গুৱাহাটী, ১৯ ডিচেম্বৰ: উদুলি-মুদুলি গুৱাহাটীৰ ৰাজীৱ ভৱন । সমৰ্থকক লৈ প্ৰাৰ্থিত্ব প্ৰত্যাশীৰ অগমন ঘটিছে ৰাজীৱ ভৱনত । টিকট পাবনে নাই তাৰ নিশ্চয়তা নাই যদিও প্ৰাৰ্থিত্ব প্ৰত্যাশীসকলে অফুৰন্ত আগ্ৰহেৰে দাখিল কৰিছে আবেদন পত্ৰ । লগত জমা দিছে ধাৰ্য কৰা এক লাখ টকাৰ ডিমাণ্ড ড্ৰাফট । উল্লেখ্য যে ১৪ টা লোকসভা সমষ্টিৰ বাবে কংগ্ৰেছৰ প্ৰাৰ্থিত্ব প্ৰত্যাশীসকলে ১১ ডিচেম্বৰৰ পৰা ৰাজীৱ ভৱনত ভিৰ কৰা পৰিলক্ষিত হৈছে । বিজেপিক প্ৰতিহত কৰাৰ লক্ষ্যৰে কংগ্ৰেছৰ নেতৃত্বত অসমত ১৫ টাকৈ বিৰোধী ৰাজনৈতিক দল ঐক্যবদ্ধ হৈছে যদিও আসন বুজাবুজি এতিয়াও চূড়ান্ত হোৱা নাই । তেনেস্থলত কংগ্ৰেছ দলে কেইখন আসনত প্ৰতিদ্বন্দ্বিতা কৰিব সেয়া এতিয়াও নিশ্চিত হোৱা নাই ।
কিন্তু তৎস্বতেও কংগ্ৰেছৰ প্ৰাৰ্থিত্ব প্ৰত্যাশীসকলে ব্যাপক উৎসাহ আৰু আগ্ৰহেৰে নিজ নিজ সমষ্টি নিৰ্ধাৰণ কৰি এক লাখ টকাৰ ডিমাণ্ড ড্ৰাফটসহ জমা দিছে আবেদন পত্ৰ । আবেদন পত্ৰ জমা দিয়াৰ অন্তিম দিন ১৯ ডিচেম্বৰ আছিল যদিও এই সময়সীমা বৃদ্ধি কৰা হৈছে । এই সন্দৰ্ভত আজি প্ৰদেশ কংগ্ৰেছে এক বিবৃতি জাৰি কৰে । সেই অনুসৰি আবেদন পত্র জমা দিয়াৰ তাৰিখ ২২ ডিচেম্বৰলৈ বৃদ্ধি কৰা হৈছে ।
বিবৃতিযোগে জনোৱা অনুসৰি সদনৰ শীতকালীন অধিৱেশন চলি থকাৰ পৰিপ্ৰেক্ষিতত সাংসদসকল নতুন দিল্লীত ব্যস্ত থকা বাবে মনোনয়ন পত্ৰৰ আবেদন জমা দিয়াৰ সময় ২২ ডিচেম্বৰলৈকে বৃদ্ধি কৰা হৈছে । ইফালে অসমৰ ১৪ টা লোকসভা সমষ্টিৰ বাবে ৰাজীৱ ভৱনত আজিলৈকে ৭১গৰাকী প্ৰার্থীয়ে আবেদন পত্ৰ জমা দিছে ।
আজিৰ দিনটোত ২৫ গৰাকী প্ৰার্থীয়ে নতুনকৈ দলীয় প্ৰাৰ্থিত্ব বিচাৰি আবেদন জনায় । এতিয়ালৈকে কোকৰাঝাৰ লোকসভা সমষ্টিৰ বাবে দুগৰাকীয়ে, ধুবুৰীৰ লোকসভা সমষ্টিৰ বাবে ১১ গৰাকীয়ে, বৰপেটা লোকসভা সমষ্টিৰ বাবে ৬ গৰাকীয়ে, দৰং-ওদালগুৰিৰ বাবে ৫ গৰাকীয়ে, গুৱাহাটীৰ বাবে ৪ গৰাকীয়ে, ডিফু লোকসভা সমষ্টিৰ বাবে ৪ গৰাকীয়ে, কৰিমগঞ্জৰ বাবে ১০ গৰাকীয়ে, শিলচৰৰ বাবে ৬ গৰাকীয়ে, নগাঁও লোকসভা সমষ্টিৰ বাবে ৩ গৰাকীয়ে, কাজিৰঙাৰ বাবে ২ গৰাকীয়ে, শোণিতপুৰৰ বাবে ৬ গৰাকীয়ে, লখিমপুৰৰ বাবে ৪ গৰাকীয়ে, ডিব্ৰুগড়ৰ বাবে ৩ গৰাকীয়ে, যোৰহাট লোকসভা সমষ্টিৰ বাবে ৪ গৰাকীয়ে আৰু এগৰাকী প্ৰাৰ্থীয়ে সমষ্টিৰ নাম উল্লেখ নকৰাকৈ নিজৰ আবেদন জমা দিছে ।
