গুৱাহাটী, 13 আগষ্ট : মাজত মাত্ৰ এটা দিন বাকী ৷ দেশ তথা ৰাজ্যবাসী ব্যস্ত 77 সংখ্যক স্বাধীনতা দিৱস উদযাপনৰ প্ৰস্তুতিত ৷ ইয়াৰ মাজতে শুকুৰবাৰে সংঘটিত এক অঘটন ৷ আগন্তুক স্বাধীনতা দিৱসৰ কাৰ্যসূচীত অংশগ্ৰহণৰ উদ্দেশ্যৰে গুৱাহাটীৰ খানাপাৰাৰ পশু চিকিৎসা মহাবিদ্যালয়ৰ খেলপথাৰত অনুষ্ঠিত হৈ থকা পেৰেড অনুশীলনত ব্যস্ত হৈ আছিল কুকিল দত্ত নামৰ এজন জোৱান ৷ কিন্তু অতি ৰহস্যজনকভাৱে পেৰেড অনুশীলন চলি থকাৰ মাজতেই মৃত্যু হয় অসম আৰক্ষীৰ অনাতাঁৰ সংগঠনত কৰ্মৰত জোৱানজনৰ ৷
শনিবাৰে দীঘলীপুখুৰীস্থিত ৱাৰ মেম’ৰিয়েলৰ সন্মুখত পেৰেডৰ অনুশীলন চাবলৈ উপস্থিত হয় আৰক্ষী সঞ্চালক জি পি সিং । আৰক্ষী জোৱান কুকিল দত্তৰ মৃত্যু সন্দৰ্ভত সাংবাদিকৰ প্ৰশ্নৰ উত্তৰত পেৰেড গ্ৰাউণ্ডতে DGP জি পি সিঙে কয় যে, আৰক্ষী জোৱানজনৰ মৃত্যুৰ তদন্ত কৰিবলৈ দায়িত্ব দিয়া হৈছে TRAINING AND ARMS বিভাগক ৷
জানিব পৰা মতে, বিগত কিছু দিনত ইতিমধ্যে তিনিজন আৰক্ষী বিষয়াৰ মৃত্যু হৈছে । এই সন্দৰ্ভত বিভাগীয় কৰ্তৃপক্ষক বিতংভাৱে তদন্ত কৰাৰ নিৰ্দেশ প্ৰদান কৰে অসম আৰক্ষী সঞ্চালকগৰাকীয়ে ৷ লগতে মৃত্যু হোৱা আৰক্ষী জোৱান কুকিল দত্তৰ মেডিকেল ৰিপ’ৰ্ট কোনো তথ্য ওলোৱা নাই বুলিও মন্তব্য কৰে আৰক্ষী সঞ্চালক জি পি সিঙে ৷
সকলোৰে জ্ঞাত যে স্বাধীনতা দিৱসৰ পূৰ্বে অকাল মৃত্যুক সাৱটি লৈছিল অসম আৰক্ষীত কৰ্মৰত জোৱান কুকিল দত্তই ৷ অসম আৰক্ষীৰ অনাতাঁৰ সংগঠনত কৰ্মৰত জোৱান কুকিল দত্তৰ অকাল মৃত্যুৱে শোকস্তব্ধ কৰি তুলিছে সমগ্ৰ লখিমপুৰৰ গড়েহগা ঢেকিয়াল গাঁওবাসী ৷ উল্লেখ্য যে, কৰ্মসূত্ৰে কুকিল তেজপুৰত নিযুক্ত হৈ আছিল । সমাগত স্বাধীনতা দিৱসৰ পেৰেডত অংশগ্ৰহণৰ বাবে তেওঁক গুৱাহাটীলৈ পঠোৱা হৈছিল ৷ শুকুৰবাৰে পেৰেড অনুশীলনৰ সময়ত অসুস্থ হৈ আকস্মিক মৃত্যুক সাৱটি লয় কুকিলে ।
আনহাতে, শনিবাৰে আৰক্ষী সঞ্চালক জি পি সিঙে সকলো ৰাইজকে স্বাধীনতা দিৱসৰ সকলো কাৰ্যসূচী উপভোগ কৰিবলৈ আহ্বান জনায় ৷ লগতে তেওঁ খানাপৰাৰ প্ৰস্তুতি প্ৰায় সম্পন্ন হৈছে বুলিও মন্তব্য কৰে ৷
লগতে পঢ়ক : SPRO Kukil Dutta died : গুৱাহাটীত পেৰেড অনুশীলনত SPRO কুকিল দত্তৰ অকাল মৃত্যু; ৰহস্য ঘনীভূত
