গুৱাহাটী, 7 ডিচেম্বৰঃ নাগৰিকত্ব সংশোধনী বিধেয়কৰ বিৰুদ্ধে সমগ্ৰ ৰাজ্যতে ব্যাপক প্ৰতিবাদ চলি থকাৰ সময়তে এই প্ৰতিবাদক এক প্ৰকাৰ কটাক্ষ কৰিছে ৰাজ্যৰ বিত্ত তথা স্বাস্থ্যমন্ত্ৰী হিমন্ত বিশ্ব শৰ্মাই ৷ মন্ত্ৰীগৰাকীৰ মতে, নাগৰিকত্ব সংশোধনী বিধেয়কৰ বিৰুদ্ধে আশাপ্ৰদভাৱে হোৱা নাই আন্দোলন ৷ মন্ত্ৰীগৰাকীৰ এই বক্তব্যই যেন উপলুঙা কৰিছে সমগ্ৰ ৰাজ্যতে বিভিন্ন দল সংগঠনৰ ছাত্ৰ-ছাত্ৰী, চিকিৎসক-উকিল, সাংবাদিক আদি সকলো স্তৰৰ লোকে সাব্যস্ত কৰা নাগৰিকত্ব সংশোধনী বিধেয়ক বিৰোধী প্ৰতিবাদক ৷ ৰাজ্যত যেন ইয়াতকৈ অধিক অশান্তিকৰ পৰিস্থিতিৰ সৃষ্টি হোৱাতো কামনা কৰিছে হিমন্ত বিশ্ব শৰ্মাই, সেয়া তেখেতৰ এই বক্তব্যত প্ৰতিফলিত হৈছে ৷ লগতে তেওঁ কয় যে, অমিত শ্বাহৰ সৈতে হোৱা অসমৰ জাতীয় দল সংগঠনৰ আলোচনাৰ পিচতেই ইতিবাচক প্ৰভাৱ পৰিছে ৰাজ্যত ৷ ৯ ডিচেম্বৰত সংসদত বিলখন উত্থাপন হোৱাৰ পিচত আৰু অধিক ইতিবাচক প্ৰভাৱ পৰিব বুলি আশাবাদী মন্ত্ৰী গৰাকী ৷
ইয়াৰ সমান্তৰালকৈ অতিপূৰ্বে প্ৰকাশিত এন আৰ চিৰ চূড়ান্ত তালিকাক লৈও পুনৰ অসন্তুষ্টি ব্যক্ত কৰে হিমন্ত বিশ্ব শৰ্মাই ৷ পূৰ্বতেই NRC ত কেলেংকাৰী কথা মই উল্লেখ কৰিছিলো আৰু সংবাদমাধ্যত প্ৰকাশ হোৱা বাতৰি সত্য সত্যতা আছে বুলি উল্লেখ কৰে মন্ত্ৰী শৰ্মাই । কেৱল CAG ৰ প্ৰতিবেদনত উল্লেখ থকা কেলেংকাৰীৰ উপৰিও আৰু বহু বিত্তীয় খেলিমেলি আছে । এই সকলোবোৰ সামৰি অতি সোনকালে তদন্তৰ ব্যৱস্থা কৰা হ'ব । Accountant Generalত বিষয়টো পৰ্যবেক্ষণ কৰি বিধানসভাত বিষয়টো আলোচনা হ'ব বুলি মন্তব্য কৰে মন্ত্ৰী হিমন্ত বিশ্ব শৰ্মাই ।
উল্লেখ্য যে, শনিবাৰে পুৱা লাচিত ঘাট পৰ্যবেক্ষণ কৰিলে মন্ত্ৰী হিমন্ত বিশ্ব শৰ্মাই ৷ ১৫ ডিচেম্বৰত অসমলৈ আহিব ভাৰত আৰু জাপানৰ প্ৰধানমন্ত্ৰী ৷ যাৰ বাবে আটক ধুনীয়াকৈ সজাই পৰাই তোলা হৈছে ব্ৰহ্মপুত্ৰৰ পাৰৰ লগতে গুৱাহাটী মহানগৰীৰ বিভিন্ন প্ৰান্ত৷ মহানগৰীখন স্বচ্ছ-নিকা কৰি ৰাখিবৰ বাবে মহানগৰবাসীক আহ্বান মন্ত্ৰী গৰাকীৰ ৷
