গুৱাহাটী, 4 এপ্ৰিল: ৰাজ্যসভা নিৰ্বাচনত কংগ্ৰেছ বিধায়কে বি জে পিৰ মিত্ৰজোঁটৰ প্ৰাৰ্থীক ভোট দিয়াৰ কথা আনুষ্ঠানিকভাৱে স্বীকাৰ কৰিলে কংগ্ৰেছ দলে । সোমবাৰে প্ৰদেশ কংগ্ৰেছৰ জ্যেষ্ঠ মুখপাত্ৰ তথা অনুশাসন সমিতিৰ অধ্যক্ষ ভৰত নৰহে এই কথা লিখিতভাৱে স্বীকাৰ কৰি এক জাননী জাৰি কৰিছে । আকৌ ৰাজ্যসভাৰ নিৰ্বাচনত Cross voting আৰু টকা লেনদেনৰ সন্দৰ্ভত কোনো মন্তব্য নিদিবলৈ দলীয় নেতা-কৰ্মীলৈ সকীয়নী প্ৰদেশ কংগ্ৰেছৰ জ্যেষ্ঠ মুখপাত্ৰ তথা অনুশাসন সমিতিৰ অধ্যক্ষ ভৰত নৰহৰ (Cross voting in Rajya Sabha Election)।
উল্লেখ্য যে, ৰাজ্যসভাৰ নিৰ্বাচনত ৰিপুন বৰাক প্ৰাৰ্থীত্ব দিয়াৰ বাবে এ আই ইউ ডি এফ দলে ৰিপুন বৰাৰ পৰা 1 কোটি 60 লাখ টকা লোৱা বুলি কংগ্ৰেছৰ বিধায়ক কমলাক্ষ দে পুৰাকায়স্থই এ আই ইউ ডি এফৰ বিৰুদ্ধে গুৰুতৰ অভিযোগ উত্থাপন কৰিছিল ।
তাৰ পিছতে এ আই ইউ ডি এফৰ বিধায়ক কৰিমুদ্দিন বৰভূঞাই উভতি ধৰি কমলাক্ষ দে পুৰাকায়স্থই বি জে পিক ভোট দিয়া বুলি অভিযোগ কৰিছে । তাৰ পিছত সোমাবাৰে সুৰ সলনি কৰি কমলাক্ষ দে পুৰাকায়স্থই কয় যে, ৰাজ্যসভাৰ নিৰ্বাচনত ৰিপুন বৰাক প্ৰাৰ্থীত্ব দিয়াৰ বাবে এ আই ইউ ডি এফ দলে ৰিপুন বৰাৰ পৰা 1 কোটি 60 লাখ টকা লোৱা কথাষাৰ তেওঁ বিধানসভাৰ কেন্টিনত শুনিছিল ।
ইপিনে এনেধৰণৰ মন্তব্য নিদিয়াৰ বাবে ইতিমধ্যে প্ৰদেশ কংগ্ৰেছৰ জ্যেষ্ঠ মুখপাত্ৰ তথা অনুশাসন সমিতিৰ অধ্যক্ষ ভৰত নৰহে কমালক্ষ দে’ক সকীয়নিমূলক জাননী দিছে । অসম প্ৰদেশ কংগ্ৰেছৰ পৰা জনোৱা মতে ৰাজ্য সভা নিৰ্বাচনত ইচ্ছাকৃতভাৱে কংগ্ৰেছৰ প্ৰাৰ্থীৰ বিৰুদ্ধে গৈ ভুলকৈ ভোট দিয়া কংগ্ৰেছ বিধায়ক ছিদ্দিক আহমেদৰ বিধায়ক পদটো খাৰিজ কৰাৰ বাবে বিধানসভাৰ অধ্যক্ষক অভিযোগ দিব ।
লগতে পঢ়ক: GMC Election 2022: গুৱাহাটী পৌৰ নিগমৰ নিৰ্বাচনত বি জে পিৰ জয়যাত্ৰা আৰম্ভ