লক্ষ্যণীয় বিষয় যে বৰপেটা সমষ্টিৰ সাংসদ আব্দুল খালেকৰ আবেদন পত্ৰ আজি দাখিল কৰা হয় যদিও সমষ্টিৰ নাম উল্লেখ কৰা হোৱা নাই । ইফালে নগাঁও লোকসভা সমষ্টিৰ সাংসদ প্ৰদ্যুৎ বৰদলৈয়ে নগাঁৱৰ বাবেই আবেদন পত্ৰ জমা দিছে যদিও লগতে সমষ্টিটোৰ বাবে আবেদন পত্ৰ জমা দিছে কংগ্ৰেছৰ আন এগৰাকী প্ৰভাৱশালী নেতাই ।
বিধায়ক ৰকিবুল হুছেইনেও নগাঁও সমষ্টিৰ প্ৰাৰ্থিত্ব বিচাৰি আবেদন কৰিছে । নগাঁৱৰ বাবে এতিয়ালৈকে তিনিজনে আবেদন পত্ৰ জমা দিছে । আনহাতে কংগ্ৰেছৰ আন এগৰাকী প্ৰভাৱশালী সাংসদ গৌৰৱ গগৈয়ে এতিয়ালৈকে আবেদন পত্ৰ জমা দিয়া নাই ।
উল্লেখ্য যে এতিয়ালৈকে দাখিল কৰা আবেদন পত্ৰৰ ভিতৰত ধুবুৰী সমষ্টিৰ বাবে সৰ্বাধিক ১১ গৰাকীয়ে আবেদন কৰিছে । সমষ্টিটোৰ বাবে আবু তাহেৰ আলী বেপাৰী, ৱাজেদ আলি চৌধুৰী, আব্দুল হামিদ, অমৃত বাদশ্বাহ, আব্দুৰ ৰচিদ মণ্ডল, ছফিয়া খাতুন, ড৹ চাজিদ হুছেইন, মতিউৰ ৰহমান মণ্ডল, আব্দুল হাই নাগৰি, নুৰ ছফিকুৰ ৱাজেদ আৰু আবু তাহেৰে প্ৰাৰ্থিত্ব বিচাৰি আবেদন কৰিছে ।
সেইদৰে কোকৰাঝাৰ সমষ্টিৰ বাবে গৰ্জন মুচাহাৰী আৰু প্ৰাণজিত মুচাহাৰীয়ে আবেদন পত্ৰ দাখিল কৰিছে । আনহাতে গুৱাহাটী লোকসভা সমষ্টিৰ বাবে এতিয়ালৈকে প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰ গোস্বামী, ৰমেন চন্দ্ৰ বৰঠাকুৰ, দ্বিজেন্দ্ৰ নাথ শৰ্মা আৰু ৰমেশ জৈনে আবেদন পত্ৰ দাখিল কৰিছে । ১৪ টা লোকসভা সমষ্টিৰ বাবেই কংগ্ৰেছৰ প্ৰাৰ্থিত্ব প্ৰত্যাশীসকলে আবেদন কৰিছে । অৱশ্যে শেষত কোনে টিকট লাভ কৰিব সেয়া সময়েহে ক'ব ।
কাৰণ দলীয় নেতাক সন্তুষ্ট কৰাৰ লগতে বিৰোধী ঐক্যমঞ্চত থকা দলসমূহকো সন্তুষ্ট কৰিব লাগিব । যিটো কংগ্ৰেছ নেতৃত্বৰ বাবে তেনেই সহজ নহ'ব ।
লগতে পঢ়ক: অন্তিম দিনটোতো এগৰাকী সাংসদে জমা নিদিলে এক লাখ টকাসহ প্ৰ-পত্ৰ
