গুৱাহাটী, 9 অক্টোবৰঃ বিদেশী চিনাক্তকৰণৰ বাবে গঠন কৰা বিদেশী ন্যায়াধীকৰণৰ আজৱ কাণ্ড ৷ বিদেশী ন্যায়াধীকৰণৰ কাণ্ড দেখি হতবাক খোদ গুৱাহাটী উচ্চ ন্যায়ালয় ৷ যাৰ বাবে 2018 চনৰ জুন মাহতে গুৱাহাটী উচ্চ ন্যায়ালয়ে ৰুজু কৰিছিল নিজাববীয়া গোচৰ ৷
এই ঘটনা সংঘটিত হৈছিল মৰিগাঁৱৰ 4নং বিদেশী ন্যায়াধীকৰণত ৷ ন্যায়াধীকৰণৰ পূৰ্বৰ এগৰাকী সদস্যই তেওঁৰ কাৰ্যকালত মীমাংসা কৰিছিল 288 টা গোচৰ ৷ কোনো বৈধ তথ্য-পাতি প্ৰমাণ নকৰাকৈ 288ৰ ভিতৰত 57 টা গোচৰৰ হকে-বিহকে ৰায়দান প্ৰদান কৰিছিল সদস্যগৰাকীয়ে ৷ গোচৰসমূহৰ অধিকাংশৰে কোনো শুনানীৰ লগতে বৈধ তথ্য-পাতিও পৰীক্ষা কৰা হোৱা নাছিল ৷ পৰৱৰ্তী সময়ত গুৱাহাটী উচ্চ ন্যায়ালয়ৰ লক্ষ্যলৈ আহিছিল সমগ্ৰ ঘটনাটো ৷ যাৰ বাবে 2018 চনৰ জুন মাহত নিজাববীয়াকৈ গোচৰ ৰুজু কৰি তদন্ত আৰম্ভ কৰিছিল ন্যায়ালয়ে ৷
অৱশেষত সমগ্ৰ প্ৰক্ৰিয়াটোৰে অনুসন্ধান চলায় গুৱাহাটী উচ্চ ন্যায়ালয়ে ৷ অনুসন্ধানৰ অন্তত 288টা গোচৰৰ সকলো তথ্য-পাতি জব্দ কৰিবলৈ গৃহ বিভাগক নিৰ্দেশনা প্ৰদান কৰে ন্যায়ালয়ে ৷ ন্যায়াধীশ কল্যান ৰাই চুৰানা আৰু মনোজিৎ ভূঞাৰ বিচাৰপীঠে 57টা গোচৰ খাৰিজ কৰে ৷
