্ৰী শৰ্মাই কয়, 'নাগৰিকত্ব সংশোধনী আইনকলৈ যি ধৰণৰ বিতৰ্ক বা বৌদ্ধিক আলোচনা হ'ব লাগিছিল সেয়া কোনো স্কুল, কলেজতে হোৱা নাই যিটো অতি দুখজনক । মই এই বিষয়ত সকলোকে এই ধৰণৰ আলোচনা কৰিবৰ বাবে আহ্বান জনাইছো ।
উল্লেখ্য যে, 22 জানুৱাৰীত উচ্চতম ন্যায়ালয়ে নাগৰিক্ত সংশোধনী আইনক লৈ দিয়া শুনানিৰ ক্ষেত্ৰত মন্ত্ৰী গৰাকীয়ে কোনো ধৰণৰ মন্তব্য দিয়াৰ পৰা বিৰত থাকে । তেওঁ কয়, "উচ্চতম ন্যায়ালয়ৰ বিচাৰাধীন বিষয়ৰ ওপৰত মই বৰ্তমান একো মন্তব্য কৰিব বিচৰা নাই । সময়ত এই বিষয়ত ক'ব লাগিলে নিশ্চয় আপোনালোকক জনাম।"
আৰু পঢ়কঃ দহ বছৰে বন্ধ পানী যোগান আঁচনিঃ অচিন ৰোগত আক্ৰান্ত স্থানীয় ৰাইজ
