গুৱাহাটী,28 মাৰ্চ : অসমৰ কেইবাখনো আগশাৰীৰ বাতৰি কাকতত দেওবাৰে প্ৰকাশিত বিজেপিৰ এটা বিজ্ঞাপনক লৈ তীব্ৰ প্ৰতিক্ৰিয়া প্ৰকাশ কৰিছে কংগ্ৰেছ দলে । কাকতৰ শিৰোনামত বাতৰি আৰ্হিত প্ৰকাশ কৰা বিজেপিৰ বিজ্ঞাপনটোৱে নিৰ্বাচনী আচৰণ বিধি উলংঘাৰ অভিযোগ উত্থাপন কৰিছে কংগ্ৰেছে । এইক্ষেত্ৰত কংগ্ৰেছে ৰাজ্যৰ মুখ্য নিৰ্বাচনী বিষয়াৰ ভূমিকাক লৈ সন্দেহৰ আঙুলি টোৱাইছে । লগতে তেওঁ পক্ষপাতমূলক আচৰণ কৰা বুলিও অভিযোগ উত্থাপন কৰিছে । ইতিমধ্যে এই বিষয়টো সন্দৰ্ভত প্ৰদেশ কংগ্ৰেছৰ আইনী বিভাগৰ তৰফৰ পৰা দেশৰ মুখ্য নিৰ্বাচন আয়ুক্ত আৰু ৰাজ্যৰ মুখ্য নিৰ্বাচনী বিষয়ালৈ অভিযোগ পত্ৰ প্ৰেৰণ কৰা হয় ।
বিষয়টো সন্দৰ্ভত প্ৰদেশ কংগ্ৰেছে গুৱাহাটী স্থিত ৰাজীৱ ভৱনত এখন সংবাদমেল অনুষ্ঠিত কৰি নিজৰ প্ৰতিক্ৰিয়া ব্যক্ত কৰে । সংবাদমেলত কংগ্ৰেছৰ ৰাষ্ট্ৰীয় মুখপাত্ৰ গৌৰৱ বল্লভে কয় যে,‘‘ফাকুৱাৰ সময়ত ধেমালি কৰাৰ এটা পৰম্পৰা আছে । সেই পৰম্পৰাৰে বিজেপিয়ে বাতৰি কাক যোগে ধেমালি কৰিলে যদিও ফাকুৱা বুলি ধেমালি কৰাৰ কথা উল্লেখ নকৰিলে । তেওঁলোকে তেওঁলোকৰ কৰ্মকৰ্তাক ধন্যবাদ দিয়াৰ কথা কৈছে । কিন্তু তেওঁলোকে দল গঠন কৰা লাল কৃষ্ণ আদৱানী নাইবা মুৰলী মনোহৰ যোশীক কেতিয়াও ধন্যবাদ নিদিলে’’ ।
লগতে তেওঁ কয় যে, ‘‘তেওঁলোকে ‘উজনিৰ আটাইকেইটা সমষ্টিতে বিজেপিৰ নিশ্চিত জয়’ বুলি লিখিছে । তেওঁলোকে ইমানদিনে মুখেৰে কৈ থকা ‘ঝুমলা’ক এইবাৰ লিখিত ৰূপ দিলে । কিন্তু এনেধৰণৰ বিভ্ৰান্তিকৰ ঝুমলাবাজীৰে তেওঁলোকে ভোটাৰ ৰাইজৰ উপলুঙা কৰিলে । ভোটাৰ ৰাইজে এনেধৰণৰ উপলুঙা-অপমান তথা ধেমালি কেতিয়াও সহ্য নকৰে । ইয়াৰ প্ৰত্যুত্তৰ বিজেপিয়ে নিশ্চয় পাব । এনেধৰণৰ মিছা প্ৰচাৰেৰে ভোটাৰক নিজৰ অধীন কৰিম বুলি ভাবিলে বিজেপিয়ে ভুল কৰা হ’ব । বিজেপিয়ে নিৰ্বাচনী আচৰণ বিধি উলংঘা কৰা বিষয়টোক লৈ আইনী প্ৰক্ৰিয়াৰে যোৱা হ’ব’’ ।
