গুৱাহাটী, 21 আগষ্টঃ অসম লোকসেৱা আয়োগৰ পৰীক্ষাত প্ৰৱৰ্তন হ'ব নতুন বিধি ৷ গুৱাহাটী উচ্চ ন্যায়ালয়ৰ এই ৰায়দান ৷ মঙলবাৰে ন্যায়ালয়ৰ ৰায়ৰ কথা সংবাদমেল যোগে অৱগত কৰে ফাইট এগেইনষ্ট জাষ্টিচ অৱ এ পি এচ চি নামৰ সংগঠনটোৱে ।
ফাইট এগেইনষ্ট জাষ্টিচ অৱ এ পি এছ চি নামৰ সংগঠনটোৱে আয়োগৰ পৰীক্ষাৰ নীতি সলনিৰ বাবে দীৰ্ঘদিনৰে পৰা আইনী যুজঁ অৱতীৰ্ণ হৈছিল । পুৰণিকলীয়া নিয়মৰ মাজেৰে অনুষ্ঠিত হোৱা এ পি এছ চি পৰীক্ষাত মেধাৰ পৰিৱৰ্তে বহু লোকে টকাৰ যোগেদিহে চাকৰি লাভ কৰি আহিছিল । যাৰ বাবে বহু উপযুক্ত প্ৰাৰ্থী বাদ পৰি ৰৈছিল । ফলত আয়োগৰ সংস্কাৰ বাবে এই সকল ভুক্তভোগীৰে গঠিত এই ফৰামে আইনী যুজঁ অব্যাহত ৰাখিছিল । উল্লেখ্য যে, ন্যায়লয়ৰ নিৰ্দেশৰ পাছতো কিন্তু আয়োগে নতুন বিধি বলবৎ কৰা নাই । এই নতুন বিধি প্ৰৱৰ্তন হ'লে মেধা প্ৰাৰ্থীয়ে পোনপটীয়াকৈ চাকৰি পোৱাৰ সুবিধা লাভ কৰিব । লিখিত পৰীক্ষাৰ 12.2% তকৈ বেছি নম্বৰ সাক্ষাৎকাৰত দিব নোৱাৰিব বুলিও স্পষ্ট কৰি দিয়ে এই নিৰ্দেশত । আশা কৰা হৈছে এই নতুন বিধিয়ে আয়োগৰ সংস্কাৰ সাধন কৰাৰ লগতে মেধাসকলক উৎসাহিত কৰিব ।
