গুৱাহাটী, ১৬ অক্টোবৰ: অসম আৰক্ষীৰ প্ৰশ্নকাকত কেলেংকাৰীৰ ঘটনাই বাৰুকৈয়ে জোকাৰণি তুলিছে ৰাজধানী দিছপুৰত। ইতিমধ্যে আৰক্ষী অধীক্ষক কুমাৰ সঞ্জিৎ কৃষ্ণৰ গ্ৰেপ্তাৰে যেন সেই জোকাৰণি দুগুণে বৃদ্ধি কৰিছে । সঞ্জিৎ কৃষ্ণৰ গ্ৰেপ্তাৰে বহু নতুন দিশ উন্মোচিত কৰিছে । এই কথা নকলেও চলে যে, গ্ৰেপ্তাৰ হোৱা আৰক্ষী অধীক্ষক কুমাৰ সঞ্জিৎ কৃষ্ণ হৈছে ৰাজ্যৰ মুখ্য সচিব কুমাৰ সঞ্জয় কৃষ্ণৰ ভাতৃ ।
সঞ্জিৎ কৃষ্ণৰ গ্ৰেপ্তাৰে কেৱল মুখ্য সচিব ভাতৃকেই অস্বস্তিত পেলোৱা নাই; অস্বস্তিত পেলাইছে মুখ্যমন্ত্ৰীকো । কিয়নো ৩১ অক্টোবৰত অৱসৰ গ্ৰহণ কৰিবলগীয়া মুখ্য সচিব কুমাৰ সঞ্জয় কৃষ্ণৰ কাৰ্যকাল আৰু ছমাহৰ বাবে বৃদ্ধিৰ পোষকতা কৰিছিল স্বয়ং মুখ্যমন্ত্ৰীয়েই । কিয়নো সমূখত নিৰ্বাচন। আগন্তুক সময়চোৱাত ৰাজ্য প্ৰশাসনৰ দায়িত্ব কুমাৰ সঞ্জয় কৃষ্ণৰ হাততে ন্যস্ত থকাটো বিচাৰিছিল মুখ্যমন্ত্ৰীয়ে । কিন্তু সঞ্জিৎ কৃষ্ণৰ গ্ৰেপ্তাৰে যেন বহু ৰাজনৈতিক হিচাপ নিকাচ উলট-পালট কৰি দিলে । ভাতৃক লৈ অস্বস্তিত পৰা কুমাৰ সঞ্জয় কৃষ্ণক এতিয়া পুনৰ ছমাহৰ বাবে কাৰ্যকাল বৃদ্ধি কৰি মুখ্য সচিব পদত অধিস্থিত কৰি ৰখা নৰখাক কেন্দ্ৰ কৰি দিছপুৰত আৰম্ভ হৈছে এক নতুন জোকাৰণি ।
লগতে পঢ়ক: বান সমস্যা সমাধানক লৈ একত্ৰিত যুৱ সমাজৰ পৰিকল্পনা