উক্ত সংবাদমেলত প্ৰদেশ কংগ্ৰেছৰ আইনী বিভাগৰ অধ্যক্ষ অধিবক্তা নিৰেণ বৰাই কয় যে, ‘‘আজি অসমৰ কেইবাখনো বাতৰি কাকতত বিজেপিৰ এটা বিজ্ঞাপন বাতৰি আকাৰে প্ৰকাশ পাইছে । বিজ্ঞাপন এটা প্ৰকাশ কৰাৰ পূৰ্বে কিছুমান নিয়ম ৰাজনৈতিক দল, মুখ্য নিৰ্বাচনী বিষয়া আৰু কাকত গোষ্ঠীয়ে মানি চলিব লাগে । বিজেপিৰ বাতৰি আকাৰে প্ৰকাশ পোৱা বিজ্ঞাপনটো যদি মুখ্য নিৰ্বাচনী বিষয়াৰ অনুমতি সাপেক্ষে দিয়া হৈছে, তেন্তে এইক্ষেত্ৰত আমাৰ মুখ্য নিৰ্বাচনী বিষয়াৰ প্ৰতি সন্দেহ আছে । নিৰ্বাচনী আচৰণ বিধি প্ৰযোজ্য হৈ থকাৰ সময়ত তেওঁ নিকা-স্বচ্ছতা অৱলম্বন কৰা নাই । তেওঁ সম্পূৰ্ণ পক্ষপাতমূলক আচৰণ কৰি বিজেপিক সহায় কৰিছে ।
ইয়াৰোপৰি তেওঁ কয় যে, ‘‘উজনিৰ আটাইকেইটা সমষ্টিতে বিজেপিৰ নিশ্চিত জয়- এইটো এটা বাতৰিৰ শিৰোনাম । এই বিজ্ঞাপনটো দিয়াৰ পূৰ্বে সংশ্লিষ্ট কাকত গোষ্ঠীয়েও এইটো চাব লাগিছিল যে ইয়াৰ দ্বাৰা নিৰ্বাচনী আচৰণ বিধি উলংঘা হ’ব । নিৰ্বাচনী আচৰণ বিধি উলংঘা কৰা এই বিজ্ঞাপনটোক লৈ আমি দেশৰ নিৰ্বাচনী আয়োগ আৰু ৰাজ্যৰ মুখ্য নিৰ্বাচনী বিষয়ালৈ অভিযোগ পত্ৰ প্ৰেৰণ কৰিছো । আমি বিষয়টোৰ ক্ষেত্ৰত বিহিত ব্যৱস্থা গ্ৰহণৰ দাবী জনাইছো । লগতে বাকী দুটা পৰ্যায়ৰ নিৰ্বাচন স্বচ্ছ আৰু নিকাভাৱে অনুষ্ঠিত কৰাৰ ক্ষেত্ৰত এনেধৰণৰ বিশেষজ্ঞ প্ৰকাশত বাধা প্ৰদানৰ দাবী জনাইছো’’ ।
উল্লেখ্য যে, বিজ্ঞাপনযোগে বিজেপিয়ে নিৰ্বাচনী আচৰণ বিধি উলংঘাৰ প্ৰসংগক লৈ কংগ্ৰেছৰ শীৰ্ষ নেতৃত্বৰ দলে দেশৰ মুখ্য নিৰ্বাচন আয়ুক্তক সাক্ষাৎ কৰি অভিযোগ দিব বুলি সংবাদমেলযোগে জানিবলৈ দিয়ে ।
লগতে পঢ়ক : চেঙা সমষ্টিত নিৰ্বাচনী প্ৰচাৰত ব্যস্ত ৰবিউল হুছেইন
