নিউজ ডেস্ক, 24 নৱেম্বৰ : অতিশীঘ্ৰে গেৰুৱা দল বিজেপিত যোগ দিব প্ৰাক্তন আছু নেতা দিব্যজ্যোতি মেধিয়ে ৷ ইতিমধ্যে বিজেপিত যোগদানৰ প্ৰাৰম্ভিক সকলো প্ৰস্তুতি সম্পূৰ্ণ হৈছে ৷ সকলো যদি ঠিকে-থাকে থাকে, তেন্তে আগন্তুক কেইদিনমানৰ ভিতৰতে তেওঁ বিজেপিত যোগ দিয়াটো নিশ্চিত ৷
উল্লেখ্য যে, সদৌ অসম ছাত্ৰ সন্থাৰ নেতৃত্বক তীক্ষ্ণ সমালোচনা কৰাৰ ফলত সংগঠনটোৰ পৰা অপসাৰিত হ’বলগীয়া হৈছিল দিব্যজ্যোতি মেধি ৷ মূলতঃ একাংশ বয়স ওকলি যোৱা অ-ছাত্ৰৰ নেতৃত্বত সদৌ অসম ছাত্ৰ সন্থা পৰিচালিত হৈ আহিছে বুলি তেওঁ ৰাজহুৱাভাৱে অভিযোগ তোলাৰ পাচত এই সমগ্ৰ বিষয়টো ন্যায়ালয়ৰ মজিয়া পাইছিলগৈ ৷ পৰৱৰ্তী সময়ত আছুৱে তেওঁক অপসাৰণ কৰা বিষয়টোত স্থগিতাদেশ জাৰি কৰাত তেওঁ পুনৰ বাহাল আছিল আছুৰ মজিয়াতেই ৷
কিন্তু বিগত 21 নৱেম্বৰত দিব্যজ্যোতি মেধিয়ে আনুষ্ঠানিকভাৱে আছুৰ পৰা পদত্যাগ কৰে আৰু মৰিগাঁৱত চলি থকা আছুৰ কেন্দ্ৰীয় অধিৱেশনত উপস্থিত থকাৰ পৰাও বিৰত থাকে ৷ আছুৰ পৰা আনুষ্ঠানিকভাৱে বিদায় লোৱাৰ পাচতেই এতিয়া তেওঁ সাজু হৈছে বিজেপিত যোগদানৰ বাবে ৷ ইতিমধ্যে আজিৰ তাৰিখত ৰাজ্য চৰকাৰৰ এগৰাকী প্ৰভাৱশালী মন্ত্ৰীৰ লগত দুবাৰকৈ এই বিষয়টোক লৈ টেলিফোনিক আলোচনা কৰাৰ উপৰিও 22 নৱেম্বৰত উক্ত মন্ত্ৰীগৰাকীৰ সৈতে আলোচনাতো বহিছে দিব্যজ্যোতি মেধি ৷
বৃহস্পতিবাৰে নিশা সংশ্লিষ্ট প্ৰভাৱশালী মন্ত্ৰীগৰাকীৰ লগত একেলগে মুখ্যমন্ত্ৰীৰ সৈতেও দিব্যজ্যোতি মেধি আলোচনাত বহাৰ কথা আছিল যদিও মুখ্যমন্ত্ৰীগৰাকী ৰাজস্থানৰ নিৰ্বাচনী প্ৰচাৰত ব্যস্ত থকাৰ বাবে যোৱানিশা সেয়া সম্ভৱ হৈ নুঠিল ৷
কিন্তু আজি অথবা দুই-এদিনৰ ভিতৰতে মুখ্যমন্ত্ৰীৰ সৈতে আলোচনাত মিলিত হৈ আনুষ্ঠানিকভাৱে তেওঁ বিজেপিত যোগ দিয়াটো নিশ্চিত হৈছে ৷ এই সম্ভাৱনা অস্বীকাৰো কৰা নাই দিব্যজ্যোতি মেধিয়ে ৷ ইটিভি ভাৰতৰে হোৱা এক টেলিফোনিক বাৰ্তালাপত আজি তেওঁ স্পষ্টকৈ কয় যে বিশেষ এক পাৰিবাৰিক সমস্যাৰ বাবে এই প্ৰক্ৰিয়া কিছু পলম হৈছে ৷
তেওঁ কয়, ‘‘ মোৰ আইতা বৰ্তমান এপ’ল’ হাস্পতালৰ ভেন্টিলেশ্যনত আছে ৷ তেওঁৰ স্বাস্থ্যৰ অৱস্থা খুবেই সংকটজনক ৷ গতিকে বৰ্তমান প্ৰতিটো মুহূৰ্ত মই আইতাৰ সৈতে কটাবলগীয়া হৈছে ৷ মোৰ বাবে এই সময়ত এয়া মোৰ প্ৰধান দায়িত্ব ৷ আশা কৰিছোঁ , খুব সোনকালে আমাৰ পৰিয়ালটোলৈ এটা স্বাভাৱিক অৱস্থা ঘূৰি আহিব ৷ গতিকে তেতিয়াই মই বিজেপিত যোগদানৰ সমস্ত বিষয়টো ৰাইজক স্পষ্টভাৱে অৱগত কৰিম ৷’’
লগতে পঢ়ক : আছুৰ মৰিগাঁও অধিৱেশনত বৃদ্ধ ছাত্ৰনেতাৰ প্ৰৱেশ নিষিদ্ধৰ আহ্বান
