গুৱাহাটী, 28 জানুৱাৰীঃ দিছপুৰ জনতা ভৱনত মন্ত্ৰী হিমন্ত বিশ্ব শৰ্মাৰ সংবাদমেল সম্বোধন । সোমবাৰে স্বাক্ষৰিত হোৱা বড়ো শান্তি চুক্তিক বহল আৰু চূড়ান্ত সমাধান বুলি কয় মন্ত্ৰগৰাকীয়ে ৷ লগতে কয়,বড়োলেণ্ডৰ আন্দোলনত মুঠ 4 হাজাৰ লোকে প্ৰাণ হেৰুৱাবলগীয়া হৈছিল। পূৰ্বৰ বড়ো শান্তি চুক্তিৰ পিছতো সম্পূৰ্ণ ৰূপে শান্তি অহা বুলি আমি ক’ব পৰা নাছিলো।
এনডিএফবিৰ চাৰিটা সংগঠনে সহযোগ কৰে এই তৃতীয় শান্তি চুক্তিখনত। এয়া এক বহল আৰু চূড়ান্ত সমাধান বুলি মন্তব্য কৰে শৰ্মাই । লগতে সংবাদমেলতে ব’হাগ মাহৰ ভিতৰত অসমৰ ভাষা সংস্কৃতি তথা 6 নং দফা কাৰ্যকৰী কৰাৰ ক্ষেত্ৰতো ব্যৱস্থা কৰা হ’ব বুলি জানিবলৈ দিয়ে মন্ত্ৰীগৰাকীয়ে।
ইপিনে পৰেশ বৰুৱাক শান্তি আলোচনাৰ বাবে আহিবলৈ মুকলি আহ্বান জনাই হিমন্ত বিশ্ব শৰ্মাই ৷ শ্বাৰ্জিল ইমামৰ মন্তব্যক সমৰ্থন কৰা হীৰেণ গোহাঁইক লৈও প্ৰতিক্ৰিয়া প্ৰকাশ কৰি মন্ত্ৰীগৰাকীয়ে কয়,‘‘হীৰেণ গোহাঁই ডাঙৰীয়াই সদায় মৌলবাদী মুছলিম পন্থাক সমৰ্থন কৰি আহিছে । মৌলবাদী নেতা মাদানীক সমৰ্থন কৰিছিল হীৰেণ গোহাঁইয়ে। ‘কা’ জাতিধ্বংসী নহয় হীৰেণ গোহাঁই জাতিধ্বংসী ।’’ ইপিনে NRLৰ সন্দৰ্ভতো হিমন্ত বিশ্ব শৰ্মাই কয়, ৰাজহুৱা খণ্ডতেই থাকিব নুমলীগড় শোধনাগাৰ ৷
