গুৱাহাটী, ১৮ ছেপ্টেম্বৰ: এইবাৰ কংগ্ৰেছ নেত্ৰী প্রাক্তন সাংসদ ৰাণী নৰহলৈ মুখ্যমন্ত্ৰীৰ তদাৰকী কোষৰ চমন ৷ এই চমন অনুসৰি কাইলৈ অৰ্থাৎ মঙলবাৰে মুখ্যমন্ত্ৰীৰ তদাৰকী কোষৰ সন্মুখত হাজিৰ হ’ব লাগিব ৰাণী নৰহ ৷ কংগ্ৰেছৰ প্ৰাক্তন সাংসদগৰাকীৰ বিৰুদ্ধে সাংসদ পুঁজিৰ ধন অপব্যৱহাৰৰ অভিযোগ ৷ এই অভিযোগৰ তদন্তৰ বাবেই সাংসদগৰাকীক মুখ্যমন্ত্ৰীৰ তদাৰকী কোষে চমন জাৰি কৰিছে ৷
ৰাণী নৰহৰ সাংসদ হৈ থকা সময়ত ২০১৩-১৪ চনৰ সাংসদ পুঁজিত কেলেংকাৰীৰ এক পুৰণি অভিযোগ আছে তেওঁৰ বিৰুদ্ধে ৷ এই সময়চোৱাত ৰাণী নৰহৰ যোৰহাট জিলাত হেণ্ড টিউবৱেল বহুওৱাৰ নামত কেলেংকাৰীৰ অভিযোগ উঠিছিল ৷ সেই অনুসৰি ইতিপূৰ্বে এই কামৰ দুৰ্নীতিৰ অভিযোগত ২০১৭ চনত এক গোচৰ ৰুজু হৈছিল ৷ ২০১৯তো মুখ্যমন্ত্ৰীৰ তদাৰকী কোষৰ পৰা চমন গৈছিল ৰাণী নৰহলৈ ৷ ২০১৯পৰা ২০২৩লৈ গোচৰটোৰ কোনো অগ্ৰগতি দেখা পোৱা হোৱা নাছিল ৷
উল্লেখনীয় যে সুদীৰ্ঘ সময় দলীয় ৰাজনীতিত নিষ্ক্ৰিয় হৈ আছিল ৰাণী নৰহ ৷ কিন্তু লোকসভা নিৰ্বাচন কাষ চপাৰ লগে লগে শেহতীয়াকৈ লখিমপুৰ লোকসভা সমষ্টিত ৰাণী নৰহক কুচকাৱাজ চলোৱা দেখা পোৱা গৈছে । বিপৰীতে ৰাণী নৰহৰ স্বামী কংগ্ৰেছ বিধায়ক ভৰত নৰহৰ বিৰুদ্ধেও যোৱা দুদিন ধৰি বিজেপিৰ লখিমপুৰৰ বিধায়ক মানৱ ডেকাই ভূমি কেলেংকাৰীৰ অভিযোগ উত্থাপন কৰি দুখনকৈ সংবাদমেলত বিস্ফোৰক অভিযোগ উত্থাপন কৰিছে ৷
নাওবৈছা সমষ্টিৰ কংগ্ৰেছৰ বিধায়ক স্বামী ভৰত নৰহেও মুখ্যমন্ত্ৰীৰ পত্নীৰ শেহতীয়া ভূমি কেলেংকাৰী আৰু ৰাজসাহাৰ্য বিতৰ্কত সদনৰ বাহিৰে-ভিতৰে সৰৱ হৈ পৰা দেখা পোৱা গৈছিল ৷ এতিয়া কাইলৈ মুখ্যমন্ত্ৰীৰ তদাৰকী কোষৰ চমন অনুসৰি কংগ্ৰেছৰ প্ৰাক্তন সাংসদ ৰাণী নৰহ উপস্থিত হয়নে নাই সেয়া হ’ব লক্ষণীয় ৷
