গুৱাহাটী, ২৮ নৱেম্বৰ: পৰিৱেশত পৰিব পৰা গুৰুতৰ প্ৰভাৱৰ প্ৰতি আওকাণ কৰি ৰাজ্যত চলিছে বনজ সম্পদৰ ধ্বংস যজ্ঞ । ৰাজ্য়ত এতিয়া উন্নয়নৰ নামত চলিছে বনজ সম্পদৰ ধ্বংস যজ্ঞ । ১৭ নং ৰাষ্ট্ৰীয় ঘাইপথ বহলীকৰণৰ নামত বনজ সম্পদৰ ধ্বংস যজ্ঞ কৰাক লৈ ৰাজ্যজুৰি প্ৰতিক্ৰিয়াৰ সৃষ্টি হৈছে । তথ্য় অনুসৰি ১৭ নং ৰাষ্ট্ৰীয় ঘাইপথ বহলীকৰণৰ নামত ২৭,৯৫০ জোপা গছ কটা যাব । ৰাষ্ট্ৰীয় ঘাইপথ প্ৰাধীকৰণ কৰ্তৃপক্ষই সদৰী কৰা মতে, ১৭ নং ৰাষ্ট্ৰীয় ঘাইপথ বহলীকৰণৰ নামত গোৱালপাৰাত ১৬,৪৫০ জোপা গছ আৰু কামৰূপ গ্ৰাম্যত ১১,৫০০ জোপা গছ কটা যাব ।
ৰাষ্ট্ৰীয় ঘাইপথ প্ৰাধিকৰণ কৰ্তৃপক্ষই এই সন্দৰ্ভত কয় যে গুৱাহাটীৰ পৰা গোৱালপাৰালৈ ১২৮ কিলোমিটাৰ পথ বহল কৰাৰ বাবে বহু প্ৰত্যাহ্বানৰ সন্মুখীন হ'ব লগা হৈছে । কিয়নো পথটোৰ দুয়োফালে সংৰক্ষিত বনাঞ্চল । ১৭নং ৰাষ্ট্ৰীয় ঘাইপথটো ৬০ মিটাৰ বহল কৰিব লাগিছিল । কিন্তু গছ যাতে বেছি কটা নাযায় তাৰ প্ৰতি লক্ষ্য ৰাখি ৪০ মিটাৰ বহল কৰা হ'ব । বৰ্তমান পথটো ১২ মিটাৰ বহল । পথটোৰ দুয়োকাষে ২৪ মিটাৰকৈ বহল কৰিব লাগিছিল যদিও পথটোৰ দুয়োকাষে ১৪ মিটাৰকৈ বহল কৰা হ'ব ।
ইতিমধ্যে গোৱালপাৰাত ৬০% কাম সম্পূৰ্ণ হৈছে । ইপিনে পথটো বহলীকৰণৰ নামত বনাঞ্চল ধ্বংস হোৱাৰ বাবে বণ্যপ্ৰাণী আৰু মানুহৰ মাজত সৃষ্টি হ'ব পৰা সাম্ভাব্য সংঘাতৰ বাবে প্ৰকল্পটোৰ মুঠ বাজেটৰ পৰা ২.৫ % ধন চৰকাৰক জমা দিয়া বুলি সূত্ৰটোৱে প্ৰকাশ কৰে ।
ইপিনে,পথটো বহলীকৰণৰ নামত হাজাৰ হাজাৰ গছ কটাৰ ফলত প্ৰতিক্ৰিয়া সৃষ্টি হোৱাৰ লগতে প্ৰতিবাদো হৈছে । আন্তঃৰাষ্ট্ৰীয় খ্যাতিসম্পন্ন চলচ্চিত্ৰ পৰিচালক ৰীমা দাস আৰু অভিনেতা আদিল হুছেইনেও প্ৰতিক্ৰিয়া প্ৰকাশ কৰিছে । উল্লেখ্য যে এই ১৭ নং ৰাষ্ট্ৰীয় ঘাইপথ পশ্চিম বংগ হৈ ধুবুৰী, উত্তৰ শালমাৰা, বঙাইগাঁও, গোৱালপাৰা, বকো হৈ গুৱাহাটী আৰু মেঘালয় সংযোগী ২৭ নং ৰাষ্ট্ৰীয় ঘাইপথৰ লগত সংলগ্ন হৈ আছে । ৰাষ্ট্ৰীয় ঘাইপথ প্ৰাধিকৰণে ইতিমধ্যে গোৱালপাৰাৰ পৰা গুৱাহাটীলৈ ১৭ নং ৰাষ্ট্ৰীয় ঘাইপথটো ৪ লেনযুক্তকৈ নিৰ্মাণ কৰাৰ বাবে বহল কৰাৰ কাম আৰম্ভ কৰিছে । ইয়াৰ বাবে প্ৰায় ২৭,৯৫০ জোপা গছ কটাৰ সিদ্ধান্ত গ্ৰহণ কৰিছে । কিন্তু গছ কটাৰ বিৰুদ্ধে ৰাষ্ট্ৰীয় সেউজ ন্যায়াধীশকৰণে গ্ৰহণ এটা গোচৰৰ শুনানী অহা ১০ জানুৱাৰীত হ'ব ।
লগতে পঢ়ক:বিজেপিয়ে ৫ ৰাজ্যৰ এখনতো চৰকাৰ গঠন কৰিব নোৱাৰে: ভূপেন বৰা
